مادەني ءىس-شارانىڭ العى سوزىندە «قازاقفيلم» كينوستۋدياسىنىڭ پرەزيدەنتى اقان ساتاەۆ «اقىن» ءفيلمىنىڭ شىعارماشىلىق توبىن تۇساۋكەسەرمەن قۇتتىقتاپ, كارتينانىڭ العاشقى كورسەتىلىمى توكيوداعى حالىقارالىق كينوفەستيۆال شەڭبەرىندە وتكەنىن جانە بۇل بايقاۋدا دارەجان ومىرباەۆ «ۇزدىك رەجيسسەر» جۇلدەسىمەن ماراپاتتالعانىن اتاپ ءوتتى. سونىمەن قاتار اقان ساتاەۆ اتالعان كينوتۋىندى جاقىندا عانا وتكەن حالىقارالىق بەرلين كينوفەستۆالىنىڭ «فورۋم» باعدارلاماسىندا كورسەتىلگەنىن ەسكە سالىپ, ءفيلمنىڭ الار اسۋى ءالى الدا ەكەنىن ايتتى.
ەستەرىڭىزگە سالا كەتسەك, «اقىن» ءفيلمى تەحنولوگيالار دامىعان قازىرگى زاماندا ونەردىڭ قوعامدا الاتىن ورنى تۋرالى وي قوزعاپ, پوەزياعا سۇرانىس ازايعان داۋىردە اقىننىڭ كۇيىنىشى تۋرالى سىر شەرتەدى. قازاق حالقىنىڭ XIX عاسىرداعى ەڭ كورنەكتى اقىندارىنىڭ ءبىرى ماحامبەت وتەمىس ۇلىنىڭ قيلى تاعدىرى جايىندا ويعا باتقان باستى كەيىپكەر نازىك جۇرەكتى اقىنداردىڭ ءومىرى قاشان دا قيىن بولعانىن تۇسىنەدى.
«نەمىس جازۋشىسى گەرمان گەسسەنىڭ «اۆتورلىق كەش» اتتى اڭگىمەسىن وقىعان سوڭ ءفيلمنىڭ ستسەناريىن جازۋعا كىرىستىم. كەيىن قولىما قازاقتىڭ بەلگىلى اقىنى ماحامبەت وتەمىس ۇلىنىڭ ءومىرى مەن ءولىمى تۋرالى تىڭ دەرەكتەرمەن تولىقتىرىلعان كىتاپ ءتۇستى. ونى وقىپ شىعىپ, ءفيلمنىڭ ستسەناريىنە قوستىم. وسىلايشا «اقىن» فيلم دۇنيەگە كەلدى», دەدى رەجيسسەر دارەجان ومىرباەۆ.
فيلمدەگى باستى ءرولدى «جىگىتتەر» توبىنىڭ ءانشىسى ەردوس قاناەۆ سومدادى. بەلگىلى ءانشى «جىگىتتەر» كۆارتەتىنە بيىل 20 جىل تولاتىنىن جانە وسى ۋاقىت ارالىعىندا كورەرمەندەرمەن العاش رەت كينواكتەر رەتىندە قاۋىشىپ وتىرعانىن ايتتى.
«باسىندا بۇل رولگە باسقا اكتەر بەكىتىلگەن بولاتىن. كەيىن كارانتين كەزىندە كاستينگ-ديرەكتور ەردوس قاناەۆتىڭ كانديداتۋراسىن ۇسىندى. بىرنەشە رەت كامەراعا ءتۇسىرىپ كوردىك تە, ناتيجەسىندە ەردوستى تاڭدادىق. ونى ءانشى بولعانى ءۇشىن تاڭداعانىمىز جوق. دەگەنمەن كەيبىر ساحنالاردى تۇسىرگەندە ونىڭ شىعارماشىلىققا جاقىن بولعانى كومەك بولدى», دەدى رەجيسسەر.
سونىمەن قاتار دارەجان ومىرباەۆ «اقىن» ءفيلمى الداعى ۋاقىتتا باسقا دا حالىقارالىق بەدەلدى كينوفەستيۆالدەر شەڭبەرىندە كورسەتىلەتىنىن حابارلادى.
ايتا كەتسەك, ءفيلمنىڭ ءتۇسىرۋ جۇمىستارى 2020 جىلى باستالدى. نەگىزگى ءتۇسىرىلىم الماتى قالاسى جانە الماتى وبلىسىندا, سونداي-اق اتىراۋ وبلىسىندا جۇرگىزىلدى.
الماتى
