مەن ول كەزدە مۇنىڭ بىرەۋىن دە بىلگەن ەمەسپىن. ونىڭ اتى-جونىنەن تەك 90-جىلداردىڭ باسىندا اعا گازەتتىڭ وڭتۇستىك قازاقستان وڭىرىندەگى مەنشىكتى ءتىلشىسى قىزمەتىنە كىرىسكەندەگى جازعان ماقالالارى ارقىلى ءبىر-اق حاباردار بولدىم. ال كەزدەسىپ, تانىسقانىمىز 1996 جىلدىڭ جازىنان باستالدى. بۇل اقپارات مينيسترلىگىنىڭ ماۋسىم ايىنداعى سوڭعى اپتانىڭ جەكسەنبىسىن جۋرناليستەر كۇنى دەپ بەلگىلەگەن كەز ەدى. سوعان بايلانىستى الماتىداعى گازەت-جۋرنال, راديو جانە تەلەۆيزيا قىزمەتكەرلەرى اراسىندا فۋتبولدان س.بەردىقۇلوۆ اتىنداعى تۋرنير وتەتىن بولدى. مينيسترلىكتىڭ ۇيعارىمى بويىنشا ونى ۇيىمداستىرىپ, وتكىزۋگە باقىلاۋ جاساۋ «ەگەمەن قازاقستان» گازەتى باس رەداكتورىنىڭ ورىنباسارى قىزمەتىنە جاڭادان كەلگەن ەركىن قىدىرعا جۇكتەلىپتى. وسىعان بايلانىستى ول الداعى ءىس-شاراعا قاتىسۋعا ىنتا بىلدىرگەن باق رەداكتسيالارى وكىلدەرىن جيناپ الىپ, اپتا سايىن جينالىس وتكىزىپ تۇردى. سۇرايتىنى – كوماندالاردىڭ جاساقتالۋ جاعدايى, ولارداعى ويىنشىلاردىڭ الاڭعا كيىپ شىعاتىن سپورتتىق فورمالارمەن قامتىلۋ دەڭگەيى. ال تالابى – دايىندىق يەلەرىنىڭ جۇمىستان كەيىنگى جاتتىعۋدان قالماۋى. قارايمىز: ءوڭى جىلى, بيازى جىگىت. مىنەزى جۇمساق, كىشىپەيىل. كۇتپەگەن جەردەن ءسوز تاۋىپ, ەلدى دۋ كۇلدىرەتىن ءازىلى دا جوق ەمەس. وسى قاسيەتىنە قاراپ ونى جاتسىنبادىق. بىردەن ءىش تارتىپ, تەز ءتىل تابىسىپ كەتتىك. ءسويتىپ, قولدان كەلگەن كومەگىمىزدى اياماۋعا تىرىستىق. سونىڭ ناتيجەسىندە تۋرنير دە ىڭ-شىڭسىز ءوتىپ, ءتيىستى ۆەدومستۆونىڭ بۇل ءىس-شارانى جوعارى باعالاعانى بار.
ءوستىپ جۇرگەندە استانا الماتىدان اقمولاعا كوشەتىن بولدى. بۇل 1997 جىلدىڭ اياق كەزى ەدى. وسىعان بايلانىستى باستالعان الاساپىراندا باق سالاسى دا وڭتايلانۋ, قىسقارۋ ۇدەرىستەرىن باستارىنان وتكەرە باستادى. ءسويتىپ, «بالاپان باسىنا, تۇرىمتاي تۇسىنا» دەيتىندەي زامان تۋدى. سوندا نە ىستەرىن بىلمەگەن كوپ ارىپتەستەرىمىزدىڭ ويىندا ءبىر عانا ءۇمىت بولدى. ول – ەلورداعا بەت العان ۇلكەن كوشكە ىلىگۋ-ءتىن. سونداي نيەت ماعان دا تىنىم بەرمەي ءجۇردى. بۇعان: «استانادا قالالىق گازەت اشىلعالى جاتىر. سوعان مينيسترلىك باس رەداكتوردىڭ ورىنباسارىن ىزدەستىرۋدە. بارعان قىزمەتكەرلەرگە اكىمدىك ءۇي دە بەرەمىز دەپ وتىر», دەگەن جاناشىر جان ساۋىتبەك ابدراحمانوۆتىڭ ءسوزى قامشى بولعان ەدى. سودان نە كەرەك: «تاۋەكەل!» دەپ ارقاعا اتتاندىم. پويىزدان تۇسكەن بويدا اكىمدىككە, ودان «اقمولا اقشامى» گازەتىنە كەلىپ, جۇمىستى باستادىم. ۇجىم مۇشەلەرى ءار جاقتان جينالىپتى. تاتۋ بولدىق. ەنتۋزيازممەن ەڭبەك ەتتىك. ءسويتىپ, گازەتتى جۇتىندىرىپ, ەل وقيتىنداي قىزىقتى ەتىپ شىعارىپ جاتتىق. بىراق قالا اكىمى جاقسىبەك ادىلبەكوۆتەن حابار جوق. ء«ۇي بەرەمىن», دەگەن ءسوزىن جۇتقان سياقتى. «قوي, – دەدىم ارادا سەگىز اي وتكەن سوڭ. – جاعداي وسىلاي بولا بەرسە, جىلدىڭ سوڭىنا قاراي ەڭبەك دەمالىسىن الايىن دا الماتىما كەتەيىن. سودان بۇل جەرگە قايتا ورالماي-اق قويايىن».
وسىنداي ويمەن جۇرگەندە قاراشا ءوتتى. جەلتوقسان تۋدى. مىنە, سول ۋاقىتتا «اقمولا اقشامىنا» مەنى ىزدەپ ەركىننىڭ كەلمەسى بار ما؟! مۇلدەم كۇتپەگەن نارسە. توسىن جاعداي. ويتكەنى ول كەزدە سان ساپالاق جۇمىستارمەن يۋ-قيۋ تىرلىك كەشىپ جاتقان بۇل قالادا بىرەۋدى بىرەۋ ىزدەۋ, اماندىقتى ءبىلىپ, حال سۇراسۋ دەگەن ىلۋدە عانا ءبىر كەزدەسەتىن جاعداي بولاتىن. وسىنداي جالعىزسىراپ ءارى قۇلازىپ جۇرگەن ساتتە ەركىننىڭ كەلۋى... قۋانىپ, ارقا-جارقا بولدىق تا قالدىق. اماندىق-ساۋلىق سۇراسقان سوڭ ايتقانى: ەندى ەكى-ءۇش ايدا «ەگەمەن قازاقستان» گازەتىنىڭ ۇجىمى دا الماتىدان استاناعا قونىس اۋدارماقشى ەكەن. كەيىن «اقمولا اقشامى» رەداكتسياسىنداعى ەكەۋمىزدىڭ سول كەزدەسۋىمىز تۋرالى ەركىننىڭ ء«ومىر ءسۇرۋ فورمۋلاسى» اتتى ماقالاسىندا بىلاي دەپ جازعانى بار: «ەگەمەننىڭ» بولاشاق وفيسىندەگى جوندەۋ جۇمىسىنان قولىم قالت ەتكەندە جانبولات اعانى ىزدەپ, قالالىق گازەتكە باردىم. كوردىم. اڭگىمەلەستىم. وتىرعان كەڭسە, ونداعى بولمە كوزگە وتە قوراش ەكەن. ۇستەل, ورىندىق, شكاف... ءبارى ەسكى. اعامىزعا قۇرقىلتايدىڭ ۇياسىنداي كابينەت بەرىلىپتى. وندا ارىپتەسى تالعات باتىرحان ەكەۋى قىسىلىپ-قىمتىرىلىپ وتىر. قالاي دەگەندە دە بۇلاردىڭ ءبارى قالانىڭ باس گازەتى دەگەن اتقا ساي كەلىپ تۇرعان جوق. بىراق جاكەڭنىڭ جۇزىنەن ول ولقىلىقتارعا رەنجىپ نە كوڭىل كۇيىن جۇدەتىپ وتىرعانى كورىنبەيدى. ونى ءسوز ەتۋگە ۋاقىتى دا, قۇلقى دا جوق سياقتى. ايتاتىنى – جۇمىس. تىلگە تيەك ەتەتىنى – گازەت. اڭگىمەلەيتىنى – باسپاحانا».
سودان ءبىر اپتا وتكەن سوڭ... ءيا, سونداي ۋاقىت ارالىعى شاماسىندا ءبىز «ەگەمەن قازاقستاندا» وزگەرىس بولىپتى دەگەن حابار ەستىدىك. ۇزىنقۇلاقتىڭ ايتۋىنشا ءۋاليحان قاليجانوۆ باسقا جۇمىسقا اۋىسىپتى دا كوپتەن بەرى ءبىرىنشى ورىنباسار بولىپ كەلە جاتقان ەرجۇمان سمايىل باس رەداكتورلىققا تاعايىندالىپتى. ال ەركىن انەۋگۇنى ءبىزدى ىزدەپ, امانداسۋعا كەلگەن ەركىن قىدىر ءبىر ساتى جوعارىلاپ, ەرجۇمان اعامىزدىڭ بۇرىنعى قىزمەتىن اتقاراتىن بولعان. «ە, جارايدى», دەدىك تە قويدىق بۇل جاڭالىققا. ويتكەنى الماتىداعى «ەگەمەن» قايدا, ءبىز قايدا؟.. جان-جاققا بۇرىلىپ قارايتىن شاما جوق. قاربالاس تىرلىك. بىراق سودان كوپ ۇزاماي ماعان دا ءبىر حاباردىڭ كەلىپ جەتكەنى!.. اقپارات جانە قوعامدىق كەلىسىم مينيسترلىگىنىڭ ۇيعارىمىمەن مەن جوعارىداعى گازەت باس رەداكتورىنىڭ ورىنباسارى قىزمەتىن اتقارۋعا باراتىن بولىپپىن.
«مينيسترلىك «اقمولا اقشامى» باسىلىمىنداعى جاساعان جۇمىسىڭىزعا ريزا, – دەدى اتالعان ۆەدومستۆوداعى دەپارتامەنت ديرەكتورى اناتولي گۋرسكي. – قالالىق گازەت ۇلكەن جولعا ءتۇستى. ەندى وندا ءسىز ىستەيتىن ەشتەڭە قالعان جوق. سوندىقتان ەرتەڭنەن باستاپ الماتىداعى «ەگەمەن قازاقستانعا» بەت العانىڭىز دۇرىس». اناتولي ستەپانوۆيچتىڭ مىنا ءسوزىن ەستىگەندە مەنىڭ كوز الدىما وسى جاقىن ۋاقىتتاعى وتە تانىس ءومىر سۋرەتى ەلەس بەرىپ وتكەندەي بولدى. ول اعا گازەت وكىلى ەركىننىڭ «اقمولا اقشامىنا» مەنى ىزدەپ كەلۋى, اڭگىمەلەسىپ, ۇزاق وتىرىپ قايتۋى ەدى. «دەمەك سوندا ول مۇندا تەگىن سوقپاعان ەكەن عوي. مينيسترلىك, رەداكتسيا جۇكتەگەن تاپسىرمامەن تاياۋداعى بولىپ قالۋى مۇمكىن اۋىس-تۇيىسكە كادر ىزدەپ, سونى بارلاپ قايتقان ساپارى-اۋ شاماسى», دەگەن وي كەلگەن سوندا ماعان. بۇل راس تا ەدى. ونىڭ كەيىن بەلگىلى بولعانى بار.
...مىنە, سودان باستاپ مەن ەركىنمەن اعا گازەتتە 18 جىلعا جۋىق جۇمىس ىستەدىم. ەكى ادامنىڭ ءبىر مەكەمەدە بۇلاي ەڭبەك ەتۋى ۇزاق ۋاقىت. ءيا, وتە ۇلكەن مەرزىم. سونداعى ريزا بولاتىنىم – كۇن, اي, جىلدار بويعى قاۋىرت, قات-قابات جۇمىس ۇدەرىسىندە ورتاق ءتىل تابىسىپ, تۇسىنىستىكپەن ەڭبەك ەتكەنىمىز. قۋاناتىنىم – ساناعا سالماق تۇسىرەتىن نەبىر قيىن, كۇردەلى پسيحولوگيالىق ارپالىس ساتتەرىندە دە ء«اي» دەسپەي, ادامگەرشىلىك اتتى التىن ارقاۋدان اجىراماعانىمىز.
...«ەگەمەن قازاقستان» گازەتى اكتسيونەرلىك قوعام بولىپ قۇرىلدى. ونىڭ باسشىلىعىنا ساۋىتبەك ابدراحمانوۆ كەلدى. العاشقى باسقوسۋداعى اڭگىمەدەن اڭعارعانىمىز, الداعى قولعا الاتىن ىستەردىڭ كوپ ەكەنى ەدى. ولار: جارناما ماسەلەسىمەن مىقتاپ اينالىسىپ, ايماقتاردان اقىلى نەگىزدەگى بەتتەردى كوپتەپ ۇيىمداستىرۋ, گازەتتىڭ وتپەلى كەزەڭدەگى تومەن ءتۇسىپ كەتكەن تيراجىن كوتەرىپ, «قازپوشتانىڭ» باسپاحانادان كەيىن قولعا الاتىن تاسىمال شىعىنىن ازايتۋدىڭ جولىن تابۋ. مۇنىڭ سىرتىندا 1958 جىلعى تىڭ يگەرۋ كەزىندە سالىنىپ, سودان بەرى كۇردەلى جوندەۋ كورمەي, اپاتتى جاعدايدا تۇرعان رەداكتسيا عيماراتىن جاڭادان سالۋ جوسپارى دا كەزەك كۇتىپ تۇرعان ماسەلە ەدى. مىنە, وسى جۇمىستاردى باستاۋ, جۇيەلى جۇرگىزىپ, تياناقتى اياقتاۋ ءۇشىن اكتسيونەرلىك قوعامنىڭ پرەزيدەنتى مەن ەكى ورىنباسارى جانە باس رەداكتور اراسىندا ءتارتىپ پەن رەتتىلىككە نەگىزدەلگەن ىنتىماق اتتى ۇعىمنىڭ ءتۇزۋ سىزىعى قاجەت-ءتىن. قۋانىشتىسى, از عانا ۋاقىت ارالىعىندا وعان قول جەتكىزىلىپ, ويلاستىرىلعان جايتتار جۇزەگە اسا باستادى. سونىڭ ناتيجەسىندە گازەت تيراجى ءوستى. ءسوز ەتىلىپ وتىرعان ۋاقىتتاعى جاندانعان جۇمىستار قاتارىنا سونداي-اق جارنامانى دا قوسۋعا بولادى. بۇرىن رەداكتسياعا ونى مۇددەلى مەكەمەلەر عانا اكەلىپ, ءوز ونىمدەرىن ەلگە اقىلى نەگىزدە تانىستىرىپ جاتاتىن. ەندى زاۋىت, فيرمالارعا اگەنت دەپ اتالاتىن گازەت قىزمەتكەرى بارىپ, قوسىمشا قارجىنىڭ جاڭا مۇمكىندىك كوزىن تاپتى. وسىنىڭ ءبارى اكتسيونەرلىك قوعام پرەزيدەنتى مەن ونىڭ ەكى ورىنباسارىنىڭ جانە باس رەداكتوردىڭ تۇسىنىستىككە تولى جۇمىسىنىڭ ناتيجەسى ەدى. وركەنيەتتى ەلدەردە مۇنى تاندەم دەيدى. ءاۋ باستا بۇل تەحنيكا سالاسىنداعى ماشينالار مەحانيزمىنىڭ جۇمىسىنا بايلانىستى ايتىلاتىن بولعان. ونىڭ ءمانى مىنادا. كادىمگى «ك-700» تراكتورى بار ەمەس پە؟ مىنە, سونىڭ ءون بويىن ۇستاپ تۇرار نەگىزگى بەلتەمىر – وزەككە ۇلكەندى-كىشىلى بىرنەشە دەتال ورنالاسقان عوي. موتور وت العاندا ولار بىرىنە ءبىرى دەم بەرە بىرىگىپ وتىرىپ قيمىلدايدى. سويتەدى دە ءبارى كۇش قوسا ۇيلەسىمدى جۇمىس ىرعاعىنا قول جەتكىزەدى. ءبىزدىڭ ءسوز ەتىپ وتىرعان ماسەلەمىزدەگى ۇعىمدا دا ول سولاي. سونداي ماعىناعا يە. تابيعي تىلمەن ايتقاندا, تاندەم – بەلگىلى ءبىر جاعدايعا بايلانىستى ءىستى قولعا العاندا وي, كوزقاراس, ماقساتتىڭ ءبارى ءوزارا ۇيلەسىم تاۋىپ, ء«بىر جاعادان باس, ءبىر جەڭنەن قول شىعارا» وتىرىپ جەتىستىككە جەتۋ.
وسى ارادا وقىرماندار تاراپىنان: «ال سول تابىسقا جەتكىزگەن ورتاق ىستە ماقالانىڭ باسىنان بەرى ءسوز ەتىپ كەلە جاتقان كەيىپكەرىمىز نەندەي ەڭبەگىمەن ەرەكشەلەنىپ, قانداي قارىم-قابىلەتىمەن ۇجىم ەسىندە قالدى؟» دەگەن سۇراق تۋى مۇمكىن. ايتايىق. 2006 جىلى «ەگەمەن قازاقستان» گازەتى ورنالاسقان ەكى قاباتتى عيمارات قابىرعالارى ءۇش-ءتورت جەردەن جارىلىپ, ناعىز اپاتتىق دەڭگەيگە جەتتى. سول كەزدە اكتسيونەرلىك قوعام پرەزيدەنتى ساۋكەڭ, ساۋىتبەك ابدراحمانوۆ اقپارات ءمينيسترى ەرمۇحامەت ەرتىسباەۆتى ەرتىپ اكەلىپ, ورىن العان جاعدايدى كورسەتكەندە, ۆەدومستۆو باسشىسى شوشىپ كەتتى. ءبىر اپتادان سوڭ پارلامەنت مىنبەسىنەن تابىلعان ول ساۋكەڭ ەكەۋى كەزەك-كەزەك سويلەگەندە, دەپۋتاتتاردىڭ مينيستر مەن گازەت باسشىسىنىڭ جاڭا كەڭسە سالۋ جونىندەگى ۇسىنىسىن قولداماۋعا اددىلەرى قالمادى. ءسويتىپ, جىل اياقتالۋعا ءۇش اي قالعاندا بيۋدجەت جوسپارىنا ەندى دە, 2007 جىلى باستالاتىن قۇرىلىستى جۇرگىزۋ اكتسيونەرلىك قوعام پرەزيدەنتىنىڭ ورىنباسارى ەركىن قىدىرعا جۇكتەلدى. مىنە, وسى جەردە ونىڭ بۇرىن جۇرت مۇلدە بايقاماعان بولەك قىرى اشىلدى. بۇل قازىرگى زامانعا اۋاداي قاجەت بەيىمدىلىك – مەنەدجەرلىك قاسيەت ەدى. سونىڭ ارقاسىندا 15-كە جۋىق ۇيىمداستىرۋ جۇمىسى ماقساتكەرشىلىكپەن وتە تەز ءارى وڭتايلى جۇرگىزىلدى. ءسويتىپ, 2007 جىلدىڭ جازىندا باستالعان جۇمىس توقتاۋسىز ءجۇردى دە وتىردى. عيماراتتىڭ ىرگەتاسى قۇيىلىپ, قابىرعالارى قالانىپ, شاتىرى جابىلا باستاعاندا, ونىڭ استىنداعى كەڭ دە بيىك جەرتولەگە ۇلكەندى-كىشىلى قوراپ, جاشىكتەر اكەلىنىپ كىرگىزىلە باستادى. كەيىن بىلسەك, بۇل «ەگەمەن قازاقستاننىڭ» جاڭا كەڭسەسىنە قاجەت ۇستەلدەر مەن ورىندىقتار, ديۆان جانە كومپيۋتەر كەشەندەرى ەكەن. «وفيس دايىن بولعاندا ساتىپ الساق, وندا كەش قالىپ, قىمباتشىلىققا ۇرىنامىز. ول كەزدە باعا ءبىر ورنىندا تۇرماي, ەكى-ءۇش ەسە ءوسىپ كەتۋى مۇمكىن. سوندىقتان قازىر قامتىپ قالعانىمىز دۇرىس», دەپ تۇسىندىرگەنى بار مۇنى سول كەزدە ەركىن.
توعىز قابات ەڭسەلى ءوفيستىڭ نەگىزگى جۇمىستارى ءبىتىپ, وندا تەك ەندى سىرلاۋ مەن ارلەۋ سياقتى ۇساق-تۇيەك تىرلىكتەر قالعاندا, اكتسيونەرلىك قوعام باسشىلىعى الدىنا ەركىن تاراپىنان تاعى ءبىر ۇسىنىستىڭ تۇسكەنى!.. باسىندا بۇعان تۇسىنبەدىك. كەيىن بايقاپ قاراساق, اقىلعا قونىمدى شارۋا. مەملەكەتتىڭ جۇرگىزىلىپ جاتقان قۇرىلىسقا دەپ بولگەن قارجىسىنان ءبىراز اقشا ۇنەمدەلىپ قالعان عوي. «سونى ۇكىمەتكە قايتارماي, وسى عيماراتقا قاتىسى بار دەگەن دالەلدەمەمەن جاپسارلاستىرىپ, شاعىن وتباسىلىق جاتاقحانا سالىپ جىبەرسەك قايتەدى؟ سول كەزدە بىزدەگى تۇرعىن ءۇي ماسەلەسى ايتارلىقتاي شەشىمىن تاۋىپ قالار ەدى», دەدى ول. اكتسيونەرلىك قوعام باسشىسىنىڭ بۇعان ايتقان جاۋابى: «تاۋەكەل!» دەگەن ءبىر اۋىز ءسوز بولدى. سول-اق ەكەن, رەداكتسيا قىزمەتكەرلەرى جاڭا عيماراتتىڭ دايىن بولىپ قالعان استىڭعى قاباتىنا كوشىرىلە باستادى دەيسىز. ال ولار وتىرعان بۇرىنعى ەسكى كەڭسە ءۇيى ءسۇرىلىپ, از عانا مەرزىم ىشىندە ول جەردەن 18 شاعىن وتباسىلىق جاتاقحانا بوي كوتەرىپ شىعا كەلدى.
...2016 جىلعى ناۋرىزدا اكتسيونەرلىك قوعام پرەزيدەنتى ساكەڭ ءماجىلىس دەپۋتاتتىعى سايلاۋىنا تۇسەتىن بولدى. وسىعان بايلانىستى گازەتكە ءبىر اي باسشىلىق ەتۋ ۆيتسە-پرەزيدەنت – باس رەداكتور ماعان جۇكتەلدى. سودان باستاپ رەداكتسيادا كۇبىر-سىبىر اڭگىمە باستالدى دەيسىز. ول: «ساكەڭ دەپۋتاتتىققا وتسە, «ەگەمەنگە» كىم كەلەدى؟» دەگەن ءسوز. مەن وعان ونشا نازار اۋدارعان جوقپىن. بار ويىم: «سايلاۋ وتكەنشە گازەتتەن شي شىقپا-
سا, ۇجىمداعى مورالدىق-پسيحولوگيالىق احۋال قالىپتى بولسا, ءسويتىپ تاپسىرىلعان مىندەتتى ابىرويمەن اياقتاپ, جۇمىستى امان-ەسەن وتكىزىپ بەرسەم», دەگەن ءبىر عانا ماقسات ەدى. سونداي كۇندەردىڭ بىرىندە قابىلداۋ بولمەسىندەگى حاتشى قىزدان الدەبىر نارسەلەردى ىزدەتتىرىپ جاتقان ەركىن: «جوعارى جاق ءسىز ەكەۋمىزدىڭ قۇجاتتارىمىزدى سۇراتىپ جاتىر», دەدى. مىنا حاباردى ەستىگەن مەن وعان: «ول قاعازداردى جىبەرمەي تۇرا تۇر», دەدىم. ءسويتتىم دە بولمەگە كەلىپ, ۇزاق ويلاندىم. ويلانعانىم – ەشنارسەگە قۇلقىمنىڭ جوقتىعى ەدى. ونىڭ سەبەبى, بىرىنشىدەن, سول كەزدە جاسىم 65-كە كەلىپ, زەينەتتەن اسقانتىنمىن. ەگەر جاڭا ورىنعا دەگەن ىڭعايىمدى سەزىپ, بىلگەن جۇرت بولسا: «الپىستان اسسا دا قىزمەتكە تويمايتىن نەتكەن جان بۇل ءوزى؟» دەپ كىنالاماي ما. ەكىنشى, ەسەپتەپ كورسەم گازەت-جۋرنال رەداكتسيالارىندا ءۇزىلىسسىز جۇمىس ىستەگەنىمە 44 جىل بولىپتى. ابدەن قاجىپ-شارشاعانىمدى نەسىنە جاسىرايىن. سونىڭ سالدارىنان دەنساۋلىق تا سىر بەرە باستاعان-تىن. ۇشىنشىدەن, ويلانىپ وتىرىپ, ءوزىمدى ساۋكەڭمەن سالىستىردىم. ول ءوز ۋاقىتىندا ورتالىق كوميتەت, پرەزيدەنت اپپاراتى, ۇكىمەتتە قىزمەت ىستەپ, مينيستر دە بولعان ادام. «ەگەمەننىڭ» ءبىر شارۋاسىمەن جوعارى جاققا بارعاندا, سول جەردەگى الدىنان شىققان كەشەگى قىزمەتكەرلەرى «بەت كورسە, ءجۇز ۇيالادى» دەگەندەي, وتىنىشىنە سەرگەك قاراپ, ءسوزىن جەرگە تاستاماعانىن تالاي كورگەنبىز. ال مەن... «اينالدىرعانىم – الا قاعازدىڭ بەتى», دەپ سۇلتانماحمۇت تورايعىروۆ ايتقانداي, ءومىر بويى كورگەنىم – گازەت, بارعانىم – باسپاحانا. كاسىبي مامان بولعانىممەن, بيلىكپەن ونشا بايلانىسىم جوق. ال ونىڭ ەرتەڭ تيراجدىڭ قۇلاۋىنا, رەداكتسيا قىزمەتكەرلەرى جالاقىسىنىڭ كەشىگۋىنە جانە تاعى باسقا جاعدايلارعا اكەلىپ سوعارى انىق.
وسىلاردى وي ەلەگىنەن وتكىزىپ بولعان سوڭ پرەزيدەنت اپپاراتىنداعى ۇلكەن كۋراتوردىڭ قابىلداۋ بولمەسىنە قوڭىراۋ شالدىم. تەلەفوندى كوتەرگەن پەريزاتتان بۇكىل يدەولوگياعا جاۋاپتى جاس باسشىسىنا قوسۋدى ءوتىندىم. «سالەمەتسىز بە, اعا؟» دەدى ارعى جاقتاعى داۋىس. مەن جوعارىداعى جاعدايدى ايتتىم. «بۇل ءسىزدىڭ سوڭعى شەشىمىڭىز بە؟ – دەدى ول. ء«يا!» «جاقسى. ەسكەرەمىز!». تەلەفونداعى وسى اڭگىمەدەن كەيىن ەركىنگە كىردىم. بولعان جايدان قىسقاشا حاباردار ەتكەن سوڭ: «جوعارى جاققا ءبىر عانا قۇجات جىبەر. ول – سەنىڭ قاعازدارىڭ», دەدىم. كوپ ۇزاماي جاقسى حابار كەلدى. بۇل سايلاۋ ناۋقانىنان ءۇش كۇننەن سوڭ بولعان وقيعا ەدى. ءبىر اپتادان كەيىن ءماجىلىس دەپۋتاتتىعىنىڭ مانداتىن الىپ, ۇجىممەن قوشتاسۋعا كەلگەن ساۋكەڭنىڭ, جينالعاندار الدىندا: ء«تۇۋ, جاكە-اي... ءحانتاڭىرى شىڭىنا شىعۋعا ءبىر ادىم قالعاندا, كەرى بۇرىلعانىڭىز قىزىق بولدى», دەگەنى بار.
...قازىر ەركىن «استانا اقشامىندا» باس رەداكتور بولىپ قىزمەت ىستەپ ءجۇر. جۇمىسى جاقسى. توڭىرەگىنە سىيلى. باياعىداي ەلگەزەك. كىشىپەيىل. جۇرتقا قامقور جان. باسقا ۇجىمدا جۇرسە دە «ەگەمەنقازاقستاندىقتاردىڭ» ۇلكەن-كىشىسى دەگەندە شىعاردا جانى باسقا. ءبىزدىڭ جىرتىسىمىزدى جىرتادى دا جۇرەدى. راحمەت, ارىپتەس ءىنى! ازامات. امان ءجۇر!
جانبولات اۋپباەۆ,
قازاقستاننىڭ ەڭبەك سىڭىرگەن قايراتكەرى
