23 ماۋسىمدا وليمپيادالىق قوزعالىستى ناسيحاتتاۋ جانە بۇكىل الەمدە سپورتتى تانىمال ەتۋ ماقساتىندا حالىقارالىق وليمپيادا كۇنى اتالىپ وتەدى.
قازاقستان ۇلتتىق وليمپيادالىق كوميتەتى الەمدە ءوتىپ جاتقان اكتسيانىڭ بەلسەندى قاتىسۋشىسى. ايتۋلى داتا ەلىمىزدە وسىمەن 29-شى رەت مەرەكەلەنىپ وتىر. بۇل جولى حالىقارالىق وليمپيادا كۇنى قازاقستان پرەزيدەنتى قاسىم-جومارت توقاەۆ جاريالاعان بالالار جىلى اياسىندا اتالىپ ءوتتى.
ەلوردا تۇرعىندارى مەن قوناقتارى ەستافەتالىق جارىستارعا قاتىسىپ, ۇستەل تەننيسىن ويناپ, 3ح3 باسكەتبول, تەكبول سياقتى جاڭا سپورت تۇرلەرىنەن باقتارىن سىناپ, قازاقستاندىق برەيك-دانسشىلاردىڭ ونەرىن تاماشالادى. سونداي-اق, ءارتۇرلى جاستاعى بالالار اراسىنداعى دزيۋدو مەن تاەكۆوندودان كورسەتىلىم جەكپە-جەكتەرى ۇيىمداستىرىلدى.
جاس قاتىسۋشىلار ءۇشىن شەبەرلىك ساباقتارىن ۇلتتىق قۇراما مۇشەلەرى مەن قازاقستاننىڭ اتاقتى سپورتشىلارى 2012 جىلعى لوندون وليمپياداسىنىڭ چەمپيونى, بوكسشى سەرىك ساپيەۆ, ايەلدەر كۇرەسىنەن ءۇش دۇركىن وليمپيادا جۇلدەگەرى گۇزەل مانيۋروۆا, 2022 جىلعى بەيجىڭ وليمپياداسىندا قازاقستان قۇراماسىنىڭ كاپيتانى, شورت-ترەكشى ابزال اجعاليەۆ, بوكستان 2016 جىلعى وليمپيادانىڭ كۇمىس جۇلدەگەرى ۆاسيلي لەۆيت, بوكستان الەم جانە ازيا چەمپيونى مەرەي اقشالوۆ, بوكسشى ءارى وليمپيادا جەڭىمپازى قانات ءابۋتالىپوۆ جانە كۇرەستەن 2022 جىلعى ازيا چەمپيونى ءمادينا باقبەرگەنوۆا وتكىزدى.
«ۇلتتىق وليمپيادالىق كوميتەتى بارشاڭىزدى حالىقارالىق وليمپيادا كۇنىمەن قۇتتىقتايدى! بۇل جولى ءبىز بۇل مەرەكەنى بارىنشا قىزىقتى ءارى ەستە قالارلىقتاي ەتىپ وتكىزۋگە تىرىستىق. اسىرەسە ءبىزدىڭ جاس سپورتشىلارىمىز ءۇشىن قىزىقتى بولدى دەپ ويلايمىن. بالالاردىڭ وليمپيادالىق سپورت تۇرلەرىنە دەگەن قىزىعۋشىلىقتارى ارتىپ, قازاقستاندىق چەمپيوندارمەن كەزدەسكىسى كەلەتىنىن كورگەندە ەرەكشە اسەردە بولاسىڭ. جالىنداعان جاستارمەن كەز كەلگەن شاراعا قاتىسىپ, بولاشاق چەمپيوندارمەن ارقاشان بىرگە بولىپ, ورتاسىنان تابىلعانىما قۋانىشتىمىن. قازاقستاننىڭ جاس سپورتشىلارى بىزدەن كۇشتى جانە مىقتى بولۋى ءۇشىن ءبارىن ىستەۋىمىز كەرەك دەپ ويلايمىن», دەدى سەرىك ساپيەۆ.
جاس سپورتشىلار وليمپيادالىق سپورت تۇرلەرى تاقىرىبىنداعى ۆيكتوريناعا, سونداي-اق «كوڭىلدى ستارتتار» ەستافەتاسىنا قاتىستى. بارلىعى دەرلىك سپورتتا ءوز ءبىلىمى مەن شەبەرلىگىن كورسەتىپ, قر ۇلتتىق وليمپيادالىق كوميتەتىنىڭ باعالى سىيلىقتارىن ۇتىپ الدى.
مەرەكەلىك باعدارلاما سوڭىندا جاقىندا فرانتسيادا وتكەن مەكتەپ وقۋشىلارى اراسىنداعى دۇنيەجۇزىلىك گيمنازيادانىڭ جەڭىمپازدارى مەن جۇلدەگەرلەرى ماراپاتتالدى. قاتىسۋشىلارعا ەستەلىك سىيلىقتار مەن قر ۇوك ديپلومدارىن قازاقستاندىق وليمپيادا چەمپيوندارى مەن جۇلدەگەرلەرى سالتاناتتى تۇردە تابىس ەتتى.
سپورت مەرەكەسىن ۇيىمداستىرۋعا قر ۇوك سەرىكتەستەرى نۇر-سۇلتان قالاسىنىڭ اكىمدىگى مەن ۇلتتىق سپورتتىق فەدەراتسيالارى اتسالىستى.
سونداي-اق, 2022 جىلعى وليمپيادا كۇنىن ۇيىمداستىرۋدا قازاقستاننىڭ ۇوك سەرىكتەستەرى تۋريزم جانە سپورت سالاسىن قولداۋ قورى «Sport Qory» مەن Toyota Motors ەڭ بەلسەندى قاتىسۋشىلاردى ارنايى سىيلىقتارمەن ماراپاتتادى.
