زەرتتەۋدى جۇرگىزگەن پاۆلودار پەداگوگيكالىق ۋنيۆەرسيتەتىنىڭ ارحەولوگ عالىمدارى قورىمداردى قيماق قاعاناتىنىڭ ءومىر ءسۇرۋ كەزەڭىنە جاتقىزىپ وتىر. قيماق قاعاناتى – استاناسى ەرتىس وڭىرىندە ورنالاسقان كوشپەلى يمپەريا.
ارحەولوگيالىق ەكسپەديتسيانىڭ جەتەكشىسى, پاۆلودار ۋنيۆەرسيتەتىنىڭ Margulan Centre ديرەكتورى تيمۋر سماعۇلوۆ: «بايدالا اۋىلى ماڭىنداعى قيماق قورعاندارى ۇلكەن عىلىمي قۇندىلىققا يە. توپىراقتىڭ حيميالىق قۇرامىنا بايلانىستى اعاش بۇيىمدارى, جىبەكتەن تىگىلگەن كيىمدەر, سونداي-اق بىلعارى مەن مەتالدان جاسالعان ءتۇرلى زاتتار ساقتالعان», دەيدى.
ايتپاقشى, بۇعان دەيىن قازبا جۇمىستارى بارىسىندا «قيماق كۇيمەسى» تابىلعان بولاتىن. عالىمداردىڭ ايتۋىنشا, «قيماق كۇيمەسى» ەۋرازيا اۋماعىنداعى ورتاعاسىرلىق كوشپەلىلەردىڭ جىلجىمالى تۇرعىن ءۇيىنىڭ جاقسى ساقتالعان جالعىز ۇلگىسى سانالادى.
پاۆلودار ۋنيۆەرسيتەتىنىڭ عىلىمي قىزمەتكەرلەرى سكيف-ساق ءداۋىرىنىڭ جەرلەۋ ورىندارىن دا زەرتتەپ جاتىر. مىسالى, قورعانداردىڭ بىرىنەن ب.ز.د. 1 مىڭجىلدىقتىڭ ەكىنشى جارتىسىنا جاتاتىن قىش ىدىستار مەن ەرەسەك ادامنىڭ سۇيەكتەرى تابىلدى.
ارحەولوگيالىق جۇمىستارعا عالىمدارمەن بىرگە پاۆلودار پەداگوگيكالىق ۋنيۆەرسيتەتى مەن تورايعىروۆ ۋنيۆەرسيتەتىنىڭ ستۋدەنتتەرى دە اتسالىسىپ جاتقانىن ايتا كەتەيىك.
