پرەزيدەنت بارشا قازاقستاندىقتاردى ناۋرىز مەرەكەسىمەن قۇتتىقتادى

نۇرسۇلتان نازارباەۆ «قازاق ەلى» مونۋمەنتى الاڭىندا وتكەن «ناۋرىز-2014» مەرەكەلىك ءىس-شاراسىنا قاتىستى, وندا قازاقستاننىڭ بەلگىلى ارتىستەرى مەن شىعارماشىلىق ۇجىمدارىنىڭ قاتىسۋىمەن كونتسەرت ءوتتى. بۇل تۋرالى اقوردا. kz حابارلادى. ءوز سوزىندە مەملەكەت باسشىسى بارشا قازاقستاندىقتاردى ناۋرىز مەرەكەسىمەن قۇتتىقتاپ, ول حالقىمىزدىڭ بىرلىگى مەن تاتۋلىعىنىڭ سيمۆولى بولىپ تابىلاتىنىن اتاپ ءوتتى. – بۇل – حالىقتىڭ ۇلى مەرەكەسى, كۇن مەن ءتۇننىڭ تەڭەلۋىنىڭ سيمۆولى. بىرلىك, باۋىرلاستىق, تولەرانتتىق جانە تۇراقتىلىقتى بىلدىرەتىن بۇل مەيرام 5 مىڭ جىلدان بەرى اتاپ ءوتىلىپ كەلەدى. وسىنىڭ ءبارى – قازاقستان ءجۇرىپ كەلە جاتقان جول. بۇل يدەيانى ءبىز تاۋەلسىزدىگىمىزدى جاريالاعان كۇننەن باستاپ جۇزەگە اسىرىپ كەلەمىز. بۇل – ۇلى قازىنا, ءبىز ونى كوزدىڭ قاراشىعىنداي ساقتاۋعا ءتيىسپىز. ەلىمىزدە 100-دەن استام ەتنوس, 40-قا جۋىق ءدىني كونفەسسيا وكىلدەرى تاتۋلىق پەن دوستىققا ءومىر ءسۇرىپ كەلەدى. وسىنىڭ ارقاسىندا ءبىز مەملەكەت قۇردىق, سۇيىكتى استانامىزدى تۇرعىزدىق, – دەدى نۇرسۇلتان نازارباەۆ. قازاقستان پرەزيدەنتى قازىرگى الەمنىڭ نازىك تە كۇردەلى ەكەنىنە توقتالدى. – جىل سايىن عالامشاردا 30-عا دەرلىك قارۋلى قاقتىعىس ورىن الىپ, وندا ءجۇز مىڭداعان ادام قۇربان بولۋدا, 800 ميلليونعا جۋىق ادام اشتىق ازابىن تارتۋدا, ال 400 ميلليون ادام اۋىز سۋعا زارۋلىك كورۋدە. كەز كەلگەن كەلەڭسىز ارەكەت بىزدە بار يگىلىككە زاردابىن تيگىزۋى مۇمكىن, – دەدى مەملەكەت باسشىسى. نۇرسۇلتان نازارباەۆ بارشا قازاقستاندىقتار ءۇشىن ورتاق ماقسات – رەسپۋبليكامىزدىڭ 2050 جىلعا قاراي الەمدەگى ەڭ دامىعان 30 ەلدىڭ  قاتارىنا قوسىلۋ ەكەنىن اتاپ كورسەتتى. – ءبىز ەڭبەكتىڭ, بەرەكە-بىرلىكتىڭ جانە تۇراقتىلىقتىڭ ارقاسىندا دامىپ كەلەمىز. بۇكىل الەمدە جۇمىس ورىندارى قىسقارىپ جاتقان ۋاقىتتا يندۋستريالىق-يننوۆاتسيالىق باعدارلاما اياسىندا ءبىز 60 مىڭ جۇمىس ورنىن اشتىق, «جۇمىسپەن قامتۋ – 2020» باعدارلاماسى بويىنشا جۇمىسپەن قامتاماسىز ەتىپ, جاڭا كاسىپكە وقىتۋدامىز. بۇعان قوسا, مەن ءوز جارلىعىممەن بيۋدجەتتىك ۇيىمدار جۇمىسشىلارىنىڭ ەڭبەكاقىسىن ارتتىرۋدى تاپسىردىم. مەنىڭ شەشىمىمە قولداۋ كورسەتكەن, سونداي-اق ءوز ۇجىمدارىنىڭ ەڭبەكاقاسىن ارتتىرعان بارلىق كومپانياعا العىس ايتامىن, – دەدى قازاقستان پرەزيدەنتى. سوڭىندا مەملەكەت باسشىسى بارشانى مەرەكەمەن تاعى دا قۇتتىقتاپ, تىنىشتىق, كەلىسىم, وتانعا جانە ءوز جاقىندارىنا سۇيىسپەنشىلىك تىلەدى. دەرەككوز: اقوردا. kz. فوتو: «حابار» تەلەارناسى.