پارلامەنت • 20 قازان، 2021

بيۋدجەتتىڭ الەۋمەتتىك باعىتتىلىعى ساقتالدى – قارجى ءمينيسترى

بيۋدجەتتىڭ الەۋمەتتىك باعىتتىلىعى ساقتالدى. بۇل تۋرالى ءماجىلىستىڭ جالپى وتىرىسىندا «2022-2024 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تالقىلاۋ كەزىندە قر قارجى ءمينيسترى ەرۇلان جاماۋباەۆ ايتتى، دەپ حابارلايدى Egemen.kz.

گاۋھار قاپاش

ونىڭ ايتۋىنشا، ءۇش جىلدىق كەزەڭدە الەۋمەتتىك سالا شىعىستارى 26،7 ترلن تەڭگە بولادى. 2022 جىلمەن سالىستىرعاندا بيىل ونىڭ دەڭگەيى 643،2 ملرد تەڭگەگە ۇلعايا وتىرىپ، 8،1 ترلن تەڭگەگە جەتەدى.

«بيۋدجەتتىڭ جالپى كولەمىندەگى شىعىستاردىڭ ۇلەسى كەلەسى جىلى 50،8%-عا دەيىن وسەدى. شىعىستار كولەمىنىڭ كوپ بولىگى ازاماتتاردى الەۋمەتتىك قامسىزداندىرۋ مەن ولارعا كومەك كورسەتۋگە باعىتتالعان. دەنساۋلىق ساقتاۋ جۇيەسىن دامىتۋعا ارنالعان شىعىستار 2022-2024 جىلدارى 5،7 ترلن تەڭگەنى، ونىڭ ىشىندە 2022 جىلعا 1،8 ترلن تەڭگەنى قۇرايدى. وسى قاراجات اياسىندا مەديتسينا قىزمەتكەرلەرىنىڭ ەڭبەكاقىسىن ۇلعايتۋ كوزدەلگەن»، دەدى ەرۇلان جاماۋباەۆ.

ونىڭ سوزىنە قاراعاندا، ءبىلىم جانە عىلىم جۇيەسىن دامىتۋعا 3 جىلعا 7 ترلن تەڭگە، ونىڭ ىشىندە 2022 جىلعا 1،8 ترلن تەڭگە كوزدەلگەن. بۇل بيىل بولىنگەن قاراجاتتان 477،1 ملرد تەڭگەگە ارتىق.

«ەكونوميكانىڭ ناقتى سەكتورىن قولداۋعا جانە دامىتۋعا ارنالعان شىعىستار ورتا مەرزىمدى كەزەڭدە 3،6 ترلن تەڭگەنى، ونىڭ ىشىندە 2022 جىلعا 2 ترلن تەڭگەنى قۇرايدى. وسى باعىت اياسىندا بارلىق مەملەكەتتىك باعدارلامالاردى ىسكە اسىرۋعا شىعىستار كوزدەلگەن. ولار بىرتىندەپ ۇلتتىق جوبالارعا ۇلاساتىن بولادى»، دەدى مينيستر.

زاڭ جوباسىن تالقىلاۋ بارىسىندا بىرقاتار تۇزەتۋ ەنگىزىلدى. تۇزەتۋلەردىڭ ءبىرىنشى بلوگى مەملەكەت باسشىسىنىڭ بيىلعى 1 قىركۇيەكتەگى جولداۋىن قارجىلىق قامتاماسىز ەتۋگە باعىتتالعان. ماسەلەن، 2022 جىلعا ازاماتتىق قىزمەتشىلەردىڭ جەكەلەگەن ساناتتارىنىڭ ەڭبەكاقىلارىن كوتەرۋگە 143،4 ملرد تەڭگە سوماسىندا قاراجات كوزدەلگەن. تۇزەتۋلەردىڭ ەكىنشى بلوگى دەپۋتاتتاردىڭ باستاماشىلىعى بويىنشا حالىقتىڭ ءومىر ءسۇرۋ ساپاسىن ارتتىرۋعا جانە وڭىرلەردى دامىتۋعا باعىتتالعان.

وسىلايشا، «اۋىل – ەل بەسىگى» جوباسىن ىسكە اسىرۋعا، اۋىلدىق ەلدى مەكەندەردى تازا اۋىزسۋمەن، سۋ بۇرۋ قىزمەتتەرىمەن قامتاماسىز ەتۋگە، سونداي-اق تۇرعىن ءۇي-شارۋاشىلىعىن دامىتۋعا قوسىمشا قاراجات كوزدەلگەن.

2022 جىلى وڭىرلەرگە رەسپۋبليكالىق بيۋدجەت قاراجاتى ەسەبىنەن شامامەن 4،7 ترلن تەڭگە بولىنەتىن بولادى. بۇل جالپى بيۋدجەت شىعىستارىنىڭ 29،3%-ىن قۇرايدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز