«قۇرمەتتى مەملەكەت جانە ۇكىمەت باسشىلارى, قىمباتتى دوستار! تۇرىك تىلدەس مەملەكەتتەر ىنتىماقتاستىعى كەڭەسىنىڭ VIII سامميتىنە قاتىسۋشىلارعا ىستىق سالەمىمدى جولدايمىن. پرەزيدەنت رەجەپ تايىپ ەردوعانعا بۇگىنگى كەزدەسۋگە تۇركى كەڭەسىنىڭ قۇرمەتتى توراعاسى رەتىندە قاتىسۋعا شاقىرعانى ءۇشىن شىن جۇرەكتەن ريزاشىلىعىمدى بىلدىرەمىن. بيىل كوكتەمدە مەنىڭ باستاماممەن وتكەن تۇركى كەڭەسىنىڭ بەيرەسمي ونلاين سامميتىنە قاتىسقاندارىڭىز ءۇشىن العىسىم زور. سىزدەردىڭ شەشىمدەرىڭىز بويىنشا تۇركىستان قالاسى تۇركى الەمىنىڭ رۋحاني استاناسى مارتەبەسىنە يە بولدى», دەپ باستادى ەلباسى سالەمىن.
سونداي-اق ول جۋىردا تۇركىستاندا تۇركىتىلدەس مەملەكەتتەر پارلامەنتتىك اسسامبلەياسىنىڭ ح مەرەيتويلىق سەسسياسى ءساتتى وتكەنىن ەسكە سالدى.
«بولاشاقتا قاسيەتتى تۇركىستانعا سىزدەردىڭ دە جولدارىڭىز تۇسەدى دەپ سەنەمىن. قادىرلى سامميتكە قاتىسۋشىلار! ەلدەرىمىزدىڭ ەگەمەندىگىن ەڭ العاش باۋىرلاس تۇركيانىڭ تانىعانى ءبىزدىڭ حالىقتارىمىزدىڭ ەسىندە ماڭگىلىك ساقتالادى. بۇل بەلەسكە بارشا تۇركى ەلدەرىنىڭ تاريحي جەتىستىكتەرمەن جەتكەنى - ءبىز ءۇشىن زور ماقتانىش. سونىمەن قاتار مەملەكەتتىرىمىز الدىنا ءورشىل ۇلتتىق دامۋ ماقساتترىن قويىپ وتىر», دەدى ەلباسى.
