30 قازان كۇنى ساعات 19:30-دا بايعانين اۋدانىنىڭ نوعايتى اۋىلىنان بەس شاقىرىم جەردەگى «اقتوبە-اتىراۋ» اۆتوجولىندا جول-كولىك وقيعاسىنان ەكى ادام قايتىس بولدى.
بەلگىلى بولعانداي, «Mitsubishi Lancer» اۆتوكولىگىنىڭ 21 جاستاعى جۇرگىزۋشىسى اقتوبە قالاسى باعىتىندا 308 شاقىرىم جەردە «اقتوبە-اتىراۋ» اۆتوجولىندا ءجۇرىپ كەلە جاتىپ, باسىپ وزۋ كەزىندە قارسى باعىتتاعى «Volkswagen Passat» اۆتوكولىگىمەن بەتپە-بەت سوعىسقان.
جول-كولىك وقيعاسى سالدارىنان ەكى ادام العان جاراقاتتارىنان وقيعا ورنىندا ءتىل تارتپاي كەتتى. ال «Volkswagen Passat» اۆتوكولىگىنىڭ 45 جاستاعى جۇرگىزۋشىسى بايعانين اۋدانىنىڭ ورتالىق اۋرۋحاناسىنا جاتقىزىلدى.
اتالعان فاكتى بويىنشا قر قك 345-بابى 4-بولىگى (ابايسىزدا ەكى نەمەسە ودان دا كوپ ادامنىڭ ولىمىنە اكەپ سوققان جول قوزعالىسى ەرەجەلەرىن بۇزۋ) بويىنشا سوتقا دەيىنگى تەرگەۋ باستالدى.
اقتوبە وبلىسىنىڭ پوليتسيا دەپارتامەنتى جول اپاتتارىنىڭ ەڭ كوپ تارالعان سەبەپتەرىنىڭ ءبىرى – جول قوزعالىسى ەرەجەلەرىن ساقتاماۋ ەكەنىن ايتىپ, جۇرگىزۋشىلەرگە جولدا وتە مۇقيات جانە اباي بولۋدى ەسكەرتەدى.
