پارلامەنت • 17 اقپان، 2022

سەناتورلار ەاەو-نىڭ ەلەكتر ەنەرگەتيكالىق نارىعى تۋرالى زاڭىن قابىلدادى

68 رەت كورسەتىلدى

سەنات سپيكەرى ماۋلەن اشىمباەۆتىڭ توراعالىعىمەن پالاتا وتىرىسى ءوتتى. وندا دەپۋتاتتار جوعارعى سوت سۋدياسىن قىزمەتىنەن بوساتۋ تۋرالى ەل پرەزيدەنتىنىڭ ۇسىنىمىن قارادى، دەپ حابارلايدى Egemen.kz قر پارلامەنتى سەناتىنىڭ ءباسپاسوز قىزمەتىنە سىلتەمە جاساپ.

ناتيجەسىندە سەناتورلار ءتيىستى قاۋلىنى قابىلداپ، جاڭىلسىن ارحاروۆا جوعارعى سوت سۋدياسى قىزمەتىنەن بوساتىلدى.

سونىمەن قاتار وتىرىس بارىسىندا ەكى زاڭ قارالىپ، قابىلداندى. ولاردىڭ ءبىرى ەاەو-نىڭ ورتاق ەلەكتر ەنەرگەتيكالىق نارىعىندا ەلەكتر ەنەرگەتيكاسى سالاسىنداعى تابيعي مونوپوليالار سۋبەكتىلەرىنىڭ قىزمەتىن رەتتەۋ مەن باقىلاۋ ءتارتىبىن رەگلامەنتتەيدى. مۇنداي نورمالار «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا (ەۋرازيالىق ەكونوميكالىق وداقتىڭ ورتاق ەلەكتر ەنەرگەتيكالىق نارىعىن قالىپتاستىرۋ بولىگىندە) وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدا جازىلعان.

«قابىلداعان زاڭ ەۋرازيالىق ەكونوميكالىق وداقتا ورتاق ەلەكتر ەنەرگەتيكالىق نارىق قالىپتاستىرۋدى جانە ۇيىمعا مۇشە مەملەكەتتەر اراسىندا ءادىل باسەكەلەستىكتى قامتاماسىز ەتۋدى كوزدەيدى. سونداي-اق بۇل قۇجات ەكونوميكالىق ءوزارا ءتيىمدى جانە تەڭ قۇقىلى ىنتىماقتاستىقتى ودان ءارى نىعايتۋعا ارنالعان. الداعى ۋاقىتتا مۇنىڭ ءبارى ەۋرازيالىق ەكونوميكالىق وداققا مۇشە ەلدەردىڭ ەنەرگەتيكالىق قاۋىپسىزدىگىن ارتتىرۋعا سەپتىگىن تيگىزەدى دەپ سەنەمىز»، دەدى زاڭ تۋرالى پىكىر بىلدىرگەن ماۋلەن اشىمباەۆ.

وتىرىس كەزىندە سەناتورلار «قازاقستان رەسپۋبليكاسى مەن رەسەي فەدەراتسياسى اراسىنداعى اسكەري ىنتىماقتاستىق تۋرالى شارتتى راتيفيكاتسيالاۋ تۋرالى» زاڭدى دا قابىلدادى. بۇل كەلىسىمگە 1994 جىلى قابىلدانعان الدىڭعى شارتتىڭ نورمالارىن جانداندىرۋ ءۇشىن 2020 جىلى قول قويىلدى. سەبەبى الدىڭعى شارتتىڭ ەرەجەلەرى بۇگىنگى تالاپتارمەن سالىستىرعاندا ەسكىرگەن نەمەسە قازىردىڭ وزىندە ىسكە اسىرىلعان.

شارت اسكەري ءوزارا ءىس-قيمىلدى نىعايتۋعا، وڭىرلىك قاۋىپسىزدىكتىڭ سىن-قاتەرلەرى مەن قاۋىپتەرىنە قارسى ارەكەت ەتۋگە، ءتيىستى ماسەلەلەر بويىنشا شتابتىق كەلىسسوزدەر مەن كونسۋلتاتسيالار وتكىزۋگە ارنالعان. قۇجات جەدەل جانە جاۋىنگەرلىك دايارلىق باعىتىنداعى ىنتىماقتاستىقتى، اتاپ ايتقاندا، بىرلەسكەن وقۋ-جاتتىعۋلار وتكىزۋدى دە قامتيدى.

سونداي-اق وتىرىستا سەناتورلار وزدەرىنىڭ دەپۋتاتتىق ساۋالدارىن جولدادى.

اقىلبەك كۇرىشباەۆ بىلتىر ەلىمىزدە 30 جىلدا بولماعان قۋاڭشىلىق ورىن الىپ، سالدارىنان اگروبيزنەس سالاسى ايتارلىقتاي زارداپ شەككەنىنە نازار اۋداردى. سوعان بايلانىستى ول الداعى ەگىس ناۋقانىنا ۋاقتىلى دايىندىقتى قامتاماسىز ەتۋ ءۇشىن شارۋالارعا مەملەكەت تاراپىنان تولىق كولەمدە جانە ساپالى قولداۋ كورسەتۋدى ۇسىندى.

دينار نوكەتاەۆا ەلىمىزدىڭ ىشكى كوشى-قون ساياساتىنىڭ يدەولوگياسى مەن ناقتى باعىت-باعدارىن قالىپتاستىرۋ قاجەتتىگىن اتاپ ءوتتى.

سۇيىندىك الداشەۆ ۇكىمەتتى جاڭاوزەن قالاسىنداعى پروبلەمالىق ماسەلەلەردى شەشۋگە شاقىرىپ، ءوڭىر تۇرعىندارىن جۇمىسپەن قامتاماسىز ەتۋ، قازىرگى ءوندىرىس ورىندارىن ءارتاراپتاندىرۋ جانە جاڭالارىن اشۋ جونىندەگى ۇسىنىستارىن جەتكىزدى.

سۇلتان دۇيسەمبينوۆ ەلدەگى ءدىني احۋالدى تەرەڭ زەردەلەۋ ارقىلى ءدىني ەكسترەميزم مەن تەرروريزمگە قارسى ءىس-قيمىل جونىندەگى جاڭا مەملەكەتتىك باعدارلاما دايىنداۋ كەرەكتىگىن ايتتى.

اندرەي لۋكين سۋبسيديا الۋ ءۇشىن شارۋالار ءوتىنىم بەرەتىن «Qoldau.kz» پلاتفورماسىن مەملەكەتتىڭ مەنشىگىنە بەرۋدى سۇرادى. قازىرگى تاڭدا فەرمەرلەر ءوتىنىم بەرۋ مۇمكىندىگى ءۇشىن عانا 1،7 ملرد تەڭگەدەن استام قاراجات تولەۋگە ءماجبۇر بولىپ وتىر. ال نەگىزى مۇنداي راسىمدەر eGov ەلەكتروندىق ۇكىمەت پورتالىندا تەگىن بولۋعا ءتيىس.

سوڭعى جاڭالىقتار

اۋەزوۆ جانە تۇركى الەمى

رۋحانيات • كەشە

يدەولوگيا

رۋحانيات • كەشە

مەيىرىم مەن قاتىگەزدىك

رۋحانيات • كەشە

ەسكى مەن جاڭا اراسى

رۋحانيات • كەشە

بي پاديشاسى

رۋحانيات • كەشە

ساپا قايتسە جاقسارادى؟

قازاقستان • كەشە

قايىرىمدىلىقتىڭ ۇلگىسى

قازاقستان • كەشە

ساق ءداۋىرىنىڭ تاسى

تانىم • كەشە

ۇقساس جاڭالىقتار