تۇرعىندار 12 قاراشا كۇنى كۇندىز قىزىل كىتاپقا ەنگەن دۋاداقتى 1ۆ شاعىن اۋدانىنداعى «تاس سارايى» قۇرىلىس ماتەريالدارى دۇكەنىنىڭ اۋماعىندا ورنالاسقان كولىك جۋ ورنىنان بايقاعان. مۇنداي قۇستى العاش رەت كورگەن تۇرعىن ونى بەينە تاسپاعا ءتۇسىرىپ العان. سونىمەن قاتار ول دۋاداقتىڭ اياعىندا ارناۋلى بەلگى بولعانىن ايتادى. ءدال وسى بەينە تاسپا وبلىستىق اۋماقتىق ينسپەكتسياسىنىڭ دا نازارىن اۋداردى.
ينسپەكتسيا مالىمەتىنشە, بەينە تاسپاداعى قۇس - قازاقستاننىڭ قىزىل كىتابىنا ەنگىزىلگەن دۋاداق. جىل سايىن حالىقارالىق كەلىسىمشارتقا سايكەس شىمكەنتتەگى تالىمباقتا وسىرىلگەن دۋاداقتار ارناۋلى رەيسپەن ماڭعىستاۋ وبلىسىنا جەتكىزىلىپ, تابيعات اياسىنا جىبەرىلەدى. وسى جىلدىڭ شىلدەسىندە جانە قىركۇيەگىندە ماڭعىستاۋ وبلىسىنا 2 مىڭ دۋاداق جەتكىزىلىپ, تابيعي ورتاعا جىبەرىلگەن.
