ۋوكەشا قالاسىنىڭ باسشىسى شون رەيللي جۋرناليستەرگە «مەرەكە كۇنى قالادا قورقىنىشتى ءارى جان تۇرشىكتىرەرلىك وقيعا بولدى» دەدى. سونىمەن بىرگە قۋانىشتى بولىسۋگە جينالعان جۇرتشىلىقتىڭ اقىر سوڭىندا جاراقات پەن قايعىعا دۋشار بولعانى وكىنشتى ەكەنىن ايتتى.
ۋوكەشا پوليتسيا باسقارماسىنىڭ باسشىسى دەن تومسون كۇدىكتىنىڭ قولعا تۇسكەنىن حابارلادى. «قالا ورتاسىندا ءوتىپ جاتقان شەرۋگە باسىپ كىرگەن جول تالعامايتىن كولىكتىڭ جۇرگىزۋشىسىن انىقتادىق. 20-دان استام ادامنىڭ جاراقاتتانعانى بەلگىلى بولىپ وتىر», دەدى پوليتسيا وكىلى جۋرناليستەرگە.
وقيعانىڭ تەرروريستىك اكتىگە قاتىسى بار-جوعى ءالى انىقتالمادى. دەگەنمەن الەۋمەتتىك جەلىدە تاراعان بەينەجازبالاردا كولىكتىڭ ونداعان ادامدى ادەيى باسقانى انىق كورىنەدى. ودان كەيىن قۇقىق قورعاۋ ورگاندارىنىڭ قىزمەتكەرلەرى وق اتىپ, كولىك شەكتەۋلەردىڭ بىرىنە سوقتىعىسادى.
قالانىڭ باس پروكۋرورى دجوش كاۋل Twitter-دەگى پاراقشاسىندا «ۋوكەشاداعى وقيعاعا قاتىستى «سۇمدىق» دەگەننەن باسقا ءسوز جوق» دەپ جازادى. سونىمەن قاتار كىنالىلەر تولىقتاي زاڭ الدىنا جاۋاپ بەرەتىنىنە سەنىمدى ەكەنىن ءبىلدىردى.
