ۇيىم باسشىلىعى بىلعارى قولعاپ شەبەرلەرىنە بوكس كەشىن ۇيىمداستىرۋعا 30 كۇن ۋاقىت بەردى. ەگەر تاراپتار 23 قازانعا دەيىن ورتاق مامىلەگە كەلە الماسا, وندا اتالعان جەكپە-جەكتى پروموۋتەرلىك ءباس ساۋداعا شىعارادى. الدىن الا مالىمەت بويىنشا گولوۆكين وزىنە تيەسىلى WBA بەلدىگىن قورعاۋعا كەلىسىمىن بەرگەن جاعدايدا الەم چەمپيونى رەتىندە جەكپە-جەكتەن تۇسەتىن تابىستىڭ 75 پايىزىنا يەلىك ەتەدى. ال 25 پايىزعا كۋبالىق قابىلان كەلىسە مە؟ مىنە, بوكسشىلار ءبىر اي بويى وسى اڭگىمە توڭىرەگىندە كەلىسسوز جۇرگىزەدى.
بوكس ماماندارى قانداي جاعداي بولسا دا, گولوۆكين بۇل جەكپە-جەكتەن ەكى ءتۇرلى سەبەپپەن باس تارتا الماۋى مۇمكىن ەكەنىن ايتىپ وتىر. ءبىرىنشىسى – جوعارىدا ايتىپ وتكەندەي, قارجى ماسەلەسى. ياعني اتالعان ايقاستا وتانداسىمىزعا جاپ-جاقسى گونورار ۇسىنىلىپ وتىر. ەگەر ول چەمپيوندىق بەلدىگىنەن باس تارتىپ, باسقا بوكسشىلارمەن جۇدىرىقتاسۋدى قۇپ كورسە, وندا جوعارى گونورار الاتىنىنا ەشكىم كەپىلدىك بەرە المايدى.
ەكىنشى سەبەپ, WBA ۇيىمى گولوۆكينگە بەلبەۋىن وسى جىلدىڭ كۇزىندە قورعاۋدى مىندەتتەگەن بولاتىن. الايدا وتانداسىمىز مەكسيكالىق ساۋل الۆارەسپەن ءۇشىنشى جەكپە-جەگىن وتكىزەتىن بولعاندىقتان, وعان مىندەتتى بەلدىك قورعاۋدى ءبىر جولعا كەيىنگە شەگەرىپ, ارنايى رۇقسات بەرگەن ەدى. WBA باسشىلىعى قازاقستاندىق بوكسشىعا ەكىنشى رەت مۇنداي مۇمكىندىك بەرىلمەيتىنىن ايتىپ وتىر.
ايتا كەتەيىك, گەننادي گولوۆكين WBA Super چەمپيوندىق بەلبەۋىن بيىل جەڭىپ العان بولاتىن. وسى جىلدىڭ ءساۋىر ايىندا وتانداسىمىز جاپونيادا جەرگىلىكتى بوكسشى رەتا مۋراتامەن جۇدىرىقتاسىپ, ونى توعىزىنشى راۋندتا تەحنيكالىق نوكاۋتپەن تىزە بۇكتىرگەن-ءدى.
ال 39 جاستاعى لارا 2021 جىلدىڭ مامىرىنان باستاپ WBA World تيتۋلىنا يەلىك ەتەدى. بىلتىر ول اقش-تىڭ كاليفورنيا شتاتىندا وتكەن بوكس كەشىندە امەريكالىق توماس لاماننانى (30-4-1) ءبىر جارىم مينۋتتىڭ ىشىندە ەسىنەن تاندىرىپ, چەمپيوندىق بەلدىككە قول جەتكىزگەن ەدى. بۇل – لارانىڭ ورتا سالماقتاعى العاشقى جەكپە-جەگى بولاتىن. ارادا ءبىر جىل وتكەن سوڭ ەريسلاندي WBA World بەلبەۋىن ءبىرىنشى رەت قورعادى. نيۋ-يوركتەگى Barclays Center سپورت كەشەنىندە ۇيىمداستىرىلعان بوكس كەشىندە يرلانديالىق گاري و’سالليۆانمەن قولعاپ ءتۇيىستىرىپ, 8-راۋندتا تەحنيكالىق نوكاۋتپەن جەڭىسكە جەتتى.
گولوۆكيننەن تۇپ-تۋرا ءبىر جاس كىشى ەريسلاندي لارا 1983 جىلدىڭ 11 ساۋىرىندە كۋبانىڭ وڭتۇستىك-شىعىسىنداعى شاعىن قالادا دۇنيەگە كەلگەن. اۋەسقوي بوكستا مول تاجىريبەگە يە بولعان لارا 2005 جىلى الەم چەمپيوناتىندا 69 كيلودا توپ جارسا, 2006 جىلى ورتالىق امەريكا جانە كاريب تەڭىزى جاعالاۋىنىڭ ويىندارىندا التىننان القا تاقتى. ودان بولەك بىرقاتار حالىقارالىق ءىرى تۋرنيردە وزا شاپقان.
2005 جىلى قىتايدىڭ ميانيانە قالاسىندا وتكەن الەم چەمپيوناتىندا كۋبالىق بوكسشى كىل مىقتىلاردى جولدان تايدىرىپ, بارشا جانكۇيەر الدىندا ءوز مىقتىلىعىن دالەلدەگەن بولاتىن. سول جىلعى جاھاندىق دودانىڭ العاشقى اينالىمىندا ول ۋكراينالىق سەرگەي دەرەۆيانچەنكونى 30:9 ەسەبىمەن تىزە بۇكتىرسە, ەكىنشى اينالىمدا كەيىننەن وليمپيادا (2008) جانە الەم چەمپيوناتىنىڭ (2009) كۇمىس جۇلدەگەرى اتانعان ۇندىستاندىق ۆيدجەندەر سينگحتەن, ءۇشىنشى كەزەڭدە رەسەيلىك اندرەي بالانوۆتان ايلاسىن اسىردى. شيرەك فينالدا امەريكالىق مەلسون بويدتى جارىس جولىنان ىعىستىرسا, جارتىلاي فينالدا افينا وليمپياداسىنىڭ چەمپيونى بولعان قازاقستاندىق باقتيار ارتاەۆتى 31:22 ەسەبىمەن جەڭىپ, فينالدىق سايىسقا جولداما الدى. باس جۇلدە ءۇشىن وتكەن ايقاستا بەلارۋس وكىلى ماگومەد نۋرۋتدينوۆتى 24:9 ناتيجەسىمەن قاپى قالدىرىپ, الەم چەمپيونى اتاعىنا قول جەتكىزدى.
2007 جىلى برازيليادا وتكەن پانامەريكا ويىندارى كەزىندە لارا ۇلتتىق قۇراماداعى ارىپتەسى, وليمپيادا چەمپيونى گيلەرمو ريگوندومەن بىرگە كاسىپقوي بوكستا ونەر كورسەتىپ, مول قارجىعا كەنەلۋ ءۇشىن امەريكاعا قاشۋعا تىرىسادى. الايدا بىرنەشە كۇننەن كەيىن ريگوندو مەن لارا قۇقىق قورعاۋشىلاردىڭ قۇرىعىنا ءىلىنىپ, ولاردى كۋباعا دەپورتاتسيالاپ جىبەرەدى. وسى وقيعادان كەيىن كۋبا باسشىسى فيدەل كاسترو لارا مەن ريگوندونى ۇلتتىق قۇرامادان شەتتەتۋدى تاپسىرادى. الايدا ارادا ءبىر جىل وتكەندە لارا ەكىنشى رەت ەلدەن قاشۋعا تالپىنىپ كورەدى. بۇل جولعى ۇمتىلىسى ءساتتى جۇزەگە اسىپ, ول گەرمانياعا تابان تىرەيدى. بۇل جاقتا ول ودلانەر سوليس, يۋريوركيس گامبوا جانە تاعى باسقالار سياقتى قاشقىنداردىڭ قاتارىنا قوسىلادى.
ءسويتىپ, ەريسلاندي 2008 جىلدىڭ سوڭىنا دەيىن تۇركيا مەن گەرمانيادا ءبىر-ءبىر جەكپە-جەك وتكىزىپ, كەلەسى جىلى اقش-قا قونىس اۋداردى. سول ۋاقىتتان بەرى ول كاسىپقوي بوكستا 34 كەزدەسۋ وتكىزىپ, 28 رەت جەڭىسكە جەتتى. ءۇش جەكپە-جەكتە قارسىلاسىمەن تەڭ تۇسسە, تاعى ءۇش كەزدەسۋدە جەڭىلىپ قالدى. 2011 جىلى امەريكالىق پول ۋيليامستان, 2014 جىلى مەكسيكالىق ساۋل الۆارەستەن جانە تاعى ءبىر اقش وكىلى دجاررەتت حيوردتەن ۇپاي ساندارى بويىنشا ۇتىلعان.
سونداي-اق ول ءار جىلدارى ءبىرىنشى ورتا سالماقتا WBA تۇجىرىمىنىڭ سۋپەر چەمپيونى, IBO بەلدىگىنىڭ يەگەرى اتانعان.
