تۇزەتۋلەردى قاراپايىم تىلمەن جەتكىزۋ قاجەت

«سەناتورلار كونستيتۋتسياعا ۇسىنىلىپ وتىرعان وزگەرىستەردىڭ ءمانىن ءتۇسىندىرۋ ءۇشىن ازاماتتارمەن كەزدەسۋدە قۇرالدار مەن الاڭداردىڭ ءبارىن پايدالانۋى ءتيىس. دەپۋتاتتار وتكەن اپتادا وڭىرلەرگە شىعىپ, بىرقاتار كەزدەسۋلەر وتكىزدى. بۇل جۇمىستى جال­عاستىرۋ كەرەك. نەگىزگى زاڭعا ەنگى­زىلگەن وزگەرىستەر ەلىمىزدىڭ ءاربىر ازاماتىنا قاتىستى. سون­دىق­تان حالىقپەن كەزدەسۋلەردە جۇرگى­زىلىپ جاتقان رەفورمالار مەن كونستيتۋتسياعا ۇسىنىلىپ وتىر­عان وزگەرىستەر تۋرالى قاراپايىم ءارى تۇسىنىكتى تىلدە ايتۋ, سونداي-اق بەي-بەرەكەتتىك پەن ءبىر سارىندىلىققا سالىنباي مازمۇندى ءارى اقپاراتتىق كەزدەسۋلەر وتكىزۋ ماڭىزدى»,  دەدى ماۋلەن اشىمباەۆ.

وتىرىسقا قاتىسۋشىلار پالا­تانىڭ 2022 جىلعى 19 مامىرعا جوسپارلانعان وتىرىسىنىڭ كۇن ءتارتىبىن بەكىتتى.

دەپۋتاتتار پالاتا وتىرىسىندا «قازاقستان رەسپۋب­لي­كا­سىنىڭ ۇكىمەتى مەن قىتاي حا­لىق رەسپۋبليكاسىنىڭ ۇكى­مەتى اراسىنداعى يادرولىق ماتەريالداردى, راديواكتيۆتى ما­تەريالداردى, راديواكتيۆتى قال­دىقتاردى جانە رادياتسيالىق-قاۋىپتى زاتتاردى زاڭسىز وتكىزۋدى بولعىزباۋداعى ءوزارا ءىس-قيمىل جونىندەگى كەلىسىمدى راتيفيكاتسيالاۋ تۋرالى» جانە «1992 جىلعى 13 ناۋرىزداعى سالىق ساياساتىنىڭ كەلىسىلگەن پرينتسيپتەرى تۋرالى تاۋەلسىز مەملەكەتتەر دوس­تاس­تىعىنا قاتىسۋشى مەملەكەتتەر ۇكىمەتتەرى اراسىنداعى كەلىسىمنىڭ قولدانىسىن توقتاتۋ تۋرالى حاتتامانى راتيفيكاتسيالاۋ تۋرالى» زاڭ جوبالارىن قاراۋدى جوسپارلاپ وتىر.

بيۋرو مۇشەلەرى ءماجىلىس ماقۇلداعان زاڭ جوبالارى­مەن ودان ءارى جۇمىستى جالعاستىرۋ ءۇشىن سەناتتىڭ تۇراقتى كوميتەتتەرى اراسىندا ءبولىپ بەردى.