قاۋلىدا تومەندەگى شەكتەۋ شارالارى ۇسىنىلدى:
– ادام كوپ جينالاتىن ورىنداردا (اۆتوۆوكزالدار, ساۋدا-ويىن-ساۋىق ورتالىقتارى, ساۋدا ۇيلەرى, جابىق بازارلار, كونتسەرت زالدارى, تەاترلار, كينوتەاترلار, حالىققا قىزمەت كورسەتۋ ورتالىقتارى, بانكتەر, ستاديوندار جانە باسقا دا سپورت نىساندارى), ۇيىمداسقان ۇجىمداردا جانە قالالىق قوعامدىق كولىكتە بەتپەردە كيۋ. بەس جاسقا دەيىنگى بالالارعا جانە تاماقتانۋ كەزىندە ماسكا قاجەت ەمەس;
– 10 ادامنان اساتىن جيىنداردى (وتىرىستار) قاشىقتان وتكىزۋ فورماتىنا كوشىرۋ;
– جۇكتى ايەلدەردى, دەنساۋلىعىنا بايلانىستى ۆاكتسينا سالدىرا المايتىن قىزمەتكەرلەردى جانە كوروناۆيرۋس جۇقتىرعان ناۋقاسپەن بايلانىستا بولعان ادامداردى قاشىقتان جۇمىس ىستەۋ فورماتىنا اۋىستىرۋ;
– تۇرعىندارعا كوروناۆيرۋسقا قارسى ۋاقتىلى ۆاكتسيناتسيا جانە رەۆاكتسيناتسيا بويىنشا اقپاراتتىق-ءتۇسىندىرۋ جۇمىستارىن جۇرگىزۋ;
– ءبىلىم بەرۋ ۇيىمدارىندا توپتار مەن سىنىپتاردى بىرىكتىرىپ ءىس-شارالار وتكىزۋدى بولدىرماۋ;
– ادام كوپ جينالاتىن وبەكتىلەردە, سونىڭ ىشىندە قوعامدىق كولىكتە دەزينفەكتسيالاۋ شارالارىن جۇرگىزۋ, جەلدەتۋ جانە اۋانى باپتاۋ جۇيەلەرىنىڭ ۇزدىكسىز جۇمىس ىستەۋى مەن جەلدەتۋ رەجيمىن ساقتاۋ جونىندەگى جۇمىستاردى ۇيىمداستىرۋ;
– نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسىنا حالىق اراسىندا كوروناۆيرۋسقا قارسى ۆاكتسينالاۋ مەن رەۆاكتسيناتسيانى جانداندىرۋ تاپسىرىلدى.
قاۋلى 23 شىلدەدەن باستاپ كۇشىنە ەنەدى.
