ونىڭ ىشىندە پرەزيدەنتتىڭ وليگوپوليانىڭ ۇلتتىق ەكونوميكاعا كەرى اسەرى جونىندە جەتكىزگەن ويلارى كوڭىلگە قونىمدى. كوپ جاعدايدا قوعامدا وسى وليگوپوليانى مونوپوليامەن شاتاستىرىپ جاتادى.
وليگوپوليا – جەتىلدىرىلمەگەن باسەكەلەستىك نارىقتىق قۇرىلىمىنىڭ ءبىر ءتۇرى. مۇندا فيرمالاردىڭ از سانى باسىم بولادى. دەمەك شەكتەۋلى كوممەرتسيالىق قۇرىلىمدار عانا ايرىقشا پرەفەرەنتسيالاردى يەلەنەدى. ياعني حالىقتا تاڭداۋ دا بولمايدى. ءسوزسىز بۇل حالىققا, سونداي-اق تۇتاستاي ەكونوميكاعا ءتيىمسىز جابايى كاپيتاليزمنىڭ كورىنىسى. وسىنىڭ سالدارىنان مۇناي-گاز ونىمدەرى, اتاپ ايتقاندا, بەنزين, گاز سىندى الەۋمەتتىك جاعارمايدىڭ باعاسى, سول سەكىلدى ازىق-ت ۇلىك ونىمدەرى, جەكەلەگەن قىزمەت تۇرلەرى جانە باسقا دا ماڭىزدى تاۋار تۇرلەرى ەرىكسىز قىمباتتايدى.
بۇنىڭ ناقتى مىسالىن «سامۇرىق-قازىنا» ۇلتتىق ءال-اۋقات قورىنىڭ نەگىزىندە بايقاۋعا بولادى. وسى كومپانيا قۇرىلعالى بەرى ەڭ ءتيىمسىز قۇرىلىم ەكەنىن كورسەتتى. قانشاما ماڭىزدى سەكتورلارداعى جەتەكشى كومپانيالاردى ءوز تۋىنىڭ استىنا بىرىكتىرگەنىمەن ودان تۇسكەن ەكونوميكالىق اسەر ماردىمسىز. مەملەكەت باسشىسىنىڭ اتالعان حولدينگتى رەفورمالاۋ جونىندەگى باستاماسىن دۇرىس دەپ باعالاۋعا بولادى. وسىمەن توقتاپ قالماي, بۇل ۇيىممەن بىرگە باسقا دا كۆازيمەملەكەتتىك كومپانيالاردى جەكەشەلەندىرۋ قاجەت. بۇل جونىندە ەكونوميستەر تالاي جىلدان بەرى ايتىپ كەلەدى, بىراق سەڭ قوزعالار ەمەس.
مەملەكەتتىڭ ەكونوميكاداعى ۇلەسىن ازايتۋ كۇن تارتىبىندەگى ماسەلەگە اينالعالى قاشان؟! بىزدە ونىڭ ۇلەسى شامامەن 60%-دان اسادى. ەگەر دە ەكونوميكالىق تەورياعا سالساق, بۇل كورسەتكىش 50%-دان جوعارى بولماۋعا ءتيىس. ودان اسقان جاعدايدى كەز كەلگەن مەملەكەتتىڭ ەكونوميكالىق ارحيتەكتۋراسى قۇلدىرايدى. ەۋروپادا ونىڭ ۇلەسى 40%-عا دا جەتپەيدى. ونىڭ ناتيجەسىندە كارى قۇرلىق دامۋدىڭ قانداي جولىنا تۇسكەن بەلگىلى. سول سەبەپتى تاعى دا قايتالاپ ايتامىن, مەملەكەتتىڭ بيزنەستەگى قاتىسۋىن تومەندەتۋ قاجەت. ال ونىڭ ءتيىمدى جولى – ۇلتتىق حولدينگتەردى جەكەشەلەندىرۋ. وسى ماسەلەنى رەتتەسەك, ەركىن باسەكەلەستىك ورتا دامىپ, وليگوپوليا تامىرىمەن جويىلادى. ەڭ باستىسى, وتاندىق تاۋارلاردىڭ ساپاسى جاقسارىپ, حالىقتىڭ تابىسى ۇلعايادى. پرەزيدەنتتىڭ سۇحباتتا جەتكىزبەك ويى وسىعان سايادى دەپ ءتۇسىندىم.
ماقسات حالىق,
ەكونوميست
