«قازاقستان ۇكىمەتىنىڭ شەشىمىمەن «قازترانسگاز» «سامۇرىق-قازىنا» اق قۇرامىنا كىرىپ, «ۇلتتىق كومپانيا» مارتەبەسىنە يە بولىپ, پورتفەلدىك كومپانياسىنا اينالدى, سونداي-اق «QazaqGaz» دەپ اتالدى.
كومپانيا «جاڭارعان QazaqGaz» كوزقاراسىن قالىپتاستىرىپ, جۇمىستىڭ بارلىق سالالارىندا تولىق كولەمدە جاڭارتۋدى باستادى. مەملەكەت باسشىسىنىڭ تولىق اۋديت ۇيىمداستىرۋ جانە كومپانيا قىزمەتىندە ترانسپارەنتتىلىكتى قامتاماسىز ەتۋ تۋرالى تاپسىرمالارىنا سايكەس, ناقتى جۇمىس جۇرگىزىلىپ جاتىر. قازىر 937 ملرد تەڭگەدەن استام سوماعا دەلدالدىق سحەمالار مەن قارجىلىق زاڭ بۇزۋ دەرەكتەرى تابىلدى. ونىڭ ىشىنەن 123 ملرد تەڭگەسىنە قاتىستى قارجىلىق زاڭ بۇزۋ جاعدايلارى دالەلدەندى. بارلىعىن اشىق ايتۋعا دايىنبىز. پروبلەما كوپ, شەشۋگە تىرىسىپ جاتىرمىز», دەدى س. جاركەشوۆ ماجىلىستەگى ۇكىمەت ساعاتىندا.
ونىڭ ايتۋىنشا, كومپانيانىڭ بارلىق ستراتەگيالىق جوبالارى بويىنشا جوبالىق-سمەتالىق قۇجاتتامالار ازىرلەندى.
«گازبەن جابدىقتاۋ نارىعىنىڭ بارلىق قاتىسۋشىلارىنىڭ كۇشىن بىرىكتىرۋگە, سەنىمدى سەرىكتەس قالىپتاستىرۋعا باعىتتالعان QazaqGaz دامۋ ستراتەگياسىن ازىرلەۋ بويىنشا جۇمىس جۇرگىزىلىپ جاتىر», دەدى باسقارما توراعاسى.