كورەرمەندەرگە العاشقىلاردىڭ قاتارىندا رەجيسسيور اقان ساتاەۆتىڭ «توميريس» تاريحي كارتيناسى كورسەتىلدى. ماسساگەتتەردىڭ پاتشايىمى مەن پارسىلاردىڭ كير پاتشاسى تۋرالى ءفيلمدى تاماشالاۋ كەزىندە زال كىسىگە لىق تولدى. كورسەتىلىم نەمىس استاناسىنداعى ەڭ اتاقتى كينوتەاترلاردىڭ ءبىرى Zoo Palast-تا ءوتتى.
كورەرمەندەردىڭ ايتۋىنشا, اكتەرلاردىڭ ويىنى مەن كوستيۋمدەرى ەرەكشە اسەر قالدىرعان.
وسى اپتالىق اياسىندا رەجيسسيور نۇرگەلدى سادىعۇلوۆتىڭ «بالۋان شولاق», راشيد سۇلەيمەنوۆتىڭ «ورالۋ» فيلمدەرى, ال كىشكەنتاي كورەرمەندەر ءۇشىن رەجيسسيورلەر تىلەك تولەۋعازى مەن تۇردىبەك مايداننىڭ «مۇزبالاق» ءمۋلتفيلمى كورسەتىلەدى.
«مەن جاڭا عانا ءفيلمدى كورىپ شىقتىم, كارتينادان كەرەمەت اسەر الدىم. اسىرەسە مايدان دالاسىنداعى كورىنىستەر كوڭىلىمنەن شىقتى, ولاردى ءتۇسىرۋ, كاسكادەرلاردىڭ جۇمىسىن جالپى بۇكىل ۇدەرىستى ۇيىمداستىرۋ وتە قيىن. بۇل كەرەمەت ءىس جانە تاريحقا تەرەڭ بويلاۋعا تاماشا مۇمكىندىك. ەرىك-جىگەرى مىقتى ايەلدىڭ بەينەسى ءساتتى بەرىلگەن. سوسىن ارينە كوستيۋمدەر وتە قاتتى ۇنادى», دەدى فيلم پروديۋسەرى تەرەزا كلامانن.
«وسى ءىس-شارانىڭ اياسىندا ءبىز ءۇش كوركەم فيلم, ءبىر دەرەكتى فيلم جانە ءبىر بالالارعا ارنالعان ءمۋلتفيلمدى كورسەتۋدى جوسپارلاپ وتىرمىز. ارينە, ەكى ەل قارىم-قاتىناسىنداعى ەرەكشە ءبىر سالا – مادەني ديپلوماتيا. ءبىز ەلىمىزدىڭ سالت-ءداستۇرىن, مادەنيەتىن كينو ارقىلى جەرگىلىكتى جۇرتشىلىققا جەتكىزەيىك دەگەن ماقساتىمىز. بۇل ەلشىلىكتىڭ جەكە جوسپارلاعان ءىس-شارالارىنىڭ ءبىرى بولىپ تابىلادى. قارىم-قاتىناستىڭ 30 جىلدىعى بولعاندىقتان, ارينە, ءبىز وسى مەرەيلى جىل اياسىندا كوپتەگەن ءىس-شارالاردى جۇزەگە اسىرۋعا جوسپارلاپ وتىرمىز», دەدى گفر-داعى قر ەلشىسى داۋرەن كاريپوۆ.
ايانا توعانبەك
