ۇكىمەت وتىرىسىندا ە. جاماۋباەۆ رەسپۋبليكالىق بيۋدجەت بويىنشا ءتورت تريلليون تەڭگەگە جۋىق شىعىن جۇمسالعانىن ايتتى.
«ورىندالماعان قارجى 20 ميلليارد تەڭگە, ونىڭ 5 ميلليارد تەڭگەسى - ۇنەمدەۋ. 15 ميلليارد تەڭگە يگەرىلمەدى. يگەرىلمەگەن قارجىنىڭ ەڭ كوپ كولەمى دەنساۋلىق ساقتاۋ, مادەنيەت جانە سپورت, سىرتقى ىستەر, ەكولوگيا, گەولوگيا جانە تابيعي رەسۋرستار مينيسترلىكتەرىندە», دەدى ول.
ءمينيستردىڭ ايتۋىنشا, بيۋدجەتتى يگەرمەۋدىڭ نەگىزگى سەبەپتەرى: شارتتار جاساسۋدىڭ ۇزاق مەرزىمدى راسىمدەرى, تولەمنىڭ نەگىزدىلىگىن راستايتىن قۇجاتتاردىڭ بولماۋى نەمەسە ۇسىنىلماۋى, قازىناشىلىق ورگاندارىنا تولەۋگە بەرىلەتىن شوتتاردى كەش ۇسىنۋ, ورىندالعان جۇمىستاردىڭ اكتىلەرىن, شوت-فاكتۋرالاردى ۋاقىتىلى ۇسىنباۋ, مەملەكەتتىك ساتىپ الۋ بويىنشا وتكىزىلمەگەن كونكۋرستار, قاراجاتتى جۇمساۋ قاجەتتىلىگىنىڭ بولماۋى.
ايانا توعانبەك
