بعم مەكتەپكە دەيىنگى جانە ورتا ءبىلىم بەرۋ كوميتەتىنىڭ توراعاسى گۇلميرا كارىموۆا بيىلعى وقۋ جىلى 25 مامىردا اياقتالاتىنىن ايتتى. مينيستر ءتيىستى بۇيرىققا قول قويدى. 26 مامىردان باستاپ 9, 11-سىنىپ وقۋشىلارى ەمتيحاندارىن تاپسىرادى. ال قالعان سىنىپ وقۋشىلارى ءۇشىن 17 ماۋسىمعا دەيىن جالعاساتىن جازعى مەكتەپ ۇيىمداستىرىلادى.
«جازعى مەكتەپ – ءبىلىمىڭىزدى جەتىلدىرىپ, ولقىلىقتاردى تولتىرۋعا تاماشا مۇمكىندىك. پاندەميا وقۋ ۇدەرىسىنە جاقسى اسەر ەتپەگەنىن جانە مەكتەپ وقۋشىلارىنىڭ كەي تاقىرىپتاردى تولىق مەڭگەرمەگەنىن جاقسى بىلەمىز. باسقا ەلدەردە بۇل ماسەلەنى شەشۋ ءۇشىن وقۋ جىلىن ۇزارتادى. ال ءبىز وقۋ جىلىن ۇزارتپاي, جازعى مەكتەپ ۇيىمداستىردىق. ءبىز بارلىق وقۋشىلارعا جازعى مەكتەپتەن قالماۋعا كەڭەس بەرەمىز», دەدى گۇلميرا كارىموۆا.
ۆەدومستۆو مالىمەتىنشە, جازعى مەكتەپتەردە ساباقتار ادەتتەگى فورماتتا وتپەيدى. يكەمدى وقۋ كەستەسى ۇيىمداستىرىلادى, ساباقتار مۇراجايلارعا جانە ەكسكۋرسيالارعا بارۋ تۇرىندە دە ۇيىمداستىرىلادى.
«بۇل رەتتە جازعى مەكتەپتە وقۋشىلارعا باعا قويىلمايتىنىن, سونىمەن قاتار ءۇي تاپسىرماسى بەرىلمەيتىنىن اتاپ كەتكەن ءجون. جازعى ۋاقىتتاعى وقۋ مۇمكىندىگىنشە قىزىقتى ءارى مازمۇندى ءوتۋ ءۇشىن بارلىق جاعداي جاسالادى. كەيبىر بالالاردىڭ رەپەتيتورلارمەن اقىلى كۋرستارعا بارىپ, قوسىمشا ءبىلىم الاتىنىن بىلەمىز. وسى ورايدا جازعى مەكتەپ ءبىلىمىڭىزدى شىڭداپ, ولقىلىقتىڭ ورنىن تولتىرۋعا دا تاماشا مۇمكىندىك. ونىڭ ۇستىنە مۇعالىمدەر ءوز وقۋشىلارىنىڭ كۇشتى جانە ءالسىز جاقتارىن جاقسى بىلەدى», دەيدى مەكتەپكە دەيىنگى جانە ورتا ءبىلىم بەرۋ كوميتەتىنىڭ توراعاسى.
جازعى مەكتەپ بارلىق وقۋشىلار ءۇشىن ۇيىمداستىرىلادى. دەگەنمەن, ءتۇرلى جاعدايلارعا بايلانىستى جازعى مەكتەپكە قاتىستى سوڭعى شەشىمدى اتا-انالار مەن مەكتەپ وقۋشىلارى وزدەرى قابىلدايدى.
«بىراق بۇل جەردە ءبىرىنشى كەزەكتە بالانىڭ مۇددەسىن, ونىڭ بولاشاعىن ويلاۋ كەرەك. سوندىقتان, تۇپكىلىكتى شەشىم اتا-انانىڭ قولىندا ەكەنىنە قاراماستان, ءبىز ءوز تاراپىمىزدان جازعى مەكتەپكە بارۋعا كەڭەس بەرەمىز. ويتكەنى بۇل, ەڭ الدىمەن, بالالارعا قاجەت», دەدى گۇلميرا كارىموۆا.
