– مۇنداي الەۋمەتتىك جوبالار ءبىزدىڭ مەكتەبىمىزدىڭ ماڭىزدى جۇمىس باعىتىنىڭ ءبىرى. وقۋشىلاردىڭ بەلسەندى ومىرلىك ۇستانىمى بار, ولار ءوز ايماعىنىڭ تىرشىلىگى مەن ماسەلەلەرىن بىلەدى. وتانسۇيگىشتىك, جالپىادامزاتتىق قۇندىلىقتارعا دەگەن ادالدىق ءار ساباقتا بويلارىنا ءسىڭىرىلىپ, جالپى جان-جاقتى دامىعان تۇلعانى قالىپتاستىرادى, – دەيدى مەكتەپتەگى
الەۋمەتتىك جوبالاردىڭ ۇيلەستىرۋشىسى جانار ورازباەۆا.
ايتپاقشى, «اينالايىن» بالالار ءۇيى, وڭالتۋ ورتالىعى, ناشار ەستيتىن جانە ساڭىراۋ بالالارعا ارنالعان مەكتەپ-ينتەرناتى, م.مامەتوۆا اتىنداعى اۋىلدىق مەكتەپ, «انالار ءۇيى», «ارداگەرلەر ءۇيى», «بىرگەمىز ءبىلىم» ەرىكتىلەر ۇيىمىمەن تىزە قوسىپ جۇمىس ىستەۋ نازارباەۆ زياتكەرلىك مەكتەبى وقۋشىلارىنىڭ داستۇرىنە اينالعان ەكەن.
– وقۋشىلارىمىزعا كەلگەن كەزدە ءبىز ماتەماتيكا, اعىلشىن جانە قازاق تىلدەرىن ۇيرەنۋ ساباقتارىن وتكىزەمىز, تانىمدىق سايىستار, ۆيكتورينالار, اشىق اۋادا ويىندار ۇيىمداستىرامىز. وسىنىڭ ءبارى ماعان ۇلكەن قۋانىش سىيلايدى, ەڭ باستىسى, مەن ءوز مەملەكەتىمنىڭ ازاماتى ەكەنىمدى جانە ءومىر بويى قوعامعا ءوز ۇلەسىمدى قوسۋىم كەرەك ەكەنىن تۇسىنەمىن, وقۋشى رەتىندە جاۋاپكەرشىلىكتى سەزىنەمىن, – دەيدى 10-سىنىپ وقۋشىسى ايعانىم تىنىسحان.
ال جاقىندا بايلانىس جانە اقپارات قىزمەتكەرلەرى كۇنى قارساڭىندا مەديا-مارافون ۇيىمداستىرىلدى. بۇل ءىس-شارادا جاس ەرىكتىلەردىڭ جۇمىسىن جەتىسۋ ءوڭىرىنىڭ باق وكىلدەرى تاماشالادى. مەديا-مارافون ءۇيسىز قالعان جانۋارلارعا ارنالعان ۇيشىك سالۋ شەبەرلىك ساعاتىنان باستالدى. ودان ءارى ەرىكتىلەردىڭ جۇمىسى تالدىقورعانداعى «اينالايىن» بالالار ءۇيىنىڭ جازعى لاگەرىنە جانە وبلىستىق مامانداندىرىلعان «بالالار ۇيىنە» ساپارمەن جالعاستى. مۇنان كەيىن مەديا-مارافون دوڭگەلەك ۇستەل فورماتىندا جالعاسىپ, ىنتىماقتاستىق جوبالارى تالقىلاندى. ءوز كەزەگىندە مەكتەپ ديرەكتورى ۆيكتور سوسين رەسپۋبليكالىق جانە وبلىستىق باق جۋرناليستەرىنە بەلسەندى جانە جەمىستى جۇمىستارى ءۇشىن العىسىن ءبىلدىردى.
– بارشا باق وكىلدەرىن كاسىبي مەرەكەلەرىمەن قۇتتىقتايمىن. سىزدەردىڭ ەڭبەكتەرىڭىزدىڭ ارقاسىندا ءبىز ەلىمىزدەگى ەڭ وزەكتى دە ماڭىزدى وقيعالاردان حاباردار بولىپ, قۋانىشتى دا, قايعىلى دا وقيعالاردى باستان كەشىرىپ جاتىرمىز. بۇگىن مەكتەبىمىزدىڭ ماڭىزدى باعىتتارىنىڭ ءبىرى قوعامدىق قىزمەت ەتۋ جوبالارىمەن تانىسا العاندارىڭىزعا قۋانىشتىمىن. ويتكەنى قىزمەت ەتۋ – كۇندەلىكتى ورىندايتىن ايرىقشا ميسسيا, – دەدى مەكتەپ ديرەكتورى ۆيكتور سوسين ءوز سوزىندە.
جەتىسۋ وبلىسى
