شقو پوليتسيا دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, ءتارتىپ ساقشىلارى زاڭسىز قارۋ-جاراق اينالىمىنا توسقاۋىل قويۋ ماقساتىندا بىرقاتار شارانى قولعا العان. سونىڭ ناتيجەسىندە, جىل باسىنان بەرى 121 اتىس قارۋى تاركىلەندى. ونىڭ ىشىندە 16 ويىق, 82 تەگىس ۇڭعىلى قارۋ, 16 شولاق مىلتىق, 7 تاپانشا, 2 گراناتا جانە 1488 وق-ءدارى بار.
«ماسەلەن, بۇقتىرما سۋ قويماسى جاعالاۋىندا ورنالاسقان دەمالىس بازالارىنىڭ بىرىندە جەدەل-ىزدەستىرۋ شارالارىن جۇرگىزۋ كەزىندە وسكەمەن قالاسىنىڭ 31 جاستاعى تۇرعىنىنان تراۆماتيكالىق تاپانشاعا ۇقساس زات تابىلدى. ساراپتاما كورسەتكەندەي, بۇل 18ح45 مم كاليبرلى «وسا» كەشەنىنىڭ پب-4-1 مل ۇلگىسىندەگى تاپانشاسى. قارۋ جارىق, شۋ جانە جاراقات سالاتىن پاتروندارمەن اتۋ ءۇشىن جارامدى», دەلىنگەن اقپاراتتا.
جاۋاپ الۋ كەزىندە ۇستالعان ازامات قارۋدى وعان ماس كۇيدە بولعان 29 جاستاعى دوسى بەرگەنىن ايتتى. كوپ ۇزاماي پوليتسەيلەر ونى تاپتى. تەكسەرۋ بارىسىندا كۇدىكتىنىڭ بۇرىن بىرنەشە رەت سوتتالعانى انىقتالدى. ول ءوز كىناسىن مويىنداپ وتىر.
اتالعان فاكتى بويىنشا قر قك-ءنىڭ 287-بابى 2-بولىگىنە سايكەس سوتقا دەيىنگى تەرگەۋ امالدارى باستالدى. وسى باپتىڭ سانكتسياسى بويىنشا ەر ادام 2 جىلعا دەيىنگى مەرزىمگە باس بوستاندىعىنان ايىرىلۋى مۇمكىن.
