«عۇلامالار كەڭەسىن قۇرۋ تۋرالى قۇجات قابىلداندى. قۇرمەتتى ارىپتەستەر! ازياداعى ءوزارا ءىس-قيمىل جانە سەنىم شارالارى كەڭەسىنىڭ جاڭا ينستيتۋتىنىڭ قۇرىلۋىمەن قۇتتىقتايمىن. بۇل – بەيبىتشىلىك پەن قاۋىپسىزدىكتى قامتاماسىز ەتۋدى قوسا العاندا اوسشك-ءنى دامىتۋمەن بايلانىستى سۇراقتاردىڭ كەڭ اۋقىمى بويىنشا ماڭىزدى كەڭەستەر بەرەتىن, اوىسشك قىزمەتىنىڭ مۇنان ارعى باعىتتارى مەن باسىمدىقتارى رەتىندە سەنىم شارالارىن جۇزەگە اسىراتىن كونسۋلتاتيۆتىك ورگان. قازاقستان وسى شەشىمدەردىڭ بارلىعىن جەدەل جۇزەگە اسىرۋعا كىرىسۋگە دايىن», دەدى كەزدەسۋگە توراعالىق ەتكەن قر سىرتقى ىستەر ءمينيسترىنىڭ ورىنباسارى اقان راحمەتۋللين.
بۇعان دەيىن قر پرەزيدەنتى قاسىم-جومارت توقاەۆ ازياداعى ءوزارا ءىس-قيمىل جانە سەنىم شارالارى كەڭەسى قۇرىلتايشىسى كانديداتتارىنا نۇرسۇلتان نازارباەۆ مىرزانى عۇلامالار كەڭەسىنىڭ باسشىسى لاۋازىمىنا تاعايىنداۋدى ۇسىنعانىن حابارلاعان ەدىك.
«كەلەسى قۇجات – بۇل عۇلامالار كەڭەسى تۋرالى قۇجات. ءبىز ونى بۇگىن قابىلداۋىمىز قاجەت. مۇشە مەملەكەتتەر كونسۋلتاتيۆتىك-كەڭەس ورگانىن قۇرۋدى قولدادى جانە قازىردىڭ وزىندە مۇشەلىككە كانديداتتاردى ۇسىنۋ باستالىپ كەتتى. بۇگىن ءبىز عۇلامالار كەڭەسى تۋرالى ەرەجەنى بەكىتەتىن بولامىز. بۇگىن تاڭەرتەڭ بىزبەن كەزدەسۋ بارىسىندا پرەزيدەنت قاسىم-جومارت توقاەۆ ازياداعى ءوزارا ءىس-قيمىل جانە سەنىم شارالارى كەڭەسى قۇرىلتايشىسى كانديداتتارىنا نۇرسۇلتان نازارباەۆ مىرزانى عۇلامالار كەڭەسىنىڭ باسشىسى لاۋازىمىنا تاعايىنداۋدى ۇسىندى. سىزدەر وسى كانديداتۋرانى قولدايسىزدار دەپ ۇمىتتەنەمىن», دەگەن ەدى قر سىرتقى ىستەر ءمينيسترىنىڭ ورىنباسارى.
