– ءادىل نۇرلان ۇلى, الەمدى شارلاعان پاندەميا دەرتى ءومىردىڭ بارلىق سالاسىنا اسەر ەتكەنى بەلگىلى. وسى رەتتە دەپوزيت نارىعىندا قانداي جاعداي قالىپتاسقاندىعىن بىلگىمىز كەلەدى...
– 2021 جىل COVID-19 پاندەمياسىنا قاراماستان, جەكە سالىمشىلاردىڭ دەپوزيتتەرىنىڭ نارىعى وڭ سيپاتتا قالىپتاستى. قازاقستاندىقتاردىڭ ەكىنشى دەڭگەيلى بانكتەردەگى دەپوزيتتەرىنىڭ كولەمى وسۋدە. بۇل ءۇردىس 2020 جىلدان بەرى جالعاسىپ كەلەدى. 2021 جىلدىڭ 1 جەلتوقسانىنداعى جاعداي بويىنشا جەكە تۇلعالار سالىمدارىنىڭ جيىنتىق كولەمى 12,9 ترلن تەڭگەگە جەتتى. جىل باسىنان بەرگى ءوسىم 1,9 ترلن تەڭگەنى (+17,7%) قۇرادى.
جەكە تۇلعالاردىڭ ەكىنشى دەڭگەيلى بانكتەردەگى دەپوزيتتەرىنىڭ جالپى قۇرىلىمى ايتارلىقتاي وزگەرىسكە ۇشىراعان جوق. ادەتتەگىدەي سالىمدار نەگىزىنەن بۇقارالىق سەگمەنتتە (قوسا ساناعاندا 15 ملن تەڭگەگە دەيىن) شوعىرلانعان – 50%-دان جوعارى. قالعاندارى سايكەسىنشە ورتاشا (قالدىقتارى 15 ملن تەڭگەدەن 50 ملن تەڭگەگە دەيىن) جانە ءىرى (قالدىقتارى 50 ملن تەڭگەدەن جوعارى) سەگمەنت ارالىعىندا شامامەن 1/3 ۇيلەسىمىندە ورنالاستى.
– دوللارلانۋ دەڭگەيى قانشالىقتى تومەندەدى؟
– جەكە سالىمشىلار دەپوزيتتەرى سەگمەنتىندە دوللارلانۋ دەڭگەيى 2021 جىلدىڭ بارىسىندا ايتارلىقتاي تومەندەدى دەۋگە بولادى. وسىى جىلدىڭ باسىندا بۇل كورسەتكىش 38,7%-دى, ال 2021 جىلدىڭ جەلتوقسان ايىنىڭ باسىندا 36,4%-دى قۇرادى. دوللارلانۋدىڭ تومەندەۋى 2021 جىلى ۇلتتىق ۆاليۋتا باعامىنىڭ شارتتى تۇردە تۇراقتىلىعى بارىسىندا تەڭگەلىك دەپوزيتتەر بويىنشا تارتىمدى جاعدايلار اياسىندا ورىن الدى.
ەسكە سالا كەتەيىن, قور اي سايىن جەكە تۇلعالاردىڭ تەڭگەلىك دەپوزيتتەرى بويىنشا ماكسيمالدى سىياقى مولشەرلەمەلەرىن بەكىتەدى. ولار ۇلتتىق بانكتىڭ بازالىق مولشەرلەمەسىن جانە دەپوزيت نارىعىندا قالىپتاسقان ورتاشا مولشەرلەمەلەردى ەسكەرە وتىرىپ قالىپتاسادى. بۇل رەتتە تەڭگەلىك دەپوزيتتەر بويىنشا ماكسيمالدى مولشەرلەمەلەر ءبىر جىل ىشىندە (مەرزىمسىز دەپوزيتتەر بويىنشا) 9,0%-دان (جيناق سالىمدار بويىنشا) 14,0%-عا دەيىن وزگەردى. شەتەل ۆاليۋتاسىنداعى دەپوزيتتەر بويىنشا مولشەرلەمە 1% دەڭگەيىندە ساقتالدى.
– قازىرگى ۋاقىتتا قانداي سالىمدار سۇرانىسقا يە؟
– 2021 جىلى حالىق اراسىندا تەڭگەدەگى مەرزىمسىز سالىمدار ەرەكشە سۇرانىسقا يە بولدى. وسى جىلدىڭ 1 جەلتوقسانىنا قاراي ولاردىڭ بارلىق جەكە سالىمشىلاردىڭ دەپوزيتتەرىنە قاتىستى ۇلەسى 51,8%-دى, ال كولەمى – 4,2 ترلن تەڭگەنى قۇرادى. مۇنىڭ باستى سەبەبى – سالىمشىلار ءۇشىن مەرزىمسىز سالىمداردى كەز كەلگەن ۋاقىتتا تولىقتىرۋعا جانە ولاردان مەرزىمىنەن بۇرىن اقشا الۋعا بولاتىندىعىندا. باسقا دەپوزيتتەرگە قاراعاندا, بۇل سالىمداردىڭ تابىستىلىعى تومەن, بىراق سوعان قاراماستان ادامدار اقشالارىن وسىنداي ۇتقىر دا يكەمدى سالىمداردا ساقتاعاندى ءجون سانايدى. سونداي-اق جيناق سالىمداردىڭ كولەمى دە ارتا تۇسۋدە. بۇل سەگمەنتتە حالىق اراسىندا ۇلتتىق ۆاليۋتاداعى دەپوزيتتەر تانىمال. اسىرەسە تۇرعىندار ۇستىنەن اقشا سالۋعا بولمايتىن, مەرزىمى 1 جىلدىق جيناق سالىمدارعا باسىمدىق بەرەدى. ويتكەنى ولاردىڭ تابىستىلىعى ەداۋىر جوعارى (جىلىنا 13,9%-عا دەيىن).
– قازىرگى كەزدە ەگەر قانداي دا ءبىر بانك ليتسەنزياسىنان ايىرىلاتىن بولسا, ونىڭ سالىمشىلارى وتەم اقشالارىنا قانشا ۋاقىت ىشىندە قول جەتكىزەدى؟
– 2020 جىلدىڭ 1 قاڭتارىنان باستاپ كەپىلدىك بەرىلگەن وتەم تولەۋدىڭ باستالۋ مەرزىمى قىسقارتىلدى. سودان بەرى تولەمگە قابىلەتسىز بانك سالىمشىلارىنىڭ كەپىلدىك بەرىلگەن وتەمدى قالاي الاتىندىعى وسى بانك ليتسەنزياسىنان ايىرىلعان كۇننەن باستاپ, 35 جۇمىس كۇنى ىشىندە شەشىلەدى. بۇرىن بۇل بىرنەشە ايعا سوزىلاتىن.
الدىمەن بانك ليتسەنزياسىنان ايىرىلعان كۇننەن باستاپ 20 جۇمىس كۇنى ىشىندە ونىڭ ۋاقىتشا اكىمشىلىگى بانك اكتيۆتەرىنىڭ بارلىعى نەمەسە ءبىر بولىگىن جانە مىندەتتەمەلەرىنىڭ بارلىعى نەمەسە ءبىر بولىگىن ساتىپ الۋشى-بانككە ءبىر مەزگىلدە وتكىزۋ شاراسىن قولعا الادى. بۇل شارا قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگىنىڭ (اگەنتتىك) ماقۇلداۋىمەن جۇزەگە اسىرىلادى. بۇل رەتتە بانكتىڭ كەپىلدىك بەرىلگەن دەپوزيتتەرى بويىنشا مىندەتتەمەلەرى ساتىپ الۋشى-بانككە تولىق كولەمدە وتكىزىلەدى. ءارى قاراي سالىمشىلار وزدەرىنە تيەسىلى اقشانى ساتىپ الۋشى-
بانكتەن قولما-قول اقشامەن الۋ, باسقا بانككە اۋدارۋ نەمەسە وسى بانكتە جاڭا دەپوزيتكە سالۋ قۇقىعىنا يە بولادى.
ەگەر ساتىپ الۋشى بانك تابىلماسا نەمەسە اگەنتتىك مۇنداي وپەراتسيانى جۇرگىزۋدەن باس تارتسا, قور سالىمشىلار الدىنداعى مىندەتتەمەلەردى ءوز جاۋاپكەرشىلىگىنە الادى.
بانك ليتسەنزياسىنان ايىرىلعان كۇننەن باستاپ 30 جۇمىس كۇنى ىشىندە قور تولەمدەردىڭ باستالۋ كۇنى, اگەنت بانكتىڭ تاعايىندالعاندىعى, ونىڭ مەكەنجايى مەن تولەم مەرزىمى تۋرالى باق-تا, ونىڭ ىشىندە مەرزىمدى ءباسپاسوز باسىلىمدارىندا جانە ءوزىنىڭ, سونداي-اق اگەنتتىك پەن اگەنت بانكتىڭ سايتتارىندا قازاق جانە ورىس تىلدەرىندە اقپارات جاريالايدى.
وتەم تولەۋ حابارلاندىرۋ جاريالانعان كۇننەن باستاپ بەس جۇمىس كۇنى ىشىندە باستالادى. اقشا سالىمشىلاردىڭ ءوتىنىش بەرۋىنە قاراي تولەنەدى. وتەم الۋ قۇقىعى راستالعان سوڭ, وعان تيەسىلى وتەم اقشا 5 (بەس) جۇمىس كۇنى ىشىندە تولەنەدى. سالىمشىلار وتەم اقشانى قولما-قول اقشامەن الۋعا, باسقا بانككە اۋدارۋعا نەمەسە سول اگەنت بانكتە جاڭا دەپوزيتكە سالۋعا قۇقىلى.
– سالىمشىلارعا وتەم تولەۋ مەرزىمى بولاشاقتا تاعى دا قىسقارۋى مۇمكىن بە؟
– ارينە. قازىردىڭ وزىندە سالىمشىلارعا وتەم تولەۋ مەرزىمىن ەلەۋلى تۇردە قىسقارتۋعا قول جەتكىزىلدى. مىسالى, بيىل 25 ماۋسىمدا ليتسەنزياسىنان ايىرىلعان «Capital Bank Kazakhstan» اق سالىمشىلارىنا اگەنت بانك ارقىلى وتەم تولەۋ – بانك ليتسەنزياسىنان ايىرىلعان كۇننەن باستاپ 6 (التى) جۇمىس كۇنى وتە سالىسىمەن باستالدى. بۇل – رەكوردتىق كورسەتكىش. بۇعان دەيىن «Tengri Bank» اق جانە «AsiaCredit Bank (ازياكرەديت بانك)» اق سالىمشىلارىنا وتەم تولەۋ 8 جۇمىس كۇنىنەن كەيىن باستالدى.
– كەپىلدىك بەرىلگەن وتەمدى الۋدىڭ ناقتى مەرزىمى بار ما؟
– بار. ءوتىنىش قابىلداۋ مەرزىمى – كەپىلدىك بەرىلگەن وتەمدى تولەۋ باستالعان كۇننەن باستاپ 1 ء(بىر) جىلدى قۇرايدى. بۇل رەتتە ليتسەنزياسىنان ايىرىلىپ, تاراتۋ ۇدەرىسىنە ەنگىزىلگەن بانكتەردىڭ سالىمشىلارى ءۇشىن تولەم مەرزىمى سوڭعى كۇنىن قوسا العاندا 2022 جىلدىڭ 1 مامىرىنا دەيىن بولسا, ولاردىڭ ىشىندە «Capital Bank Kazakhstan» اق سالىمشىلارى بويىنشا وتەم تولەۋ مەرزىمى سوڭعى كۇنىن قوسا العاندا 2022 جىلدىڭ 3 شىلدەسىنە دەيىن.
– ال ءبىر جىل ىشىندە تالاپ ەتىلمەگەن وتەمنىڭ تاعدىرى نە بولادى؟
– ەگەر وسى مەرزىم ىشىندە سالىمشىلار وزدەرىنە تيەسىلى اقشالارىن الىپ ۇلگەرمەسە, تالاپ ەتىلمەگەن وتەم سومالارىن قور ولاردىڭ بىرىڭعاي جيناقتاۋشى زەينەتاقى قورىنداعى (بجزق) زەينەتاقى شوتتارىنا ەرىكتى زەينەتاقى جارنالارى رەتىندە اۋدارادى. مۇنداي شوتتاردى اشۋ ءۇشىن بجزق-عا بارۋدىڭ قاجەتى جوق. ولار اۆتوماتتى تۇردە اشىلادى.
وتەم تولەۋ مەرزىمى اياقتالۋعا 30 جۇمىس كۇنى قالعاندا قور سالىمشىلارعا وتەم تولەۋ اياقتالاتىن كۇن جانە 1 جىل بويى تالاپ ەتىلمەگەن وتەم سومالارىن بجزق-عا اۋداراتىنى تۋرالى باق جانە ءوز سايتى ارقىلى اقپارات جاريالايدى. بۇدان باسقا سالىمشىلار زاڭناماعا قايشى كەلمەيتىن وزگە دە اقپارات بەرۋ ادىستەرىمەن قۇلاعدار ەتىلەدى.
– زەينەتاقى قورىنا اۋدارىلعان وتەم اقشالاردى قالاي الۋعا بولادى؟
– ءبىر جىل ىشىندە دالەلدى سەبەپتەرمەن (اسكەري قىزمەتكە ورنالاسۋ, دەپوزيتوردىڭ شەتەلدە, باس بوستاندىعىنان ايىرۋ ورىندارىندا بولۋى, مۇرا قابىلداۋى جانە ت.ب.) تولەم الۋعا ءوتىنىش بەرە الماعان سالىمشىلار ءۇشىن قورعا ءوتىنىش پەن راستاۋشى قۇجاتتاردى ۇسىنا وتىرىپ, وتەم الۋ قۇقىعى ساقتالادى. دالەلدى سەبەپتەردىڭ ءتىزىمى «قازاقستان رەسپۋبليكاسىنىڭ ەكiنشi دەڭگەيلى بانكتەرiندە ورنالاستىرىلعان دەپوزيتتەرگە مiندەتتi كەپiلدiك بەرۋ تۋرالى» زاڭىندا بەلگىلەنگەن.
– قازىرگى تاڭدا ليتسەنزياسىنان ايىرىلعان قانداي بانكتەردىڭ سالىمشىلارىنا قور اتىنان جانە ەسەبىنەن وتەم اقشا تولەنۋدە؟
– قور قازىرگى ۋاقىتتا بارلىق بانك وپەراتسيالارىن جۇرگىزۋ ليتسەنزياسىنان ايىرىلعان ەكىنشى دەڭگەيلى 9 بانكتىڭ سالىمشىلارىنا وتەم تولەۋدى جالعاستىرۋدا. ولار: «ۆاليۋت-ترانزيت بانك» اق, «قازينۆەستبانك» اق, «Delta Bank» اق, «استانا بانكى» اق, «Qazaq Banki» اق, «ەكسيمبانك قازاقستان» اق, «Tengri Bank» اق, «AsiaCredit Bank (ازياكرەديت بانك)» اق جانە «Capital Bank Kazakhstan» اق.
2021 جىلدىڭ 1 جەلتوقسانىنداعى جاعداي بويىنشا قوردىڭ ارنايى رەزەرۆى ەسەبىنەن 150 مىڭنان استام جەكە سالىمشىعا 113,7 ملرد-تان استام تەڭگەگە وتەم تولەندى.
– قىزمەتتەردى قاشىقتان (ونلاين) الۋ ءاربىر قازاقستاندىق ءۇشىن قالىپتى جاعدايعا جانە نورماعا اينالدى. وسى رەتتە قور وتەم تولەۋدى اۆتوماتتاندىرۋ بويىنشا قانداي شارالاردى جۇزەگە اسىرىپ جاتىر؟
– 2021 جىلى ۇلتتىق بانك پەن قوردىڭ بىرلەسكەن باستاماسى ارقىلى ليتسەنزياسىنان ايىرىلعان بانكتەردىڭ سالىمشىلارى كەپىلدىك بەرىلگەن وتەمدى الۋعا ءوتىنىشتى ۇيدەن شىقپاي-اق ونلاين بەرۋگە قول جەتكىزدى.
دەپوزيتورلارعا قاشىقتان قىزمەت كورسەتۋ مۇمكىندىگىن قامتاماسىز ەتۋ ءۇشىن قور 2021 جىلى سىنامالى رەجىمدە تولەمدەردىڭ ەلەكتروندى پورتالىن ىسكە قوستى. ول قازىر بارلىق بانك وپەراتسيالارىن جۇرگىزۋ ليتسەنزياسىنان ايىرىلعان بانكتەردىڭ سالىمشىلارىنا قولجەتىمدى.
قازىرگى ۋاقىتتا جاقىن شەتەل اۋماقتارىندا تولەمدەردىڭ ەلەكتروندى پورتالىنىڭ بالاماسى جوق. مۇنداي سەرۆيس وڭتۇستىك كورەيا, فينليانديا جانە تايۆان ەلدەرىندە جۇزەگە اسىرىلعان. ال كانادا مەن گەرمانيادا ونى ەنگىزۋ جۇمىستارى ءالى ءجۇرىپ جاتىر.
كەپىلدىك بەرىلگەن وتەمدى الۋعا ءوتىنىشتى تەك شوتتاردىڭ, كارتوچكالار مەن دەپوزيتتەردىڭ يەلەرى عانا ونلاين بەرە الادى. بۇل رەتتە ءداستۇرلى بانكتىك قىزمەت كورسەتۋ ءتاسىلىن قالايتىن, سونداي-اق سالىمشىلار اتىنان ءوتىنىش بەرە الاتىن ءۇشىنشى تۇلعالار (مۇراگەرلەر, سەنىمحات بويىنشا وكىلدەر جانە باسقا دا قۇقىق يەلەنۋشىلەر) ءۇشىن اگەنت بانك ارقىلى كەپىلدىك بەرىلگەن وتەم تولەۋ ءتارتىبى ساقتالادى.
– بيىل قىركۇيەك ايىندا قور بانكتەردىڭ قارجىلىق
احۋالىن باعالاۋدىڭ جاڭا مودەلىن ىسكە قوستى. وسى تۋرالى ايتىپ وتسەڭىز؟
– قاتىسۋشى بانكتەردىڭ قارجىلىق جاعدايىن باعالاۋدىڭ جاڭا مودەلى قورعا بانكتەردىڭ اتقاراتىن قىزمەتتەرىنىڭ اعىمداعى تاۋەكەلدەرىن باعالاۋعا, سونداي-اق بانكتىڭ قارجىلىق جاعدايىنا اسەر ەتۋى مۇمكىن الەۋەتتى قاۋىپ-قاتەرلەردى ەسكەرۋگە مۇمكىندىك بەرەدى. ودان باسقا, جاڭا مودەلدە تاۋەكەلگە باعدارلانعان ءتاسىل جۇزەگە اسىرىلعان. ول بانك قىزمەتىنىڭ نەگىزگى باعىتتارىنا ساپالى مونيتورينگ جاساۋعا جول اشادى. سونىڭ ناتيجەسىندە, قاتىسۋشى بانكتەرگە ارنالعان جارنالاردىڭ مولشەرلەمەسىن ءادىل ەسەپتەۋگە قول جەتكىزىلەدى.
ايتا كەتەلىك, قوردىڭ بولاشاق كەپىلدىك بەرىلگەن وتەم سومالارىن تولەۋگە ارنالعان ارنايى رەزەرۆى بانكتەردىڭ وسى جارنالارى ەسەبىنەن قالىپتاسادى.
– كەپىلدىك بەرىلگەن وتەم قوردىڭ ارنايى رەزەرۆى ەسەبىنەن تولەنەتىندىگى بەلگىلى. قازىر ونىڭ كولەمى قانداي؟
– 2021 جىلدىڭ 1 جەلتوقسانىنا قاراي قوردىڭ ارنايى رەزەرۆىندە 682 ملرد-قا جۋىق تەڭگە, ال جارعىلىق كاپيتال مولشەرىنىڭ 70%-ىن قوسا ەسەپتەگەندە (زاڭ بويىنشا وتەم تولەۋگە قولدانىلۋى مۇمكىن), 847 ملرد-تان استام تەڭگە بار.
ارنايى رەزەرۆتىڭ دەڭگەيى ەلىمىز بويىنشا كەپىلدىك بەرىلگەن بۇكىل دەپوزيتتەر سوماسىنىڭ شامامەن 7%-ىن قۇرايدى. بۇل «قازاقستان رەسپۋبليكاسىنىڭ ەكiنشi دەڭگەيدەگى بانكتەرiندە ورنالاستىرىلعان دەپوزيتتەرگە مiندەتتi كەپiلدiك بەرۋ تۋرالى» زاڭىندا كورسەتىلگەن ماقساتتى دەڭگەيدەن (5%) جوعارى.
حالىقارالىق ستاندارتتارعا سايكەس دەپوزيتتەردى قورعاۋ جۇيەسىنىڭ رەزەرۆتەرى بۇكىل قارجى جۇيەسىندەگى دەپوزيتتىك بازانى وتەۋگە ەمەس, الداعى كۇتىلەتىن زالالداردىڭ دەڭگەيىنە سايكەس قالىپتاستىرىلادى.
قوردىڭ ارنايى رەزەرۆى جەكە تۇلعالاردىڭ بارلىق دەپوزيتتەرى بويىنشا كەپىلدىك بەرىلگەن وتەم تولەۋگە تولىعىمەن جەتكىلىكتى. قازىرگى ۋاقىتتا قور ەلىمىزدەگى بۇكىل بانك سەكتورىنىڭ دەپوزيتتىك بازاسىنداعى شوتتاردىڭ 99,8%-ىنا تولىق كولەمدە كەپىلدىك بەرەدى. بۇل حالىقتىڭ بانك جۇيەسىنە دەگەن سەنىمىن ودان ءارى نىعايتا تۇسەدى. ياعني «سالىم سىزدەن, ساقتاندىرۋ بىزدەن!».
– بيىل قور سالىمشىلار اراسىندا ونلاين ساۋالداما جۇرگىزگەنى بەلگىلى. قانداي ماڭىزدى سۇراقتارعا جاۋاپ الىندى؟
– ءيا, كۇزدىڭ العاشقى ايىنىڭ 1-30 جۇلدىزى ارالىعىندا 14 بانكتىڭ سايتتارىندا بارلىق نيەت بىلدىرۋشىلەرگە ونلاين ساۋالداماعا قاتىسۋعا مۇمكىندىك بەرىلدى. بيىل ساۋالداماعا ەلىمىزدىڭ 128 قالاسى جانە باسقا دا ەلدى مەكەندەردەن بارلىعى 2 773 ادام قاتىستى. قاتىسۋشىلاردىڭ جاس دەڭگەيى 16 جاستان 79 جاس ارالىعىندا بولدى.
قازاقستاندىقتار اقشا جيناۋ ءۇشىن دەپوزيت اشۋ بارىسىندا نەنى باسشىلىققا الاتىندىعى, سونداي-اق دەپوزيتتەرگە كەپىلدىك بەرۋ جۇيەسى تۋرالى حاباردارلىق دەڭگەيىن انىقتاۋ اياسىندا جاۋاپ بەرۋشىلەردىڭ 92%-ى دەپوزيت اشاتىندىقتارىن ءبىلدىردى. ونىڭ ىشىندە 19%-ى سىياقىسى جوعارى, مەرزىمىنەن بۇرىن الۋعا بولمايتىن جيناق سالىمداردى اشقاندى قالاسا, 73%-ى سىياقىسى تومەن, بىراق كەز كەلگەن ۋاقىتتا ۇستىنەن اقشا سالۋعا جانە اقشا الۋعا بولاتىن دەپوزيت اشۋدى ءجون سانايدى. ال 6%-ى ارتىق اقشاعا ۆاليۋتا ساتىپ الاتىن بولسا, 2%-ى اقشا جينامايدى نەمەسە ولاردى كارتوچكالارىندا قالدىرادى.
قازاقستاندىقتاردىڭ 22%-ى
دەپوزيت ءتۇرىن تاڭداعاندا جوعارى سىياقى مولشەرلەمەسىنە كوپ كوڭىل بولەدى ەكەن. بۇل رەتتە ولاردىڭ 63%-ى ءۇشىن باستى تالاپ – دەپوزيتتى تولىقتىرۋعا جانە ودان كەرەك كەزىندە اقشا الۋعا بولاتىندىعى. راسىندا دا قازىر مەرزىمسىز سالىمداردىڭ سانى باسىمدىققا يە. ولاردىڭ ۇلەسى جەكە تۇلعالاردىڭ جيىنتىق دەپوزيتتەرىنىڭ 62%-ىن قۇرايدى.
جالپى, ساۋالداما ناتيجەسى جاۋاپ بەرۋشىلەردىڭ دەپوزيتتەرگە كەپىلدىك بەرۋ جۇيەسى تۋرالى حاباردارلىعىنىڭ جوعارى دەڭگەيدە ەكەندىگىن پاش ەتتى: 70%-ى دەپوزيتتەرگە كەپىلدىك بەرىلگەن ماكسيمالدى سومالار تۋرالى, ونىڭ ىشىندە جيناق سالىمدار بويىنشا كەپىلدىك سوماسىنىڭ جوعارى ەكەندىگىن, 76%-ى وتەم اقشانى قور تولەيتىندىگىن, 68%-ى وتەمنىڭ تەڭگەمەن تولەنەتىندىگىن, ال 63%-ى زاڭ – بارشا قازاقستاندىقتارعا بانكتەردەگى جيناق اقشالارىنا قاتىستى قورعاۋ قۇقىعىن بەرەتىنىن جاقسى بىلەدى.
– اڭگىمەڭىز ءۇشىن راحمەت.
