قۇجات قابىلداۋ باستالعاننان بەرى ۇبت-عا 130 مىڭنان اسا تالاپكەر تىركەلگەن. وتىنىشتەردى قابىلداۋ 14 مامىرعا دەيىن جالعاسادى. ۇبت تاپسىرۋ 16 مامىر مەن 5 شىلدە ارالىعىندا وتەدى.
«بيىل تالاپكەرلەر نەگىزگى ۇبت-نى ەكى رەت تاپسىرىپ, ۇزدىك ناتيجەمەن گرانتتاردى تاعايىنداۋ كونكۋرسىنا قاتىسا الادى. بىراق بەيىندى پاندەر كومبيناتسياسىن اۋىستىرۋعا بولمايدى. ياعني ءبىرىنشى رەت فيزيكا-ماتەماتيكا تاپسىرسا, ەكىنشى رەت تە سول پاندەردى تاپسىرۋعا مىندەتتى», دەدى ءا. تويباەۆ ورتالىق كوممۋنيكاتسيالار قىزمەتىندە وتكەن ءباسپاسوز ءماسليحاتىندا.
ءبىلىم دەپارتامەنتى ديرەكتورىنىڭ ايتۋىنشا, ەگەر ءبىرىنشى تەستىلەۋدە تالاپكەر ەرەجە بۇزسا, ول ۇبت-نى ەكىنشى رەت تاپسىرا المايدى. ال ەگەر ەكىنشى رەت تاپسىرۋ كەزىندە ەرەجەلەردى بۇزسا, ءبىرىنشى جانە ەكىنشى تەستىلەۋدىڭ ناتيجەلەرى جويىلادى. ياعني ول بالا گرانتتاردى تاعايىنداۋ كونكۋرسىنا قاتىسا المايدى.
«بيىل اقپاراتتىق قاۋىپسىزدىكتى قامتاماسىز ەتۋ بويىنشا ۇبت «1 كومپيۋتەر – 2 كامەرا – 1 تەستىلەنۋشى» قاعيداسى بويىنشا وتكىزىلەدى. تالاپكەردىڭ جۇمىس ورنىندا نەگىزگى كامەرادان باسقا تۇلعانى انىقتاۋعا (Face ID) جانە بوگدە ادامداردىڭ كىرۋىنە جول بەرمەۋگە مۇمكىندىك بەرەتىن قوسىمشا الدىڭعى ۆەب-كامەرا ورناتىلعان», دەپ تۇسىندىردى ادىلەت تويباەۆ.
سونداي-اق, اكادەميالىق ادالدىقتى ساقتاۋ ءۇشىن تالاپكەرلەردىڭ تەستىلىك نۇسقاسى تاڭبالانادى, ياعني ۇبت-نىڭ ءاربىر قاتىسۋشىسىنىڭ جەكە تەست نۇسقاسى بولادى. تالاپكەرلەر ەرەجەلەردى بۇزىپ, تەست تاپسىرمالارىن اۋديتوريادان تىس جەرلەرگە شىعارۋعا ارەكەت جاساسا, ولاردىڭ ناتيجەلەرى جويىلادى.
ايتا كەتەرى, ۇبت-داعى پاندەردىڭ سانى بيىل دا وزگەرمەيدى – ءۇش مىندەتتى جانە ەكى تاڭداۋ بويىنشا. تەست تاپسىرمالارىنىڭ سانى – 120. ونىڭ ىشىندە قازاقستان تاريحىنان - 15, ماتەماتيكالىق ساۋاتتىلىقتان - 15, وقۋ ساۋاتتىلىعىنان - 20 جانە ەكى بەيىندىك پاننەن - 35. ەڭ جوعارعى ۇپاي سانى – 140.
ۇبت كەزىندە كومپيۋتەر ەكرانىندا كالكۋلياتور, مەندەلەەۆ كەستەسى جانە مەتالداردىڭ بىرقاتار بەلسەندىلىگى قوسىلعان تۇزدىڭ ەرىگىشتىگى كەستەسى بولادى.
تەستىلەۋگە 4 ساعات (240 مينۋت) بەرىلەدى. ال ەرەكشە ءبىلىم بەرۋ قاجەتتىلىگى بار بالالارعا قوسىمشا 40 مينۋت ۋاقىت بەرىلەدى. سونىمەن قاتار ولار ءۇشىن سۋرەتتەرسىز, دياگراممالارسىز جانە سحەمالارسىز سىناق نۇسقالارى ازىرلەندى.
ۇمىتكەرلەر تەستىلەۋ اياقتالعاننان كەيىن 30 مينۋت ىشىندە اپەللياتسياعا بەرە الادى. سەرتيفيكات اپپەلياتسيا تۋرالى شەشىم قابىلدانعاننان كەيىن تەستىلەنۋشىنىڭ جەكە كابينەتىندە قولجەتىمدى بولادى.
ايانا توعانبەك
