كوروناۆيرۋس • 25 قاڭتار، 2022

الماتىدا كارانتيندىك شەكتەۋلەر جەڭىلدەدى

الماتىنىڭ باس مەملەكەتتىك سانيتارلىق دارىگەرى قارلىعاش ءابدىجابباروۆا كارانتيندىك تىيىمنىڭ ءىشىنارا الىنىپ تاستالعانى تۋرالى ايتتى، دەپ حابارلايدى Egemen.kz.

بوتاكوز باقبەرگەن

قارلىعاش ءابدىجابباروۆا «Ashyq» جوباسى اياسىندا 6-16 قاڭتار ارالىعىندا قالادا «قىزىل» مارتەبەسى بار 270 جانە «سارى» مارتەبەسى بار ءتورت ادام انىقتالعانىن اتاپ ءوتتى.

«2021 جىلدىڭ 9 ساۋىرىنەن باستاپ قازىرگى ۋاقىتقا دەيىن 11 369 تۇرعىننىڭ «قىزىل» مارتەبەسى، 1360 تۇرعىننىڭ «سارى» مارتەبەسى راستالدى»، دەپ حابارلادى باس سانيتارلىق دارىگەر وڭىرلىك كوممۋنيكاتسيالار قىزمەتىندە وتكەن ونلاين-بريفينگتە.

ول وسى جىلدىڭ 22 قاڭتارىندا الماتى قالاسى بويىنشا №2 قاۋلىعا قول قويىلعانىن، وندا كەلەسى وزگەرىستەر ەنگىزىلگەنىن ەسكە سالدى: كونتسەرت زالدارىنىڭ، تەاترلاردىڭ، تسيركتەردىڭ، فيلارمونيالاردىڭ قىزمەتىنە، كونفەرەنتسيالار، سەمينارلار، كورمەلەر، فورۋمدار، تۇنگى كلۋبتار، كاراوكە، ۇجىمدىق ءدىني جورالاردى وتكىزۋگە تىيىم سالىندى، سونداي-اق جالپى تاماقتانۋعا كەلۋشىلەر سانىن 4 ادامعا دەيىن قىسقارتۋ جانە كينوتەاترلاردىڭ تولىمدىلىعىن 30%-عا دەيىن قىسقارتۋ تۋرالى تالاپ الىنىپ تاستالدى.

«بۇل نىسانداردىڭ بارلىعى «Ashyq» اياسىندا «قىزىل» ايماقتىڭ قولدانىستاعى كريتەريلەرى بويىنشا جۇمىس ىستەيتىن بولادى. مىسالى، كونتسەرتتەر، تەاترلار، كينوتەاترلار، قوعامدىق تاماقتانۋ، تۇنگى كلۋبتار، كاراوكەلەرگە - 50%-عا دەيىن 50 ادامنان ارتىق ەمەس، كورمەلەرگە - 70%-عا دەيىن 200 ادامنان ارتىق ەمەس جينالۋعا بولادى»، دەپ ءتۇسىندىردى قارلىعاش ءابدىجابباروۆا.

سپيكەر 24 قاڭتاردان باستاپ بالاباقشالارعا اتا-انالاردىڭ ءوتىنىشى بويىنشا شتاتتىق فورماتتا، جالپى ءبىلىم بەرەتىن مەكتەپتەرگە - 600 بالاعا دەيىنگى كونتينگەنتى بار 1-دەن 4-سىنىپقا دەيىن شتاتتىق فورماتتا، ال 600-دەن استام وقۋشىسى بار مەكتەپتەرگە - 50%-عا شتاتتىق فورماتتا جۇمىس ىستەۋگە رۇقسات ەتىلگەنىن حابارلادى.

«سونداي-اق مەكتەپتەن تىس جانە ءبىلىم بەرۋ ورتالىقتارىنىڭ شتاتتىق فورماتتاعى، جوو مەن كوللەدجدەردىڭ ارالاس فورماتتاعى جۇمىسىنا رۇقسات ەتىلدى. ۆاكتسيناتسيالانعان وقۋشىلارعا مەكتەپ اكىمشىلىگىنىڭ قالاۋى بويىنشا وفلاين رەجيمدە رۇقسات ەتىلەدى»، دەپ ناقتىلادى سپيكەر.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز