«مەرزىمدى اسكەري قىزمەتىن وتەپ جۇرگەندەردىڭ ءبىلىم الۋعا مۇمكىندىكتەرى اسا كوپ ەمەس. سول سەبەپتى ولار ءۇشىن جاپپاي ونلاين كۋرستار اشۋدى جوسپارلاپ وتىرمىز. سونداي-اق ساربازداردىڭ وقۋ ناتيجەلەرىن قايتا تەكسەرۋگە جانە قىسقا مەرزىمدى كۋرستاردان ءوتىپ, بىلىكتىلىك ەمتيحانىن تاپسىرىپ, ولارعا جۇمىسشى ماماندىعىن العانى تۋرالى ديپلوم بەرۋگە دايىنبىز», دەپ جازدى ءبىلىم ءمينيسترى ءوزىنىڭ Facebook پاراقشاسىنا.
تاعى ءبىر ماڭىزدى باستاما – كەيبىر اسكەري بولىمدەردە كوللەدجدەر اشۋ. وسى ماسەلە بويىنشا تالداۋ جۇرگىزىلىپ, ناقتى شەشىم قابىلدانادى.
«ۋنيۆەرسيتەتتەردەگى اسكەري كافەدرالاردى وڭتايلاندىرىپ, قايتا قاراۋدى ۇسىنامىز. ءبىزدى ولاردىڭ جۇمىسىنىڭ ساپاسى مەن سىبايلاس جەمقورلىق تاۋەكەلدەرى الاڭداتادى. ستۋدەنتتەرگە ناشار ءبىلىم بەرىپ, ساپانى كوتەرۋدى ويلامايتىن اسكەري كافەدرالاردى جابۋ قاجەت دەپ سانايمىز. سونداي-اق اسكەري كافەدرالاردىڭ بارلىق قىزمەتكەرىن قايتا اتتەستاتسيادان وتكىزۋ كەرەك. وقۋعا قابىلداۋدىڭ ناقتى, اشىق جانە شىنايى ەرەجەلەرىن قابىلداعان دۇرىس. سونىمەن بىرگە مەملەكەتتىك تاپسىرىستىڭ قۇنىن ارتتىرۋ قاجەت», دەيدى ا. ايماعامبەتوۆ.
ايانا توعانبەك
