قالالىق ارحيۆ پەن «استانا» حالىقارالىق ۋنيۆەرسيتەتىنىڭ اراسىندا جاسالعان كەلىسىم نەگىزىندە تاريح فاكۋلتەتىنىڭ ستۋدەنتتەرى وقۋ وندىرىستىك تاجىريبەدەن ءوتىپ ءجۇر. Cتۋدەنتتەر تاجىريبە الۋ بارىسىندا ارحيۆ جۇمىسىمەن تولىقتاي تانىسىپ, جاڭا رەستاۆراتسيا قۇرىلعىلارىمەن قالاي جۇمىس ىستەۋ كەرەكتىگىن ۇيرەندى. سونداي-اق قۇجاتتاردى ساقتاۋ جانە پايدالانۋ بويىنشا ماعلۇمات الدى.
اتاپ ايتقاندا, مەملەكەتتىك ساقتاۋعا الىنعان قۇجاتتاردىڭ جاي-كۇيىن تەكسەرۋ, ورنالاسۋ ءتارتىبى, سۇرانىسقا يە قۇجاتتاردى بەرۋ, تسيفرلاندىرۋ مەن قايتا قالپىنا كەلتىرۋ جۇمىستارى بويىنشا تاجىريبەلى ماماندار ءدارىس وقىپ, شەبەرلىك ساباقتارىن وتكىزدى. مەكەمە ديرەكتورى مەيرام بەكتەمباەۆ بۇل يىگىلىكتى ءىس ارحيۆ سالاسىنا جاستاردىڭ قىزىعۋشىلىعىن وياتاتىنىنا سەنىمدى.
«مۇراعات قىزمەتكەرلەرىنىڭ اتقارار شارۋاسى وڭاي ەمەس. قۇجاتتاردى قايتا قالپىنا كەلتىرۋ ءۇشىن كوپتەگەن مامانعا ءزارۋمىز. بۇل ماسەلەنى شەشۋ ءۇشىن بىلىكتى ستۋدەنتتەردى وسى سالاعا تارتۋ قاجەت. شەجىرەلى دەرەكتەرمەن جۇمىس ىستەۋ شىعارماشىلىقپەن اينالىساتىن ادامدارعا شابىت بەرەدى. قارت تاريحتىڭ قازىناسىنا جولىعاسىز. بۇل رۋحاني ءوسۋدىڭ كەپىلى. جاس مامانداردى دايارلاۋ ارقىلى ارحيۆ سالاسى ىلگەرلەيتىنى انىق», دەيدى م.بەكتەمباەۆ.
ستۋدەنتتەر تاجىريبە بارىسىندا ارحيۆ سالالارىن قامتيتىن بىرنەشە بولىمگە ءبولىندى. بولاشاق جاس ماماندار بەرىلگەن جۇمىسقا بەلسەندى قاتىسىپ, ارحيۆ قۇجاتتارىمەن جۇمىس ىستەۋگە مۇمكىندىك الدى. تاجىريبە الۋشىلار ارحيۆ قىزمەتكەرلەرىنە قۇجاتتاردى ساقتاۋ جانە پايدالانۋ اسپەكتىلەرى بويىنشا سۇراقتار قويىپ, ءتۇرلى ماعلۇماتقا قانىقتى.
بۇل تاجىريبە ستۋدەنتتەردىڭ ءوز بىلىكتىلىگىن ارتتىرۋعا, جاڭا تەحنولوگيالار مەن ارحيۆ جۇمىسىنداعى زاماناۋي ادىستەرمەن تانىسۋعا باعىتتالدى.
