ءالي بەكتاەۆ قازاقستان ماڭىزدى تاريحي دامۋ كەزەڭىندە ەكەنىن اتاپ ءوتتى. پرەزيدەنت قاسىم-جومارت توقاەۆتىڭ باستاماسى بويىنشا بارلىق سالادا كەشەندى جانە جۇيەلى وزگەرىستەر جۇرگىزىلۋدە. ەلىمىزدىڭ ساياسي جۇيەسىن ودان ءارى دەموكراتيالاندىرۋ – باستى باعىتتاردىڭ ءبىرى. رەفورمالاردىڭ ءبارى احۋالدىق تۇرعىدا ەمەس, ستراتەگيالىق سيپاتقا يە.
«اگروونەركاسىپتىك كەشەندى دامىتۋ, ورگانيكالىق ءونىم ءوندىرۋ جانە حالىقتى ازىق-ت ۇلىكپەن قامتاماسىز ەتۋ – قازاقستانداعى باسىمدىقتاردىڭ ءبىرى. قازاقستان جاڭارتىلاتىن جانە بالاما ەنەرگيا كوزدەرىنەن وندىرىلەتىن ەلەكتر ەنەرگياسىنىڭ جالپى كولەمىندەگى جاڭارتىلاتىن ەنەرگەتيكا ۇلەسىن تۇتىناتىن بارلىق ەنەرگيانىڭ كەمىندە جارتىسىنا جەتكىزۋگە نيەتتەنىپ وتىر», دەدى سەناتور ءالي بەكتاەۆ.
وفەليا نيك ءوز كەزەگىندە جىلى شىرايلى قابىلداۋ مەن ەلدەر اراسىنداعى ەكىجاقتى ىنتىماقتاستىق ماسەلەلەرىن تالقىلاۋ مۇمكىندىگى ءۇشىن العىسىن ءبىلدىردى.
تاراپتار كەزدەسۋ بارىسىندا ەلىمىزدىڭ سالىق كودەكسىنە قابىلدانعان تۇزەتۋلەردى, ونىڭ ىشىندە ينۆەستيتسيالار كولەمى مەن مەرزىمىنە جانە جۇمىس ورنىنا بايلانىستى ينۆەستورلاردى كورپوراتيۆتىك, تابىس, جەر سالىعىنان جانە قوسىمشا قۇن سالىعىنان 10 جىلعا دەيىنگى مەرزىمگە بوساتۋعا مۇمكىندىك بەرەتىن جايتتاردى تالقىلادى.
