وركەنيەتتەر ۇيلەسىمىنىڭ ۇلكەن شاڭىراعىنا اينالعان قازاق ەلىندە الەمدىك جانە ءداستۇرلى دىندەر كوشباسشىلارىنىڭ VII سەزى اياسىندا جاھاننىڭ جان-جاعىنان تاسپيىق تارتقان, داعارالى اق سالدە كيىپ, شاپانىن شارت بۋىنعان, جەلبەگەي جامىلعان تورتكۇل دۇنيەنىڭ تاقۋالارى, ءدىنباسىلارى ەلوردامىزدا باس قوستى. دىندەر قۇرىلتايىنىڭ بيىلعى باستى مەيماندارىنىڭ ءبىرى ريم پاپاسى فرانتسيسك تە ارنايى كەلىپ, ادىلەتتى قازاقستان قۇرۋداعى جاڭا باستامالارعا, ەلدىڭ ءوسىپ-وركەندەۋىنە, دامۋىنا دەگەن اقجارما تىلەگى مەن كيەلى دۇعاسىن ارناپ جاتىر. لايىم قابىل بولسىن!
وسى ورايدا پرەزيدەنت قاسىم-جومارت توقاەۆ ايتقانداي, ورتالىق ازيا ەلدەرى اراسىندا كاتوليك قاۋىمىنىڭ ەڭ كوپ وكىلى ءبىزدىڭ ەلىمىزدە تۇراتىنىن ايتا كەتكەن ءلازىم. سونداي-اق بيىل الاقانداي قالا-مەملەكەت بولسا دا, ءدۇيىم دۇنيەنى اۋزىنا قاراتىپ وتىرعان ۆاتيكان مەن قازاقستان اراسىنداعى ديپلوماتيالىق قارىم-قاتىناستىڭ ورناعانىنا 30 جىل تولىپ وتىر. وسى سەزد العاش شاقىرىلعان 2003 جىلدان بەرى ريم پاپاسىنىڭ ەكى مارتە كونفەسسياارالىق ديالوگقا قاتىسۋى قاسيەتتى تاقتىڭ قازاقستاننىڭ الەمدەگى كەلىسىمدى ساقتاۋ مەن تۇراقتاندىرۋداعى جان-جاقتى ىزگى ساياساتىن قولدايتىنىن كورسەتەدى.
كەشەگى ىزگى جۇزدەسۋلەردە پونتيفيك قازاقتىڭ «بەرەكە باسى – بىرلىكتە» دەگەن ءتامسىلىن تىلىنە بەكەر تيەك ەتكەن جوق. ءبىز دە قازىر شىرپى تيسە لاۋ ەتە قالاتىن قۋراعان قاۋدىڭ ورتاسىندا قالعانداي كۇردەلى گەوساياسي كۇي كەشىپ وتىرعان الەمنىڭ ءبىر بولشەگىمىز. ءبىر تۋدىڭ استىندا بولعان بۇرىنعى وداقتاس ەلدەردىڭ كەيبىرىنىڭ اراسىنداعى الاۋىزدىققا ارااعايىندىق كورسەتۋ دە وسى سەزگە قاتىسىپ جاتقان قاسيەتتى ءدىن وكىلدەرىنىڭ ميسسياسى بولماق. ويتكەنى ىزگى سەنىم ەشۋاقىتتا سوعىستى قولدامايدى, ناقاق قان توگۋدى ايىپتايدى. سوندىقتان قاسيەتتى تاقتىڭ قازاق ءتامسىلىن ەسكە الۋى ۇلتىمىزدىڭ ۇيىسىپ وتىرعانىنا ءتانتى بولۋى, بەيبىتشىلىكتى ساقتاۋعا ۇلگى قىلۋى دەپ تۇسىندىك.
«بۇگىنگى ەڭ باستى قاۋىپ-قاتەر – كەدەيلىك. اباي وسىنى بايقاعان. ادىلەتسىزدىك, تەڭسىزدىك ورىن الىپ تۇرعان كەزدە سەنىمنىڭ بولۋى قيىن», دەدى كاتوليك شىركەۋىنىڭ باسشىسى. فرانتسيسكتىڭ بۇل ءسوزى شىن مانىندە حالىقشىل, ادامزاتتىڭ الداعى احۋالىنا الاڭداۋشىلىق بىلدىرگەن ۇندەۋ. سونداي-اق ەلدەگى حالىقتىڭ تابىسىن ارتتىرۋ تۋرالى باستامالارعا دەم بەرەتىن قولداۋ.
ەڭ باستىسى, ەلىمىزگە جيىرما جىل بۇرىن كەلگەن ريم پاپاسى ءىى يوانن پاۆەل دە ابايدىڭ عاقلياسىن انا تىلىمىزدە ەسكە العان-دى. قازاق جەرىنىڭ قۋعىن-سۇرگىن كورىپ, ازاپقا تۇسكەن, ايدالعاندار مەن قاھارماندار جەرى ەكەنىن, ويشىلدار مەن سۋرەتكەرلەر ەلى ەكەنىن ايتىپ, ىنتىماقتاستىق پەن بەيبىتشىلىك رۋحىندا ەشتەڭەدەن تايىنباۋعا تىلەك بىلدىرگەن.
مىنە, ءبىر جارىم عاسىر بۇرىن عانا شىڭعىستاۋدىڭ شوقتىعىنان شارتاراپقا وي جۇگىرتكەن حاكىمنىڭ اسىل سوزدەرىن التى قۇرلىققا جايىلعان الىپ ءدىننىڭ قايراتكەرلەرى ەلىمىزدىڭ تورىنە كەلىپ ايتۋى دا ايرىقشا تولقىتادى.
«مەن دومبىرامەن ءسوزىمدى, تىلەگىمدى ۇيلەستىرگىم كەلەدى», دەپ باستاعان شىنايى ويىن فرانتسيسك قازاق ۇلت اسپابىنىڭ ەكى ىشەگى ەجەلگى زامان مەن وسى ۋاقىتتىڭ سىرىن شەرتەتىنىن, دومبىرانىڭ ءۇنى – قايشىلاسقان الەمنىڭ, ياعني جاۋىزدىق پەن مەيىرىم, سوعىس پەن بەيبىتشىلىك, سۇرەڭسىزدىك پەن سۇلۋلىق اراسىن جالعايتىن ۇيلەسىم ەكەنىن جەتكىزدى.
پونتيفيك وسى ۇشى-قيىرسىز ۇلى دالاداعى قيىندىققا قايسارلىقپەن قارسى تۇرىپ كەلە جاتقان حالقىمىزدىڭ ومىرسۇيگىش قاسيەتىن ايتۋدا دا كيەلى اسپاپتىڭ ءتىل ۇشىنا ورالاتىنىنا توقتالۋى شىن مانىندە تۇلا بويدى شىمىرلاتقان جىلى اعىس سىقىلدى اسەر قالدىرادى.
ءدىن تازاسىن وي تابار دەگەن دە وسى شىعار, ءاسىلى. ريم پاپاسىنىڭ قازاق ەلىنىڭ تابيعاتىن قازاقى قالىپتا ءتۇسىنۋى قۋانتتى. بۇل بىلە بىلگەنگە, ەلىمىزگە, حالقىمىزعا, داستۇرىمىزگە دەگەن ۇلكەن قۇرمەت!
