دەنزەل 1995 جىلدىڭ 29 قاڭتارىندا ۇلىبريتانيانىڭ استاناسى – لوندوندا تۋىپ-وسكەن. كاسىپقويلار اراسىندا جۇدىرىقتاسىپ جۇرگەنىنە بەس جىل بولدى. سول ارالىقتا 19 كەزدەسۋ وتكىزىپ, 17 رەت جەڭىسكە جەتتى. 14 قارسىلاسىن ەسىنەن تاندىردى. 2020 جىلدىڭ كۇزىڭدە ول مارك حەفرونمەن تەڭ تۇسسە, 2021 جىلدىڭ كوكتەمىندە فەليكا كەشتان ويسىراي ۇتىلدى. بۇل جەكپە-جەك ءۇشىنشى راۋندتا توقتاتىلدى. بەنتلي ءوزىنىڭ سوڭعى ءۇش باسەكەسىندە سەم ەۆانس, لينۋس ۋدوفيا جانە ماركۋس مورريسسون سىندى تانىمال بىلعارى قولعاپ شەبەرلەرىنەن باسىم ءتۇستى. ونىڭ كاسىپقوي بوكستان ءوز ەلىنىڭ ەكى دۇركىن چەمپيونى دەگەن اتاعى بار.
ورتا سالماقتىلاردىڭ رەيتينگىندە 14-ورىندا تۇرعان دەنزەل بەنتلي جانىبەك ءالىمحان ۇلى التىن بەلبەۋدى يەلەنگەن بەتتە ونى جەكپە-جەككە شاقىرعان ەدى. قانداسىمىز ونىڭ بۇل ۇسىنىسىن قابىلدادى. مىنە, ەندى قازاقتىڭ ۇلى الەم چەمپيونى رەتىندە ءوزىنىڭ العاشقى جەكپە-جەگىن 12 قاراشادا وتكىزەدى.
ەستەرىڭىزگە سالا كەتەيىك, 29 جاستاعى جانىبەك ۇستىمىزدەگى جىلدىڭ 21 مامىرىندا ۇلىبريتانيالىق دەنني ديگنۋمدى ەكىنشى راۋندتا ۇرىپ جىعىپ, «ۋاقىتشا چەمپيون» اتاعىن يەلەنگەن بولاتىن. تامىز ايىنىڭ اياعىندا ول WBO-نىڭ تولىققۇقىلى چەمپيونى اتاندى. سەبەبى سول كۇنگە دەيىن تەڭدەسسىز دەپ تانىلىپ كەلگەن امەريكالىق دەمەتريۋس اندرادە ءوز اتاعىن قورعاۋدان باس تارتىپ, باسقا سالماققا اۋىستى.
