پارلامەنت • 07 قىركۇيەك, 2022

كونستيتۋتسيالىق سوت تۋرالى زاڭ جوباسى ماقۇلداندى

4930 رەت

كورسەتىلدى

1 مين

وقۋ ءۇشىن

پارلامەنت ءماجىلىسىنىڭ دەپۋتاتتارى «قازاقستان رەسپۋبليكاسىنىڭ كونستيتۋتسيالىق سوتى تۋرالى» كونستيتۋتسيالىق زاڭ جوباسىن ماقۇلدادى, دەپ حابارلايدى Egemen.kz.

ايانا توعانبەك

كونستيتۋتسيالىق سوت تۋرالى زاڭ جوباسى ماقۇلداندى

«كونستيتۋتسيالىق زاڭ جوباسىنىڭ ماقساتى كونستيتۋتسيالىق كەڭەستى كونستيتۋتسيالىق سوتقا اينالدىرۋ بولىگىندە رەسپۋبليكا كونستيتۋتسياسىنا ەنگىزىلگەن وزگەرىستەردى جۇزەگە اسىرۋ, مەملەكەتتىڭ ادام قۇقىقتارىن قورعاۋ ينستيتۋتتارىن نىعايتۋ, قازاقستان رەسپۋبليكاسى كونستيتۋتسياسىنىڭ نەگىزگى ەرەجەلەرىنىڭ مۇلتىكسىز ساقتالۋىن قامتاماسىز ەتۋ. زاڭ جانە ازاماتتاردىڭ كونستيتۋتسيالىق باقىلاۋعا قولجەتىمدىلىگىن كەڭەيتۋ», دەپ ءتۇسىندىردى ادىلەت ءمينيسترى قانات مۋسين پالاتا وتىرىسىندا.

ءمينيستردىڭ ايتۋىنشا, كونستيتۋتسيالىق زاڭ جوباسى ءۇش بولىمنەن, 10 تاراۋدان جانە 68 باپتان تۇرادى. ءمانى بويىنشا جوبانى ەكى بولىككە بولۋگە بولادى: ءبىرىنشى بولىمدە كونستيتۋتسيالىق سوتتىڭ, ونىڭ سۋديالارىنىڭ مارتەبەسى, ولاردىڭ كەپىلدىكتەرى مەن قامتاماسىز ەتىلۋى, ەكىنشى بولىمدە كونستيتۋتسيالىق سوت ءىسىن جۇرگىزۋ ءتارتىبى.

ء«بىرىنشى بولىمگە كەلەتىن بولساق, كونستيتۋتسيالىق سوت بيلىكتىڭ سوت تارماعىنا جاتپايتىنىن اتاپ وتكىم كەلەدى, ويتكەنى بۇل ماسەلە كونستيتۋتسيادا شەشىلگەن. كونستيتۋتسيالىق سوت ەلىمىزدىڭ بۇكىل اۋماعىندا كونستيتۋتسيانىڭ ۇستەمدىگىن قامتاماسىز ەتەتىن ورگان بولادى. ال كونستيتۋتسيالىق سوتتىڭ سۋديالارى مارتەبەسى كونستيتۋتسيادا بەلگىلەنگەن جاۋاپتى مەملەكەتتىك لاۋازىمدى اتقاراتىن تۇلعالار بولادى», دەدى قانات مۋسين.

سونداي-اق ول زاڭ جوباسى كونستيتۋتسيالىق سوت سۋديالارىن تاعايىنداۋ جانە ولاردىڭ وكىلەتتىكتەرىن توقتاتۋ تارتىبىنە قاتىستى ماسەلەلەردى ەگجەي-تەگجەيلى رەتتەيتىنىن ايتتى.

زاڭ جوباسىنىڭ ەكىنشى بولىگىندە, ەڭ الدىمەن, كونستيتۋتسيالىق سوت ءىسىن جۇرگىزۋدىڭ جالپى شارتتارى مەن قاعيداتتارى بەكىتىلگەنى اتاپ ءوتىلدى. كونستيتۋتسيالىق سوتقا جۇگىنۋ تۇرلەرى, ولاردىڭ نىسانى مەن مازمۇنى ايقىندالادى.