ۋنيۆەرسيتەت باسشىلىعى جانە پروفەسسور-وقىتۋشىلار قۇرامى مەن قىزمەتكەرلەرى, ءبىلىم الۋشىلار مەملەكەت باسشىسىنىڭ بۇگىنگى جولداۋىن ۇجىم بولىپ تىڭدادى. ماڭىزدى سالالار تۇگەلدەي دەرلىك قامتىلعان ساياسي قۇجاتتى تالقىلاعان ۇجىم جولداۋدى قولدايتىندارىن جەتكىزدى. اسىرەسە, ءبىلىم سالاسىنا, جاستارعا قاتىستى ايتىلعان ماسەلەلەر جوعارى وقۋ ورنى ۇستازدارىنىڭ كوڭىلىنەن شىقتى. ۋنيۆەرسيتەتتىڭ باسقارما توراعاسى-رەكتور اسقار نامەتوۆ بيىلعى جولداۋدىڭ ءدال ۋاقىتىندا جاريالانعانىنا سەنىمدى.
– بۇگىن – ءبىلىم كۇنى. ءبىزدىڭ باستى ماقساتىمىز – ساپالى ءبىلىم بەرۋ, ساپالى كادرلار دايارلاۋ. وسى رەتتە جاستاردىڭ جوعارى ءبىلىم الۋىنا جاعداي جاساۋ, بىلىكتى مامان بولۋىنا ىقپال ەتۋ, جۇمىسپەن قامتۋ باعىتىندا جۇمىستانىپ كەلەمىز. مەملەكەت باسشىسىنىڭ جولداۋىندا دا بۇل ماسەلەلەر نازاردان تىس قالمادى. بۇعان دەيىن دە ءبىزدىڭ الدىمىزعا ناقتى ماقسات-مىندەتتەر قويىلعان ەدى. ناتيجەسىندە ءبىز جاڭا وقۋ جىلىنداعى جۇمىس جوسپارىمىزدى جۇيەلەپ, شارۋاشىلىقتارمەن, كاسىپكەرلەرمەن, بيزنەس نىساندارىمەن بىرىگە وتىرىپ, جوعارى ءبىلىمدى كاسىبي ماماندار دايارلاۋدى ىسكە اسىراتىن بولامىز, – دەدى اسقار مىرزاحمەت ۇلى.
جاڭگىر حان ۋنيۆەرسيتەتىنىڭ ستۋدەنتتەرى جولداۋدىڭ جاستارعا قاتىستى تۇستارىن قۋانا قابىلدادى.
– پرەزيدەنت جولداۋىن ۋنيۆەرسيتەت قابىرعاسىندا ۇستازدارىمىزبەن بىرگە تىڭدادىق. مەملەكەت باسشىسى ماڭىزدى سالالاردى نازاردان تىس قالدىرماي, ەلدەگى بارلىق جاعدايعا توقتالىپ ءوتتى. سونىڭ ىشىندە پرەزيدەنتىمىزدىڭ جاستار ماسەلەلەسىنە دە باسىمدىق بەرىپ, مەملەكەتتىڭ ولاردى ءار كەز قولدايتىنىن ايتقانى قۋانتتى. ءبىلىم بەرۋ گرانتتارىن ءبولۋ, جۇمىسپەن قامتۋ باعىتىنداعى ءىس-شارالار جاستارعا سەرپىلىس بەرگەنى انىق. جالپى بۇل ماڭىزدى قۇجاتتا كورسەتىلگەن بارلىق ماقسات-مىندەتتەر ەلىمىزدىڭ بولاشاعىنا, دامۋ جولىنا وڭ اسەرىن تيگىزەدى دەگەن ويدامىن, – دەيدى 4-كۋرس ستۋدەنتى ومارحان نياز.
