الماتىدا 231 مىڭنان استام زەينەتكەردىڭ زەينەتاقىسى ءوستى

بۇل تۋرالى «ازاماتتارعا ارنالعان ۇكىمەت» مەملەكەتتىك كورپوراتسياسى» كە اق-نىڭ الماتى قالاسى بويىنشا فيليالى ءمالىم ەتتى.

«ازاماتتارعا ارنالعان ۇكىمەت» مەملەكەتتىك كورپوراتسياسى» كە اق-نىڭ الماتى قالاسى بويىنشا فيليالىنىڭ مالىمەتىنە سايكەس،1 ساۋىردەن باستاپ: ايلىق ەسەپتىك كورسەتكىش – 3180 تەڭگە (3063 تەڭگە 01.01.2022ج. باستاپ)، ەڭ تومەنگى زەينەتاقى – 48032 تەڭگە (46302)، بازالىق زەينەتاقىنىڭ ەڭ تومەنگى مولشەرى – 20 191 تەڭگە (19450)، ەڭ تومەنگى كۇنكورىس دەڭگەيى – 37 389 تەڭگە (36018)، ەڭ تومەنگى جالاقى – 60000 تەڭگە (60000) بولدى.

مۇگەدەكتىگى بويىنشا، اسىراۋشىسىنان ايىرىلۋى بويىنشا مەملەكەتتىك الەۋمەتتىك جاردەماقىلار دا ءوستى. مىسالى، ءى توپتاعى مۇگەدەككە بەرىلەتىن جاردەماقى 69 155-تەن 71 787 تەڭگەگە ءوستى. جاڭا تۋعان بالاعا بەرىلەتىن بىرجولعى جاردەماقى 116 394 تەڭگەدەن 120 840-قا ءوستى. ءتورتىنشى بالاعا 192 969-دان 200 340 تەڭگە بولدى سونداي-اق 1 ساۋىردەن باستاپ، وسىعان دەيىن تاعايىندالعان جاسىنا بايلانىستى جانە ەڭبەك سىڭىرگەن جىلدارى ءۇشىن زەينەتاقى تولەمى 4%-عا ارتتى.

ونىڭ مولشەرىن ەسەپتەۋ ءۇشىن ەسكەرىلەتىن ەڭ جوعارى تابىس 46 ەسەلەنگەن اەك-تەن اسپاۋى كەرەك. ياعني، 146 280 تەڭگە. 2022 جىلى 1 قاڭتاردا بۇل كورسەتكىش 140 898 تەڭگەنى قۇرادى.

«ازاماتتارعا ارنالعان ۇكىمەت» مەملەكەتتىك كورپوراتسياسى» كە اق-نىڭ الماتى قالاسى بويىنشا فيليالى ديرەكتورىنىڭ ورىنباسارى فاريدا بوكيجانوۆانىڭ ايتۋىنشا، الماتىدا 231 740 زەينەتكەردىڭ زەينەتاقىسى وسكەن.

«مۇگەدەكتىگى بويىنشا 37 660 جانە اسىراۋشىسىنان ايرىلعان 12 571 ادامنىڭ جاردەماقىسى ارتقان. جالپى بۇگىنگى كۇنى الماتى قالاسىندا ارنايى مەملەكەتتىك جاردەماقى الۋشىلار – 28 677، كوپبالالى وتباسىلار – 26 761، كوپبالالى انالار، القامەن ماراپاتتالعاندار – 4 982، ءبىر جاسقا دەيىنگى كۇتىم بويىنشا جاردەماقى الۋشىلار – 3 153-ءتى قۇرايدى»، دەدى ول.

سونداي-اق ول مەملەكەتتىك كورپوراتسيامەن كورسەتىلەتىن 44 مەملەكەتتىك قىزمەت تۇرىنە ەلەكتروندى تۇردە ونلاين ءوتىنىش بەرۋگە بولاتىنىن، ول ءۇشىن قىزمەت الۋشىلاردىڭ ۇيالى تەلەفون نومىرلەرى مىندەتتى تۇردە ءموبيلدى ازاماتتار بازاسىنا (ماب) تىركەلۋى كەرەك ەكەنىن جەتكىزدى.