جول اكتيۆتەرىنىڭ ۇلتتىق ساپا ورتالىعى وبلىستىق فيليالىنىڭ مالىمدەۋىنشە, پاۆلودار اۋدانىنداعى شاقات اۋىلىندا ىشكى جولدارعا ورتاشا جوندەۋ جۇمىستارى جۇرگىزىللگەن. مەردىگەر بۇرىن اسفالت بولماعان م.مامەتوۆا, مەحانيزاتور, بەيبىتشىلىك, ابدىكوۆ كوشەلەرىنە اسفالت توسەگەن.
جۇمىس ساپاسىن باقىلاۋدى ورتالىق فيليالىنىڭ قىزمەتكەرلەرى جۇزەگە اسىردى.
«ساراپشىلار جول جابىندىسىنىڭ ساپاسىن تەكسەرۋ ءۇشىن 14 سىناما الدى. زەرتحانالىق ساراپتاما ناتيجەلەرى بويىنشا 6 سىناما اسفالت قالىڭدىعى, تىعىزدىق كوەففيتسيەنتى جانە سۋعا قانىققاندىعى بويىنشا ستاندارتتارعا سايكەس كەلمەيدى. ورەسكەل ەرەجە بۇزۋشىلىققا جول بەرىلگەن جانە مىندەتتى تۇردە تۇزەتۋدى تالاپ ەتەدى», دەپ ءتۇسىندىردى ساپا ورتالىعىنىڭ ينجەنەرى مارات ۆاليەۆ.
مەردىگەرگە انىقتالعان اقاۋلاردى جويىپ, ءبىر شاقىرىمعا جۋىق جولدى قايتا اسفالتتاۋ تاپسىرىلدى.
ايتا كەتسەك, «اۋىل – ەل بەسىگى» ارنايى جوباسى اياسىندا شاقات اۋىلىنىڭ كوشەلەرىنە اسفالت توسەۋگە 100 ميلليون تەڭگەگە جۋىق قاراجات بولىنگەن. قازىرگى ۋاقىتتا جۇمىس 80 پايىزعا ورىندالدى. تاعى 4 كوشەدە جوندەۋ جۇمىستارى اياقتالۋى ءتيىس.
