ۇكىمەت • 12 قازان، 2021

اگروونەركاسىپتىك كەشەن ونىمدەرىنىڭ ەكسپورتى ۇلعايادى – اشم

2021 جىلعى 12 قازاندا قازاقستان رەسپۋبليكاسى ۇكىمەتىنىڭ وتىرىسى ءوتىپ، وندا اگروونەركاسىپتىك كەشەندى دامىتۋدىڭ 2021-2025 جىلدارعا ارنالعان ۇلتتىق جوباسى قارالدى، دەپ حابارلايدى Egemen.kz.

گاۋھار قاپاش

«مەملەكەت باسشىسىنىڭ تاپسىرمالارىنا سايكەس، جوبانى ىسكە اسىرۋ ناتيجەسىندە ەڭبەك ونىمدىلىگىن 2،5 ەسەگە ارتتىرۋ، وتاندىق ءوندىرىستىڭ نەگىزگى ازىق-ت ۇلىك تاۋارلارىمەن قامتاماسىز ەتۋ، وڭدەلگەن ءونىم ۇلەسىن 70%-عا دەيىن جەتكىزە وتىرىپ، اگروونەركاسىپتىك كەشەن ونىمدەرىنىڭ ەكسپورتىن 2 ەسەگە ۇلعايتۋ، سونداي-اق 7 ءىرى ەكوجۇيە قالىپتاستىرۋ جانە ينۆەستيتسيالىق جوبالاردى ىسكە اسىرۋ ەسەبىنەن 1 ملن اۋىل تۇرعىنىنىڭ تابىسىن تۇراقتى ارتتىرۋعا قول جەتكىزۋ قاجەت»، دەلىنگەن ۆەدومستۆو حابارلاماسىندا.

ۆەدومستۆو باسشىسى ۇكىمەت مۇشەلەرىنە مەجەلەنگەن ماقساتتارعا قول جەتكىزۋگە باعىتتالعان، ۇلتتىق جوبا بولجايتىن فاكتورلار مەن تەتىكتەر تۋرالى تولىق بايانداپ بەردى.

ماسەلەن، ىشكى نارىقتى قامتاماسىز ەتۋ ءۇشىن يمپورتتى الماستىرۋ ماسەلەلەرى كەشەندى تۇردە شەشىلەتىن بولادى. مينيسترلىك قۇس ەتى، شۇجىق ونىمدەرى، ىرىمشىك جانە سۇزبە، الما، قانت جانە بالىق سياقتى كوپ يمپورتتالاتىن پوزيتسيالاردى انىقتادى.

«بۇگىنگى تاڭدا وسى باعىتتاردىڭ ارقايسىسى بويىنشا ناقتى ينۆەستيتسيالىق جوبالار انىقتالىپ، ىسكە اسىرىلۋدا. ناتيجەسىندە 2024 جىلعا قاراي اتالعان ءونىم تۇرلەرى بويىنشا قانتتان باسقا قامتاماسىز ەتىلۋ 100%-دى، ال قانت 80%-دى قۇرايتىن بولادى.

ۇلتتىق جوبانىڭ باسىمدىعى ەت، جەمىستەر، كوكونىستەر، قانت، ءداندى، مايلى داقىلدار، ءسۇت ونىمدەرىن ءوندىرۋ مەن قايتا وڭدەۋدى قوسا العاندا، ءىرى ينۆەستيتسيالىق جوبالار اينالاسىندا 7 ەكوجۇيەنى قالىپتاستىرۋ بولادى. بۇل قوسىلعان قۇنى جوعارى تۇپكىلىكتى قازاقستاندىق ءونىم جاساۋعا قاتىسا الاتىن كەمىندە 350 مىڭ فەرمەرلىك جانە ءۇي شارۋاشىلىقتارىن ىسكە تارتۋعا مۇمكىندىك بەرەدى.

جالپى ۇلتتىق جوبانى ىسكە اسىرۋ ناتيجەسىندە بەس جىل ىشىندە ەڭبەك ونىمدىلىگىن 2،5 ەسەگە ارتتىرۋ، 500 مىڭ ادامدى جۇمىسپەن قامتاماسىز ەتۋ، وسىلايشا 1 ملن اۋىل تۇرعىنىنىڭ تابىسىن ارتتىرۋ جوسپارلانۋدا»، دەدى ەربول قاراشوكەەۆ.

ەسكە سالا كەتەيىك، اگروونەركاسىپتىك كەشەندى دامىتۋدىڭ 2021-2025 جىلدارعا ارنالعان ۇلتتىق جوباسى مەملەكەت باسشىسىنىڭ تاپسىرماسىن ورىنداۋ ماقساتىندا ازىرلەندى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز