تاراز قالاسىندا «ينۆاتاكسي» قىزمەتى 2016 جىلدان باستاپ قىزمەت كورسەتىپ كەلەدى. بۇعان دەيىن مۇمكىندىگى شەكتەۋلى جانداردى 6 كولىك تاسىمالداسا, ەندى ولاردىڭ قاتارى تاعى 2 كولىكپەن تولىقتى. «ينۆاتاكسي» جولاۋشىلاردى باراتىن جەرىنە دەيىن تەگىن تاسىمالدايدى. ءوز سوزىندە وبلىس اكىمى الداعى ۋاقىتتا دا ەرەكشە قاجەتتىلىكتەرى بار ازاماتتاردى الەۋمەتتىك قولداۋ جۇمىستارى جالعاساتىنىن ايتتى. سونىمەن قاتار ءاربىر مەملەكەتتىڭ, ءاربىر ازاماتتىڭ ەڭ نەگىزگى ماقساتتارىنىڭ ءبىرى از قامتىلعان, كوپبالالى, مۇمكىندىگى شەكتەۋلى ادامدارعا قولداۋ كورسەتىپ, كومەكتەسۋ ەكەنىن جەتكىزدى.
ء«بىزدىڭ مەملەكەتىمىز 30 جىلدىڭ ىشىندە قيمىلداۋ قابىلەتى شەكتەۋلى ازاماتتارعا قولداۋ ءبىلدىرىپ كەلەدى. ەلىمىزدىڭ تۇڭعىش پرەزيدەنتى نۇرسۇلتان نازارباەۆ ەگەمەندىك العان كۇننەن باستاپ ەڭ ءبىرىنشى وسىنداي جاندارعا كومەكتەسىپ, بارىنشا قولداۋ كەرەكتىگىن ايتقان بولاتىن. بارلىعى تولىعىمەن ورىندالدى دەپ ايتا المايمىز. دەگەنمەن, ماسەلەلەر رەتىمەن شەشىلىپ كەلەدى. وسىنداعى يپپوتەراپيا ورتالىعىن كەلەسى جىلى ءبىتىرىپ, ەل يگىلىگىنە بەرەمىز. اسىرەسە بالالار مەن جاستاردىڭ اياققا تۇرىپ, قادامدارىن نىق باسۋىنا سەبەپشى بولساق دەگەن ماقساتىمىز بار. قازىر بۇل ورتالىققا 45-كە جۋىق بالا كەلىپ, ەم الىپ ءجۇر ەكەن. عيمارات تولىق اشىلعان سوڭ, بالالار قاتارى كوبەيەدى», دەدى ب.ساپارباەۆ.
ەرەكشە قاجەتتىلىگى بار جانداردى تاسىمالداۋعا ارنالعان JAC Sunray ماركالى كولىگىنىڭ ىشىندە اربالارعا ارنالعان 300 كيلوعا دەيىنگى سالماققا ەسەپتەلگەن ارنايى كوتەرگىش ورناتىلعان. التى جولاۋشى ورنى جانە ەكى ارباعا ارنالعان ورىن بار.
سالتاناتتى شارادا «اسار» زاڭدى تۇلعالار بىرلەستىگىنىڭ باسشىسى رۋسلان تولەگەنوۆ ءسوز الىپ, وبلىس باسشىلىعىنا العىسىن ءبىلدىردى. «الەۋمەتتىك سالادا مەملەكەتتىك قولداۋدىڭ جىل سايىن ارتىپ كەلە جاتقانى بەلگىلى. تاۋەلسىزدىك مەرەكەسى قارساڭىندا تاعى ءبىر يگىلىككە كەنەلىپ وتىرعانىمىز سونىڭ ايعاعى. ءبىزدىڭ بارلىق باستامالارىمىز وبلىس اكىمى تاراپىنان قولداۋ تابۋدا. بۇل ءۇشىن ريزاشىلىعىمىزدى بىلدىرەمىز», دەدى ول.
سونىمەن قاتار ورتالىقتا قىزمەت الۋشىلاردىڭ اتا-انالارى دا ريزاشىلىقتارىن جەتكىزدى. «بۇل ءبىز ءۇشىن وتە قۋانىشتى جاعداي. ءوزىمىز سەكىلدى ەرەكشە بالالارى بار اتا-انالارعا ۇلكەن كومەك. وسىنداي مۇمكىندىك بەرىپ, جاعداي جاساعان وبلىس باسشىلىعىنا اتا-انالاردىڭ اتىنان ۇلكەن راحمەتىمدى ايتامىن», دەدى ءلايلا راحمانبەكقىزى.
بۇدان كەيىن وبلىس اكىمى وڭالتۋ ورتالىعىنا قاراستى عيمارات پەن سپورت الاڭىن, تىرەك-قيمىل اپپاراتى جانە سال اۋرۋىنا شالدىققان ادامداردى اتقا مىنگىزىپ ەمدەۋگە ارنالعان نىساننىڭ قۇرىلىسىن ارالاپ, اتقارىلىپ جاتقان جۇمىستاردىڭ بارىسىمەن تانىستى.
