قازاقستان • 18 قازان، 2021

باس ءمۇفتي رۋحاني كەلىسىم كۇنىمەن قۇتتىقتادى

95 رەت كورسەتىلدى

قازاقستان مۇسىلماندارى ءدىني باسقارماسىنىڭ توراعاسى، باس ءمۇفتي ناۋرىزباي قاجى تاعان ۇلى رۋحاني كەلىسىم كۇنىمەن قۇتتىقتادى، دەپ جازادى Egemen.kz.

«ەلىمىزدە ەلباسى نۇرسۇلتان نازارباەۆتىڭ باستاماسىمەن 18 قازان «رۋحاني كەلىسىم» كۇنى رەتىندە بەكىتىلىپ، وسى داتاعا ماڭىز بەرىلىپ جاتقان جايتتىڭ دا وزىندىك ايرىقشا ءمانى بار. ويتكەنى، رۋحاني كەلىسىمسىز كەلەشەك جوق.

قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆ ءبىر سوزىندە: «حالىقتاردى ءبىر-بىرىنەن بولەتىن تەڭىزدەر ەمەس، ناداندىق پەن تىلدەردىڭ بولەكتىگى دە ەمەس، ارازدىق قانا. دوستىق جوق جەردە ارازدىققا مۇمكىندىك مول بولماق» دەگەن ەدى.

اللاعا شۇكىر، بۇگىندە ەۋرازيا جۇرەگىندە بەيبىت عۇمىر كەشىپ كەلە جاتقان قازاقستان تورتكۇل دۇنيەگە بىتىمگەر، ارااعايىن، ىمىراشىل ىرگەلى ەل رەتىندە تانىلدى. ەلىمىزدىڭ رۋحاني بىرلىگىن نىعايتۋعا قازاقستان مۇسىلماندارى ءدىني باسقارماسى دا سۇبەلى ۇلەس قوسىپ كەلەدى.

ورىس پراۆوسلاۆيە شىركەۋىنىڭ قازاقستان جانە استانا ءميتروپوليتى الەكساندر ەلىمىزدەگى مۇسىلمان قاۋىمىن جىل سايىن قۇربان ايت مەرەكەسىمەن قۇتتىقتايدى. مەن دە ءوز تاراپىمنان پراۆوسلاۆ سەنىمىندەگى حريستيانداردى روجدەستۆو مەرەكەسىمەن قۇتتىقتاپ، ارنايى حات جولدايمىن. ويتكەنى، وركەنيەتتى ەلدەردەگى دىندەرارالىق تاتۋلىقتىڭ قالىپتاسۋى – اسا ماڭىزدى ءىس. مۇسىلماننىڭ ۇلىق مەيرامى – قۇربان ايت كۇنى، سونىمەن قاتار روجدەستۆو مەرەكەسى كۇنى رەسمي دەمالىس رەتىندە جاريالانۋى ماڭىزدى شەشىمنىڭ ءبىرى بولعانى انىق.   

مەملەكەت باسشىسى قاسىم-جومارت كەمەل ۇلى بيىلعى جولداۋىندا: «قوعامداعى بىرلىك پەن كەلىسىمدى كوزدىڭ قاراشىعىنداي ساقتاۋىمىز كەرەك. ەتنوسارالىق جانە كونفەسسياارالىق قاتىناستىڭ قانشالىقتى ماڭىزدى ەكەنىن بارلىق ازاماتىمىز ءتۇسىنۋ قاجەت. ءبىز قاشان دا الاۋىزدىققا قارسى تۇرا بىلگەن ەلمىز» دەپ اتاپ ءوتتى.

راسىندا، قازاق كوشىن باستاعان كەشەگى حان-سۇلتاندارىمىز ەل باسقارۋ ءىسىن ەڭ اۋەلى ۇلتتى ىنتىماققا ۇيىستىردى. بابالارىمىزدىڭ بۇگىنگى ۇرپاعى رەتىندە بارشامىز بىرلىگىمىزدى بەكەم ەتۋگە ۇلەس قوسۋىمىز ءتيىس دەپ سانايمىز»، دەلىنگەن قۇتتىقتاۋدا.

سوڭعى جاڭالىقتار

ۇقساس جاڭالىقتار