بۇل ينفلياتسيا دەڭگەيىنە دە وڭ اسەر ەتەدى. شەتەلدەن اكەلىنگەن كولىك ءۇشىن ۋتيليزاتسيالىق تولەم تولەۋ ماكروەكونوميكالىق تۇرعىدان العاندا سالىق بولىپ سانالادى. سوندىقتان ونىڭ نارىقتاعى كولىك باعاسىنا اسەرى جوعارى. ال ونى الىپ تاستاعان سوڭ كولىك باعاسى ارزاندايدى. وسى كۇنگە دەيىن اتالعان ماسەلەمەن جەكەمەنشىك كومپانيانىڭ اينالىسىپ كەلگەنى دە كوپشىلىكتى كوپ ويعا جەتەلەگەن ەدى. پرەزيدەنتتىڭ بۇل ماسەلەنى مەملەكەتتىڭ قاراۋىنا الۋدى تاپسىرۋى قۇپتارلىق قادام. ويتكەنى الەمدىك تاجىريبەدە دە سولاي.
جالپى, پرەزيدەنتتىڭ ءماجىلىس وتىرىسىندا جاساعان بايانداماسى اۋقىمى مەن تەرەڭدىگى جاعىنان, ەكونوميكالىق كاتەگوريالاردى جانە الەۋمەتتىڭ نەگىزگى توپتارىن قامتۋ تۇرعىسىنان ەرەكشە بايانداما بولدى. سەبەبى پرەزيدەنت حالىق اراسىنداعى كليماتتى جاقسى سەزىنەتىنىن, قوعام تاراپىنان ايتىلعان باستامالاردى ەسكەرۋسىز قالدىرمايتىنىن, ىشكى جانە سىرتقى تاۋەكەلدەرگە ۇنەمى نازار اۋداراتىنىن, وزەكتى ەكونوميكالىق-الەۋمەتتىك ماسەلەلەرگە بەيجاي قارامايتىندىعىن اڭعارتتى. پرەزيدەنتتىڭ تاپسىرمالارى ناقتى پروبلەمالىق نۇكتەلەرگە باعىتتالعانى قۋانتتى.
مەملەكەت باسشىسى ءۇش اپتا ىشىندە ۇكىمەتتىڭ 2022 جىلعا ارنالعان ءىس-قيمىل باعدارلاماسىن ازىرلەۋدى تاپسىردى. سوڭعى 10-15 جىلدا مەملەكەتتىك جوسپارلاۋ تاجىريبەسى قولعا الىنعانى بەلگىلى. ول مەملەكەتتىك جانە سالالىق باعدارلامالاردى, ۇلتتىق حولدينگتەردىڭ باعدارلامالارىن ازىرلەيدى. الايدا ءىس-قيمىل باعدارلاماسىنىڭ جوقتىعىنان ۇكىمەت جۇزەگە اسىراتىن الەۋمەتتىك-ەكونوميكالىق ساياسات ءۇشىن زاڭنامالىق جانە كونستيتۋتسيالىق تۇرعىدان ەشقانداي جاۋاپكەرشىلىك ارقالاعان ەمەس. پرەزيدەنت وسى ءبىر ولقى تۇسىمىزدى ءبىرجولا رەتتەپ بەرگەندەي بولدى. ەندى ۇكىمەت جۇرگىزىپ وتىرعان الەۋمەتتىك-ەكونوميكالىق ساياساتىنا زاڭنامالىق تۇرعىدان جاۋاپ بەرەدى. بۇل وتە ماڭىزدى. مۇنداي باعدارلامانىڭ جوباسىن ءبىزدىڭ ينستيتۋت دا ازىرلەگەن بولاتىن. ەگەر جاڭا پرەمەر-مينيستر تاراپىنان قىزىعۋشىلىق تۋىنداسا, ءبىز ءوز جوبامىزبەن بولىسۋگە ءازىرمىز.
مەملەكەتتىك جوسپارلاۋعا ستراتەگيالىق جوسپارلاۋ جانە رەفورمالار اگەنتتىگى جاۋاپتى. پرەزيدەنت بايانداماسى اتالعان جۇيەگە ايتارلىقتاي وزگەرىس ەنگىزىپ وتىر. ياعني جاڭا جىلعا دەيىن مەملەكەتتىك جوسپارلاۋ جۇيەسىندە ۇكىمەتتىڭ ءىس-قيمىل باعدارلاماسى جوق بولاتىن. ال وسى جولى مەملەكەت باسشىسى اتالعان باعدارلامانى ازىرلەۋ تۋرالى ناقتى تاپسىرما بەردى. دەمەك, پرەزيدەنت مەملەكەتتىك جوسپارلاۋ جۇيەسىن تۇبەگەيلى وزگەرتۋگە قادام جاسادى. ۇكىمەتكە جۇزەگە اسىراتىن الەۋمەتتىك-ەكونوميكالىق ساياسات ءۇشىن كونستيتۋتسيالىق تۇرعىدان جاۋاپكەرشىلىك جۇكتەلۋى ەلدىڭ دامۋىنا سەرپىن بەرەدى.
پرەزيدەنتتىڭ ەكونوميكالىق ءوسىمنىڭ نەگىزگى پايداسىن يەلەنىپ وتىرعان وليگارحيالىق توپتار تۋرالى تەزيسى دە كوپشىلىكتىڭ كوكەيىندەگى ويمەن ءدوپ ءتۇستى. شىنىندا دا, قالىپتاسقان وليگوپوليالار ەركىن نارىقتىڭ دامۋىن ايتارلىقتاي شەكتەدى جانە ەلدىڭ باسەكەگە قابىلەتتىلىگىن تومەندەتتى. بۇل ۇكىمەتتىڭ وسى كۇنگە دەيىنگى ەكونوميكالىق ساياساتى وليگارحيالىق توپتاردىڭ مۇددەسى ءۇشىن جۇمىس ىستەدى دەگەن ءسوز. پرەزيدەنتتىڭ وسى ءبىر مودەلدى توقتاتۋى, ياعني ەكونوميكالىق ساياساتتىڭ ارناسىن باسقا باعىتقا بۇرۋى ۇلكەن ناتيجەلەرگە جول اشادى.
قايىربەك ارىستانبەكوۆ,
ەكونوميكالىق ساياسات ينستيتۋتىنىڭ ديرەكتورى,
پرەزيدەنت جانىنداعى ۇلتتىق قوعامدىق سەنىم كەڭەسىنىڭ مۇشەسى
