شىندىعىندا دا ۇزاق جىلدار ۋنيۆەرسيتەت ءدارىسحانالارىندا فيلولوگ ماماندار دايارلاۋ بارىسىندا بايقاعانىمىز – الدىمىزداعى شاكىرتتەردىڭ كوركەم شىعارما تالداۋداعى شورقاقتىعى. ورتا مەكتەپتە دە, جوعارى وقۋ ورىندارىندا دا سولاي. ءبىلىم الۋشى جاستار وزدەرى وقىعان كوركەم شىعارمانى كوبىنەسە مازمۇنداپ بەرۋگە بەيىم. ال ونى ءتيىستى جۇيەسىمەن, تەوريالىق تۇرعىدا بىلىكتى تالداۋ جاساۋ وتە سيرەك. نە ىستەۋ كەرەك؟
مەكتەپ وقۋشىسى ءۇشىن دە, جوعارى وقۋ ورنىنىڭ ستۋدەنتى ءۇشىن دە, ءتىپتى ونى شاكىرت ساناسىنا قۇيۋعا ءتيىس مۇعالىم مەن وقىتۋشى ءۇشىن دە وسى ءبىر ولقىلىقتىڭ ورنى قايتسە تولماق؟
وسى ءبىر كوكەيكەستى ساۋالدىڭ جاۋابىن ءوزىنىڭ رۋحاني باعاسىن قايتا سەزىندىرەتىن «كوركەم شىعارمانى تالداۋ ادىستەمەسى» اتتى مونوگرافيالىق ەڭبەكتەن تابا الاتىنىمىز انىق. مەكتەپ وقۋشىسىنىڭ دا, ستۋدەنتتىڭ دە, مۇعالىم مەن وقىتۋشىنىڭ دا الگىندەي قاجەتتىلىگىن وتەيتىن بۇل ەڭبەكتى جوعارى باعالايتىنىمىز دا سوندىقتان.
كىتاپ اۆتورى – ەلىمىزدىڭ ءبىلىم بەرۋ سالاسىندا ۇزاق جىلدار ەڭبەك ەتىپ جۇرگەن ۇستاز-پەداگوگ, ادەبيەتتى وقىتۋ ادىستەمەسىنە قاتىستى ىرگەلى زەرتتەۋلەر جۇرگىزىپ كەلە جاتقان بەلگىلى عالىم باقتيار ءورىسباي ۇلى سمانوۆ.
بۇگىندە اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە اكادەميك س.قيراباەۆ اتىنداعى قازاق ءتىلى مەن ادەبيەتى كافەدراسىنىڭ پروفەسسورى رەتىندە ەڭبەك ەتىپ جۇرگەن عالىم-ۇستاز باقتيار ءورىسباي ۇلىنىڭ ءومىر جولى وڭتۇستىك ءوڭىردىڭ قۇيقالى توپىراعىنا تابانىن كۇيدىرىپ, ءومىر بويى ۇستازدىق جولدا جۇرگەن اكەنىڭ ۇلاعاتتى تاربيەسىنەن باستاۋ الدى. ۇلتتىق ءداستۇر, ادەت-عۇرىپ, ادەپ-سالت قازىناسى ىسپەتتى وڭتۇستىك ءوڭىردىڭ ونەگەسى باقتياردىڭ بۇكىل ءومىر جولىنا ازىق, تۇلا بويىنا ءنار بولىپ دارىدى. قاراپايىمدىلىعى مول باي مىنەزىنە, ويىنداعىسىن بۇكپەيتىن اشىقتىعى مەن قانداي ورتامەن بولسا دا تەز ءتىل تابىسىپ, ءسىڭىسىپ كەتەتىن جاراتىلىسىنان بار قاسيەتىنە بيىك مادەنيەتىن, ەڭبەكقورلىعى مەن ىزدەنىمپازدىعىن, تەرەڭ ءبىلىمىن قوسىڭىز. وسىنىڭ ءبارى توعىسا كەلىپ باقتيار سمانوۆتى بىلىكتى عالىم, ونەگەلى ۇستاز, ورەلى ازامات دارەجەسىنە كوتەردى.
باقتيار ورىسباي ۇلىمەن العاشقى تانىسۋىمىز دا ستۋدەنتتىك جىلدار ەدى. ورتاق وقۋ عيماراتى, كورشى ءدارىسحانالار, الماتىنىڭ ۆينوگرادوۆ كوشەسىندەگى №88 ۇيدە ورنالاسقان جاتاقحانا ءبارىمىزدى توقايلاستىرىپ, بىرتە-بىرتە ومىرلىك سيپاتقا اينالار دوستىققا ۇلاستىردى.
ءتىرى عالىمنىڭ, ءىرى پروفەسسورلاردىڭ قانداي ەكەنىن ويىندا وبرازعا اينالدىرىپ الماتىعا كەلگەن بىزگە وتكەن عاسىردىڭ سوناۋ الپىسىنشى جىلدارىنىڭ اياعى مەن جەتپىسىنشى جىلدارىنىڭ باسىنداعى س.كيروۆ اتىنداعى قازاق مەملەكەتتىك ۋنيۆەرسيتەتىنىڭ (قازىرگى ءال-فارابي اتىنداعى قازاق ۇلتتىق ۋنيۆەرسيتەتى) فيلولوگيا فاكۋلتەتىندە ءدارىس وقىعان ب.كەنجەباەۆ, م.عابدۋللين, ب.شالاباەۆ, ى.مامانوۆ, م.بالاقاەۆ, ءا.نۇرماحانوۆا, ح.سۇيىنشاليەۆ, ز.قابدولوۆ, ح.سايكيەۆ, ك.احانوۆ, ت.كاكىشەۆ, ر.نۇرعاليەۆ سىندى ۇستازدار شىن مانىندە تاۋ تۇلعالى جاندار بولىپ كورىندى. ءبىزدىڭ باقىتىمىز دا وسىنداي عاجايىپ عالىمداردان ءدارىس تىڭداپ, ءتالىم-تاربيە ونەگەسىن كورگەنىمىز دەر ەدىك.
ءبىر ءۇيدىڭ بالاسىنداي بولىپ كەتكەن سول كەزدەگى شاكىر يبراەۆ, بەكەن ىبىرايىم, قۇنىپيا الپىسباەۆ, تۇرسىنبەك بايمولداەۆ, وتەگەن ورالباەۆ, انارباي بۇلدىباەۆ سىندى جاستار بۇگىندە ەلىمىزدىڭ ادەبيەتى مەن مادەنيەتىنە, ءبىلىمى مەن عىلىمىنا ۇلەس قوسىپ جۇرگەن بەلگىلى عالىمدار. سول قاتاردا باقتيار سمانوۆتىڭ ورنى دا ەرەكشە.
مەنىڭ ۇعىمىمدا ارىپتەسىم باقتيار ءورىسباي ۇلى و باستان-اق ۇستازدىققا جارالعانداي كورىنەدى. ۋنيۆەرسيتەتتى تامامداعاننان كەيىنگى ونىڭ ءومىر جولى بۇعان ايقىن دالەل. ستۋدەنت كەزىنىڭ وزىنەن-اق ول عىلىمعا بەيىمدىلىگىن بايقاتتى. العاشقى ماقالاسى «قازاقستان مۇعالىمى» گازەتىندە 1969 جىلدىڭ
1 قاڭتارىندا جاريالانعاندا باقتيار نەبارى فيلولوگيا فاكۋلتەتىنىڭ ءبىرىنشى كۋرسىنىڭ ستۋدەنتى بولاتىن.
ۋنيۆەرسيتەت بىتىرگەننەن كەيىن ول ۇزاق جىلدار رەسپۋبليكانىڭ وقۋ-اعارتۋ سالاسىندا قىزمەت ەتتى. رەسپۋبليكا وقۋ ءمينيسترىنىڭ كەڭەسشىسى, مينيسترلىكتىڭ باس باسقارما باسشىسى, ءبىلىم مينيسترلىگىنىڭ القا مۇشەسى بولدى. بۇل جىلدار ەلىمىزدىڭ تاريحىنداعى اسا كۇردەلى دە وتە جاۋاپتى كەزەڭدەر ەدى. بۇل ۋاقىتتاعى مينيسترلىك ماماندارى كەڭەس ءداۋىرىنىڭ قاساڭ قاعيدالارىنان قالاي جول تاۋىپ شىعۋدى مەڭگەردى. تاۋەلسىزدىك جىلدارىنىڭ العاشقى قيىندىقتارىن يىعىمەن كوتەردى. مىنە, وسى قاتاردا ەڭبەك ەتكەن باقتيار سمانوۆتىڭ دا ەلىمىزدىڭ ءبىلىم بەرۋ سالاسىنداعى بۇگىنگى جەتىستىكتەرىنە جول اشقان ۇلەسى از بولمادى.
بۇدان كەيىن بىرقاتار جىل باقتيار ءورىسباي ۇلى قازاقستان پرەزيدەنتى مەن مينيسترلەر كابينەتىنىڭ اپپاراتىندا جاۋاپتى قىزمەتتەر اتقاردى. ۇكىمەت جانىنداعى ءدىن ىستەرى جونىندەگى كەڭەستىڭ جاۋاپتى حاتشىسى بولا ءجۇرىپ ەلىمىزدەگى ءدىني ۇيىمدار جۇيەسىنىڭ جۇمىسىن جولعا قويۋدا كوپتەگەن ىسكە مۇرىندىق بولدى. بۇل جۇمىستا وعان ۋنيۆەرسيتەتتەگى اراب تىلىنەن العان ءبىلىمى مەن ءوزىنىڭ ءدىني ساۋاتىنىڭ تەرەڭدىگى, ارىدەن كەلە جاتقان تەگىنە ءتان قابىلەتى زور كومەك بولدى.
ال ءال-فارابي اتىنداعى قازاق ۇلتتىق ۋنيۆەرسيتەتىندە دوتسەنت, قازاق مەملەكەتتىك قىزدار پەداگوگيكا ينستيتۋتىندا فاكۋلتەت دەكانى بولعان جىلدار باقتيار ءورىسباي ۇلىنىڭ بويىنداعى ۇستازدىق تالانتىن مەيلىنشە اشا ءتۇستى. ماماندار بىلىكتىلىگىن جەتىلدىرۋ جونىندەگى الماتى وبلىستىق ينستيتۋتىنىڭ كافەدرا مەڭگەرۋشىسى, رەسپۋبليكالىق ينستيتۋتتىڭ ديرەكتورى لاۋازىمدارىندا, ودان كەيىن ون جىلدان استام ۋاقىت بويى اباي اتىنداعى قازاق ۇلتتىق پەداگوگيكالىق ۋنيۆەرسيتەتى اپپاراتىنىڭ باسشىلىعىندا ءجۇرىپ ەلىمىزدىڭ ءبىلىم بەرۋ جۇيەسىندەگى وسىناۋ اسا ءبىر ماڭىزدى ءارى ءبىلىم بەرۋ سالاسىنداعى قاجەتتى بۋىننىڭ باعىت-باعدارىن بۇگىنگى وسكەلەڭ تالاپتار دەڭگەيىنە بەيىمدەي رەفورمالاۋعا كۇش سالدى.
باقتيار ءورىسباي ۇلى جوعارىدا اتالعان مارتەبەلى قىزمەتتەردىڭ قىزىعىنا الدانىپ, ءوزىن-ءوزى لاۋازىمدىق ماقساتتاردىڭ شەڭبەرىندە قالىپ قويعان جوق. قايدا جۇرسە دە قولىنان قالامىن تاستامادى. قازاق ادەبيەتىنىڭ سان ءتۇرلى ماسەلەلەرىن قوزعايتىن ماقالالار جازدى, ادەبيەتتى وقىتۋدىڭ پروبلەمالارى جونىندە عىلىمي-زەرتتەۋ جۇمىستارىن جۇرگىزدى. كوز مايىن تاۋىسا جاساعان ەڭبەگىنىڭ ناتيجەسىندە كانديداتتىق ديسسەرتاتسيا جازدى.
باقتيار ءورىسباي ۇلى ءوزىنىڭ «قازاق ورتا مەكتەبىندەگى جوعارى سىنىپتاردا ەپيكالىق شىعارمالاردىڭ كەيىپكەرلەر بەينەسىن تالداۋ» دەگەن تاقىرىپتاعى كانديداتتىق ديسسەرتاتسياسىن ماسكەۋدىڭ قاق تورىندە ابىرويمەن قورعاپ شىعىپ, پەداگوگيكا عىلىمدارىنىڭ كانديداتى اتاندى. عىلىمداعى و باستا تاڭداعان جولىنا ادالدىق تانىتقان ادىسكەر عالىم بۇدان كەيىنگى كەزەڭدە دە وسى ءبىر اسا قاجەت سالادا بۇعان دەيىنگى جيناقتالعان باي تاجىريبە ماتەريالدارىن قورىتا وتىرىپ, ەندىگى جەردە ونىڭ عىلىمي-تەوريالىق تۇعىرىن تياناقتاۋعا دەن قويدى. سونىڭ ناتيجەسىندە «مەكتەپتە كوركەم شىعارمانى تالداۋدىڭ عىلىمي-ادىستەمەلىك نەگىزدەرى» دەگەن تاقىرىپتا دوكتورلىق ديسسەرتاتسيا قورعاپ, 2010 جىلى پەداگوگيكا عىلىمدارىنىڭ دوكتورى عىلىمي دارەجەسىن الدى. وسى زەرتتەۋدىڭ ناتيجەلەرى «كوركەم شىعارمانى تالداۋ ادىستەمەسى» دەگەن اتپەن «ۇلاعات» باسپاسىنان مونوگرافيا تۇرىندە كىتاپ بولىپ شىقتى.
بۇل ەڭبەكتىڭ قۇندىلىعى وندا قامتىلعان تاقىرىپتاردىڭ اتاۋىنان انىق كورىنىپ تۇرادى. اتاپ ايتقاندا, «مەكتەپتە كوركەم شىعارمانى تالداۋدىڭ تەوريالىق نەگىزدەرى», «كوركەم شىعارمانى تالداۋ تەحنولوگياسىنىڭ پەداگوگيكالىق-پسيحولوگيالىق جۇيەسى», «كوركەم شىعارمانى تالداي وقىتۋدى تاجىريبە ارقىلى بەكىتۋ», «جەكە تۇلعانىڭ قۇزىرەتتىلىگىن قالىپتاستىرۋعا كوركەم تۋىندىنى تالداۋدىڭ ىقپالى» دەگەن تاقىرىپتاردىڭ اياسىندا عالىم شىعارمانى تالداۋدىڭ قىر-سىرىنا تەرەڭ ۇڭىلە وتىرىپ, شىن مانىندەگى تەوريالىق تالداۋدىڭ ۇلگىسىن ۇسىنادى. ادىسكەر عالىم قۇرعاق تەوريالىق تۇجىرىمدارمەن شەكتەلمەيدى, ءاربىر قورىتىندىسىن ناقتى تاجىريبە بارىسىندا الىنعان دايەكتى ماتەريالدارمەن تۇيىندەپ وتىرادى.
كىتاپتاعى كورنەكتى قالامگەرلەر م.اۋەزوۆتىڭ «اباي جولى» ەپوپەياسىنا, س. مۇقانوۆتىڭ «بوتاگوز» رومانىنا, سونداي-اق ع. مۇسىرەپوۆتىڭ شىعارمالارىنا جاساعان تالداۋلارىندا ادىسكەر عالىم ءوزىنىڭ ۇزاق ۋاقىت بويى جالپى ءبىلىم بەرەتىن مەكتەپتەردە تاجىريبە جاساي ءجۇرىپ جيناقتاعان ەكسپەريمەنت ماتەريالدارىن وقىرمانعا مەيلىنشە تۇسىنىكتى دارەجەدە جەتكىزەدى.
بۇل ەڭبەكتىڭ استارىندا كوپ جىلدارعا سوزىلعان قىرۋار ىزدەنىس پەن مول تاجىريبە جاتقانى اقيقات. پەداگوگيكا سالاسىندا ورىندالعان ديسسەرتاتسيالىق جۇمىستار, مونوگرافيالىق زەرتتەۋلەر تىكەلەي وقۋ سىنىپتارىندا, ءدارىسحانالاردا جۇرگىزىلگەن تاجىريبەلەر مەن سىناقتاردىڭ ماتەريالدارىمەن «تۇزدىقتالماسا» ىسكە اسا بەرمەيدى. عالىم ەڭبەگىنىڭ باستى قۇندىلىعى دا وسىندا, ياعني ونىڭ تەوريالىق تياناقتىلىعىمەن قاتار, پراكتيكالىق جانە قولدانبالىلىق مازمۇنىندا جاتسا كەرەك. پەداگوگيكا عىلىمدارىنىڭ دوكتورى, پروفەسسور باقتيار سمانوۆتىڭ عىلىم-ادىستەمەلىك ماتەريالدارىنىڭ قورىندا ۇزاق جىلدار بويى جيناقتالعان اسا مول تاجىريبەلىك ماعلۇماتتارى مەن ادىستەمەلىك تۇجىرىمدارى نەگىزىندە جازىلعان وسى مونوگرافيالىق زەرتتەۋ كىتابىن ەلىمىزدىڭ جالپى ءبىلىم بەرەتىن مەكتەپتەرىنەن باستاپ جوعارى وقۋ ورىندارىنا دەيىنگى ءبىلىم بەرۋ باسپالداقتارىنداعى قازاق ادەبيەتىن وقىتۋ ارقىلى جاس ۇرپاقتىڭ ۇلتتىق قۇندىلىقتاردى قۇرمەتتەي بىلۋىنە, حالىقتىق رۋحاني قازىنالار جونىندە جان-جاقتى ءارى تەرەڭ ءبىلىم جيناۋىنا جول اشاتىن اسا پايدالى ەڭبەك دەۋگە بولادى.
كوركەم ادەبيەتتى وقىتۋ تەحنولوگياسى جونىندە جازىلعان ادىسكەر عالىم, اكادەميك ب.سمانوۆتىڭ عىلىمي ەڭبەكتەرى مۇنىمەن شەكتەلمەيدى. ونىڭ قالامىنان ءار جىلدارى تۋعان «كەيىپكەر بەينەسىن تالداۋ», «قازاق ادەبيەتىن وقىتۋ ادىستەمەسى», «س.مۇقانوۆتىڭ «بوتاگوز» رومانىن وقىتۋ», «ع.مۇسىرەپوۆ شىعارماشىلىعىن وقىتۋ», «كوركەم شىعارمانى تالداۋدىڭ ادىستەمەلىك ماسەلەلەرى», «مەكتەپتە كوركەم شىعارما تالداۋدىڭ ادىستەمەلىك نەگىزدەرى» كىتاپتارى مەن «كوركەم شىعارمانى تالداۋ ادىستەمەسى» اتتى مونوگرافياسى ەلىمىزدىڭ عىلىمي جانە پەداگوگيكالىق قاۋىمى تاراپىنان وزىندىك جوعارى باعاسىن الدى. مۇنىڭ سىرتىندا عالىم-ۇستاز ب.سمانوۆ بۇگىندە 450-دەن استام عىلىمي-زەرتتەۋ ەڭبەكتىڭ اۆتورى. ونىڭ ىشىندە 9 مونوگرافيا, 4 وقۋلىق, 7 وقۋ قۇرالى, 11 وقۋ-ادىستەمەلىك باسىلىم بار.
ول قازاقستان جازۋشىلار وداعىنىڭ جانە قازاقستان جۋرناليستەر وداعىنىڭ مۇشەسى.
پروفەسسور باقتيار سمانوۆتىڭ جان-جاقتى قالامگەرلىك قىرىن تانىتارلىق ۇلكەن ەڭبەگى – بۇگىنگى كۇننىڭ وزەكتى ماسەلەلەرىنە ارناپ جازىلعان ماقالالارى, ەلدىك پەن ازاماتتىق تۋرالى, تاۋەلسىزدىكتىڭ جەمىستەرى مەن ەلىمىزدىڭ بۇگىنى مەن ەرتەڭى جايىندا وي تولعاعان تۋىندىلارى. بۇل – قالامگەر عالىمنىڭ شىنايى ازاماتتىق ۇستانىمىن, ۇلتى مەن تۋعان جەرىنە دەگەن سۇيىسپەنشىلىگىن ايقىن بەدەرلەيتىن دۇنيەلەر.
اسىرەسە, ب.سمانوۆتىڭ ەلىمىزدى تاۋەلسىزدىك تۇعىرىنا قوندىرىپ, ارقا توسىنەن ەرتەگىنىڭ قالاسىنداي شاھار تۇرعىزعان قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىش ۇلى نازارباەۆ تۋرالى جازعان تولعاۋلارى باي مازمۇنىمەن, بىلىكتى تالداۋلارىمەن, كوركەم تىلىمەن وقىرماننىڭ ىقىلاسىنا يە بولدى. اتاپ ايتقاندا, ونىڭ «الداسپان», «ەلدىك پەن ەرلىكتىڭ يەسى», «تاۋەلسىزدىك جانە پرەزيدەنت», «ەگەمەندىك – ەركىن ەلدىڭ مۇراتى», «استانا – يستوريچەسكي پودۆيگ پرەزيدەنتا», «گرانديوزنايا مەچتا پرەزيدەنتا», «سيمۆول سمەلوستي ي نارودنوگو دۋحا» اتتى ماقالالارى سوڭعى جىلدارى رەسپۋبليكامىزدىڭ بەلدى دە بەدەلدى باسىلىمدارى «ەگەمەن قازاقستان», «كازاحستانسكايا پراۆدا» گازەتتەرى, «اقيقات», «مىسل» جۋرنالدارىندا باسىلدى. بۇعان باقتيار ءورىسباي ۇلىنىڭ ىلگەرىرەكتە جازىلعان د.قوناەۆ, ب.مومىش ۇلى, م.عابدۋللين, ش.ايتماتوۆ, س.قيراباەۆ, س.جوشىباەۆ, ش.قالداياقوۆ, ك.نارىباەۆ, م.جۇرىنوۆ سىندى تاعى باسقا ءبىرتۋار تۇلعالار تۋرالى ماقالالارىن قوسىڭىز...
سوڭعى جىلدارى اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە شاكىرتتەرگە ۇلتتىق تاربيە بەرۋ ماسەلەسى ەرەكشە قولعا الىندى. ۋنيۆەرسيتەتتە «ۇلتتىق تاربيە» كافەدراسى اشىلىپ, بارلىق ماماندىقتار مەن ءدارىسحانالاردا وسى اتتاس ءپان وقىتىلۋدا. ۇلت بولاشاعى ءۇشىن اسا قاجەت وسىناۋ يگى ءىستىڭ تۇعىرىن بەكىتىپ, كوشىن العا اپارۋ ىسىنە باقتيار ءورىسباي ۇلى دا ءوزىنىڭ ەلەۋلى ۇلەسىن قوسىپ كەلەدى. اتاپ ايتقاندا, ول ءپان مازمۇنىن ايقىندايتىن وقۋلىقتار مەن وقۋ قۇرالدارىن دايارلاۋعا بەلسەنە اتسالىسىپ, «ۇلتتىق تاربيە جانە ءدىن ماسەلەسى» اتتى وقۋ قۇرالىن جارىققا شىعاردى. وقۋ توپتارىنداعى نەگىزگى وقۋ قۇرالدارىنىڭ قاتارىنان بەرىك ورىن العان بۇل ەڭبەك بۇگىنگىدەي جات ءدىني اعىمدار مەن سەكەمدى سەكتالار قاپتاپ كەتكەن زاماندا ستۋدەنت جاستار ءۇشىن اسا پايدالى قۇرال بولىپ شىقتى.
عالىمنىڭ ازاماتتىق تۇلعاسى ونىڭ عىلىمي ەڭبەكتەرىنەن, عىلىمدا العا قويعان ماقسات-مۇراتتارىنان جانە سول ارقىلى كوتەرىلگەن ابىرويلى تۇعىرىنان سومدالسا كەرەك. الەمدەگى ادەبيەت اتتى ەڭ ىزگى عىلىمنىڭ ارقايسىسىمىزدىڭ جانىمىز بەن جۇرەگىمىزگە ءوزىنىڭ قاسيەتتى شۋاعىن ءسىڭىرىپ, بولاشاق ۇرپاقتاردى ىزگىلىك پەن پاراسات نۇرىمەن نارلەندىرۋ جولىندا «ينەمەن قۇدىق قازىپ» كەلە جاتقان قازاقستان رەسپۋبليكاسى ۇلتتىق عىلىم اكادەمياسىنىڭ اكادەميگى, حالىقارالىق ءبىلىم بەرۋ عىلىم اكادەمياسىنىڭ اكادەميگى, ەلارالىق شىڭعىس ايتماتوۆ اكادەمياسىنىڭ تولىق مۇشەسى, اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ پروفەسسورى, پەداگوگيكا عىلىمدارىنىڭ دوكتورى باقتيار ءورىسباي ۇلى سمانوۆتىڭ عالىمدىق تۇلعاسى دا, مىنە, وسىنداي حالقىنا قىزمەت ەتىپ كەلە جاتقان ەڭبەكتەرىمەن ولشەنسە كەرەك.
بالتاباي ابدىعازي ۇلى,
فيلولوگيا عىلىمدارىنىڭ دوكتورى, پروفەسسور
