نەسيەلەۋ «كەڭ دالا», «اگروبيزنەس», «ىسكەر» اتتى ءۇش باعدارلاما بويىنشا جۇرگىزىلەتىنى ءمالىم. العاشقىسى كوكتەمگى ەگىس جانە كۇزگى جيىن-تەرىن جۇمىستارىنا باعىتتالعان. بيىلعى جارتىجىلدىقتا اتالعان باعدارلاما اياسىندا 2,5 مىڭنان استام ديقانعا جالپى سوماسى 70 ملرد تەڭگە ءبولىنىپ, 3,7 ملن گەكتاردان استام ەگىستىك القاپ يگەرىلدى. بۇعان قوسا, 70 ملرد تەڭگە كولەمىندە قوسىمشا قاراجات ءبولۋ تۋرالى شەشىم قابىلدانعانى ەسىمىزدە. كورپوراتسيا شوتقا اقشا تۇسكەنگە دەيىن كوكتەمگى ەگىس جانە كۇزگى جيىن-تەرىن ناۋقانىنا نەسيەنى ءوز قاراجاتىنان بەردى. بۇل ماقساتقا 18,8 ملرد تەڭگەگە تەڭ 609 نەسيە ۇسىنىلدى. كەيىن بۇل نەسيە بيۋدجەت قارجىسىمەن الماستىرىلادى. جالپى, بۇل ماقساتقا رەسپۋبليكالىق بيۋدجەتتەن 140 ملرد تەڭگە ءبولىنىپ وتىر.
كورپوراتسيادا قۇرال-جابدىققا, ونى جاڭارتۋعا, قۇرىلىس-مونتاج جۇمىستارى مەن اينالىم قاراجاتىن تولتىرۋعا ارنالعان امبەباپ «اگروبيزنەس» باعدارلاماسى جۇمىس ىستەيدى. اتالعان باعدارلاما بويىنشا بيىلعى 6 ايدىڭ ىشىندە 2 900 شارۋاعا 98,1 ملرد تەڭگەنىڭ نەسيەسى بەرىلگەن (ونىڭ ىشىندە «كەڭ دالا» باعدارلاماسى بويىنشا كوكتەمگى ەگىس جۇمىستارىنا بولىنگەن قاراجات تا بار). بۇل قارجىعا 19,2 مىڭ ءىرى قارا, 70,5 مىڭ باس ۇساق مال, 34 مىڭ جىلقى جانە 1 766 دانا اگروتەحنيكا مەن قۇرال-جابدىق ساتىپ الىنعان.
ءىسىن جاڭادان باستاۋشى كاسىپكەرلەردى, ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ىسكەر» باعدارلاماسى اياسىندا 861 جوبانى جۇزەگە اسىرۋعا 5,6 ملرد تەڭگە ءبولىنىپتى.
– مەملەكەت باسشىسى بيىلعى جولداۋىندا الداعى ءۇش جىلدا ازىق-ت ۇلىك قاۋىپسىزدىگى ماسەلەسى تۇبەگەيلى شەشۋدى جانە كوكتەمگى ەگىس ناۋقانىن قاتاڭ باقىلاۋدا ۇستاۋدى تاپسىرعان ەدى. ءبىز بۇل باعىتتا تالماي ەڭبەك ەتىپ كەلەمىز. 2022 جىلى «كەڭ دالا» باعدارلاماسى بويىنشا كوكتەمگى ەگىس پەن كۇزگى جيىن-تەرىنگە 88,8 ملرد تەڭگە بولىنگەن. بىلتىرعى جىلمەن سالىستىرعاندا بيىل قارجىلاندىرۋ سوماسى ەكى ەسە ءوستى, – دەيدى «اگرارلىق نەسيە كورپوراتسياسى» اق باسقارما توراعاسى المات اشىربەكوۆ.
قارىز الۋشى كورپوراتسيانىڭ ايماقتىق فيليالدارىنا نەمەسە ورتالىق اپپاراتتاعى مەنەدجەرلەردىڭ كەڭەسىنە جۇگىنۋى كەرەك. ەگەر كليەنت نەسيە الۋعا شەشىم قابىلداسا, نەسيە مەنەدجەرى قاجەتتى قۇجاتتار ءتىزىمىن جيناپ, ءوتىنىش قابىلدايدى. نەسيە الۋعا ءوتىنىمدى قابىلداۋ مەرزىمى – 30 كۇن.
نەسيە مال شارۋاشىلىعىنا, ەگىنشىلىكتى دامىتۋعا, اۋىل شارۋاشىلىعى ونىمدەرىن قايتا وڭدەۋ جوبالارىنا بەرىلەدى. نەسيەلەۋدىڭ ءبىر باعىتى – تاۋارلى-ءسۇت فەرماسىن قۇرۋ جانە جاڭعىرتۋ. ماسەلەن, شىعىس قازاقستان وبلىسى شەمونايحا اۋدانىنداعى «رۋليحا» جشس ءداندى داقىلمەن بىرگە, ءىرى قارا مالىن وسىرۋگە باسىمدىق بەرىپ وتىر. 2004 جىلى قۇرىلعان قوجالىق مالدى جىل ون ەكى اي بويى ۇستايتىن بىرەگەي كەشەن سانالادى. 2017 جىلى تاۋارلى-ءسۇت فەرماسىن قايتا قۇرۋدى باستادى. اگرارلىق نەسيە كورپوراتسياسىنىڭ قارجىسىنا تاۋارلى-ءسۇت فەرماسىنا قاجەتتى قوندىرعىلار مەن گولشتينو-فريز تۇقىمدى سيىر ساتىپ العان. بۇگىندە ءسۇتتى باعىتتاعى ءىرى قارا سانى 600-گە جەتتى, فەرما يەسى مال باسىن 1 800-گە دەيىن كوبەيتۋدى جوسپارلاپ وتىر. بۇل نىساننىڭ جوبالىق قۋاتى – جىلىنا 3 600 توننا ءسۇت ءوندىرۋ.
ءىرى جوبالارمەن قاتار, كورپوراتسيا شاعىن جانە ورتا بيزنەسكە دە نەسيە بەرەدى. مىسالى, قاراعاندى وبلىسى بۇقار جىراۋ اۋدانى ۇشتوبە اۋىلىنداعى «Úshtóbe Qus» جشس اينالىم قاراجاتىن تولتىرۋعا قارجى العان. 2021 جىلى اشىلعان كاسىپورىن كۇنىنە 7 مىڭ برويلەر سويادى. ازىرگە جەرگىلىكتى نارىققا سالقىنداتىلعان قۇس ەتىن شىعارىپ وتىر.
سول سەكىلدى اتىراۋلىق بايعالي ساقىپ كورپوراتسيا قارجىسىنا اۋدانى 600 شارشى مەتر شاعىن جىلىجاي سالۋعا ارنالعان قۇرال-جابدىقتى جانە تامشىلاتىپ سۋارۋ جۇيەسىن ساتىپ الدى. بۇگىندە «اقنيەت» جەكە كاسىپكەرلىگى قالا تۇرعىندارىن قيارمەن قامتاماسىز ەتۋدە.
– جالپى, تىكەلەي نەسيە بەرۋ ارقىلى ىسكە اسىرىلاتىن نەسيەلەۋ باعدارلامالارى شەڭبەرىندە 57,9 ملرد تەڭگە, قارجى ينستيتۋتتارىن قورلاندىرۋ ارقىلى (نەسيە سەرىكتەستىكتەرى, شاعىن قارجى ۇيىمدارى, ەكىنشى دەڭگەيلى بانكتەر مەن ليزينگتىك كومپانيالار) 124,6 ملرد تەڭگە بەرىلدى. 2022 جىلدىڭ العاشقى جارتى جىلىندا ەڭ كوپ نەسيە العان وڭىرلەر – اقمولا (36 ملرد تەڭگە), قوستاناي (31,2 ملرد تەڭگە) جانە سولتۇستىك قازاقستان (25,3 ملرد تەڭگە) وبلىستارى, – دەيدى ا.اشىربەكوۆ.
سونىمەن قاتار 2020 جىلعى جەلتوقسان ايىنان باستاپ كورپوراتسيا اوك سالاسىندا اگروساقتاندىرۋ بويىنشا اگەنتتىك قىزمەتتى اتقارۋدا. سوڭعى 3 جىلدا اگروساقتاندىرۋعا دەگەن قىزىعۋشىلىق ارتقان. ماسەلەن, 2020 جىلى 93 كەلىسىم جاسالسا, بيىلعى جارتى جىلدا 184 ساقتاندىرۋ كەلىسىمىنە قول قويىلدى. وسىلايشا, نەبارى 6 ايدا 308 مىڭ گەكتار القاپ پەن 60 مىڭنان استام ءتورت ت ۇلىك ساقتاندىرىلدى. ءارى بيىلعى جارتى جىلدا تولەنگەن سۋبسيديا كولەمى 500 ملن تەڭگەدەن استى. بۇل ءۇشىن ەشقايدا بارۋدىڭ قاجەتى جوق, ساقتاندىرۋ شارتىن Qoldau.kz پلاتفورماسى ارقىلى ونلاين جاساۋعا بولادى.
