فوتو: قورعانىس مينيسترلىگى
قازاقستان قارۋلى كۇشتەرىن ينجەنەرلىك-اۆياتسيالىق قامتاماسىز ەتۋ جۇيەسىنىڭ قالىپتاسۋى 1993 جىلى باستالدى. كۇردەلى جاعدايلار مەن رەسۋرستاردىڭ تاپشىلىعىنا قاراماستان, ينجەنەرلىك-تەحنيكالىق قۇرام اۆياتسيانىڭ جاۋىنگەرلىك قابىلەتىن ساقتاپ, ونى ودان ءارى دامىتۋدىڭ نەگىزى بولدى.
بۇگىنگى تاڭدا بۇل قىزمەتتىڭ ماماندارى ۇشاقتار مەن تىكۇشاقتاردى سەنىمدى پايدالانۋدى قامتاماسىز ەتەدى. دياگنوستيكا جۇرگىزىپ, جابدىقتى باپتايدى جانە اۋە كەمەلەرىن ۇشۋعا دايىندايدى. ءار ۇشۋدىڭ ارتىندا ينجەنەرلەردىڭ, تەحنيكتەر مەن مەحانيكتەردىڭ كاسىبي, ۇيلەسىمدى جانە جاۋاپتى جۇمىسى تۇر.
اسكەري اۆياتسيا ماماندارى تاۋلىك بويى ەلدىڭ اۋە كەڭىستىگىن كۇزەتۋ بويىنشا ۇشۋلاردىڭ ورىندالۋىن جانە جاۋىنگەرلىك كەزەكشىلىكتىڭ ءوتۋىن قامتاماسىز ەتەدى. بۇدان باسقا, ولار اۆياتسيالىق پاركتى جاڭعىرتۋعا, زاماناۋي تەحنولوگيالاردى ەنگىزۋگە جانە جاس كادرلاردى وقىتۋعا اتسالىسادى.
وسى بەيىندەگى مامانداردى دايارلاۋ تالعات بيگەلدينوۆ اتىنداعى اۋە قورعانىسى كۇشتەرىنىڭ اسكەري ينستيتۋتىندا, قر ۇلتتىق قورعانىس ۋنيۆەرسيتەتىندە جانە شەتەلدىك اسكەري وقۋ ورىندارىندا جۇزەگە اسادى.
بيىل زاماناۋي قازاق اسكەرىنىڭ ينجەنەرلىك-اۆياتسيالىق قامتاماسىز ەتۋ بولىمشەلەرى قۇرىلعانىنا 33 جىل تولۋىن اتاپ ءوتىپ جاتىر. ولاردىڭ كۇندەلىكتى ەڭبەگى, جوعارى كاسىبيلىگى مەن ىسكە دەگەن ادالدىعى اۆياتسيانىڭ جاۋىنگەرلىك ازىرلىگىن نىعايتىپ, اۋە كەڭىستىگىنىڭ قاۋىپسىزدىگى مەن ەل اسپانىنىڭ تىنىشتىعىن قامتاماسىز ەتەتىن سەنىمدى تىرەك.
