بىرىككەن ۇلتتار ۇيىمىنىڭ OCHA گۋمانيتارلىق اگەنتتىگىنىڭ حابارلاۋىنشا, مۇقتاج 183 ميلليون ادامعا كومەكتەسۋ ءۇشىن رەكوردتىق دەڭگەيدە 41 ميلليارد دوللار قاجەت. بۇل سوما بيىلعى كەتكەن قاراجاتتان كوپ.
OCHA باسشىسى مارتين گريففيتس بەيسەنبىدە وتكەن ءباسپاسوز ءماسليحاتىندا مۇقتاج ادامداردىڭ سانى سونشالىقتى كوپ بولماعانىن ايتىپ وتىر. «كليماتتىق داعدارىس الەمدەگى ەڭ وسال توپقا كىرەتىن ادامدارعا تىكەلەي ءاسەر ەتىپ وتىر. ۇزاق ۋاقىتقا سوزىلعان قاقتىعىستار جالعاسىپ جاتىر, الەمنىڭ بىرنەشە بولىگىندە, اتاپ ايتقاندا, ەفيوپيا, ميانما جانە اۋعانستاندا احۋال ناشارلادى», دەدى م.گريففيتس.
OCHA جاھاندىق گۋمانيتارلىق شولۋ ەسەبىندە كەلەسى جىلى الەم بويىنشا 274 ميلليون ادام شۇعىل كومەككە مۇقتاج بولاتىنىن ەسكەرتتى. بۇل 2021 جىلعى كورسەتكىشتەن 17 پايىزعا جوعارى.
قۇجاتتا 2022 جىلى ءاربىر 29 ادامنىڭ بىرەۋى كومەككە ءزارۋ بولاتىنى ايتىلعان. وسىلايشا, 2015 جىلدان بەرى بۇل كورسەتكىش 250 پايىزعا وسكەن. ول كەزدە ءار 95 ادامنىڭ بىرەۋى كومەككە زار ەدى.
بيىل دونورلار 17 ميلليارد دوللاردان استام قارجى ءبولدى. بۇل بۇۇ سۇراعان سومانىڭ جارتىسىنا دا جەتپەيدى. «قانشا تالپىنساق تا, 41 ميلليارد دوللار بەرىلمەيتىنىن بىلەمىز», دەيدى م.گريففيتس.
بۇۇ-نىڭ گۋمانيتارلىق ۇيىمىنىڭ باسشىسى وسى قۇرىلىمنىڭ ازىق-ت ۇلىك جانە اۋىل شارۋاشىلىعى ۇيىمىنىڭ ەسەپتەرىن كەلتىردى. قۇجاتتا بىرقاتار ەلدى مەكەندە 45 ميلليون ادام اشارشىلىق الدىندا تۇرعانى ايتىلعان.
بۇۇ قازىرگە دەيىن وڭتۇستىك سۋدانداعى جارتى ميلليون ادامعا اسەر ەتكەن اشتىقتى توقتاتتى. سونداي-اق يەمەندەگى 10 ميلليون ادامعا مەديتسينالىق كومەك كورسەتتى.
اۋعانستان, سيريا, يەمەن, ەفيوپيا جانە سۋدانداعى داعدارىس ەڭ كوپ قارجىلاندىرۋدى قاجەت ەتەدى. اسىرەسە, اۋعانستانداعى 24 ميلليوننان استام ادام ءومىرىن ساقتاپ قالۋ ءۇشىن كومەككە مۇقتاج.
