سونداي-اق كۋرتس باستاعان تاعى توعىز ادام تەرگەۋگە الىنعان. وعان مەملەكەت قاراجاتىن تابلويدتىق گازەتتەردە ءوزىنىڭ وڭ ءيميدجىن قالىپتاستىرۋعا پايدالاندى دەگەن ايىپ تاعىلدى. الايدا كۋرتس ونىڭ ءبارىن جوققا شىعاردى.
«بۇعان دەيىن مەنى قىلمىستىق ارەكەتتەر جاسادى دەپ ايىپتادى. ونىڭ ءبارى 2016 جىلعى وقيعاعا قاتىستى. بىراق ونىڭ ءبارى – جالعان, مەن بۇل ماسەلەنى انىقتاي الاتىنىما سەنىمدىمىن», دەدى كۋرتس سەنبى كۇنى ۆەناداعى كانتسلەر كەڭسەسىندە وتكەن ءباسپاسوز ءماسليحاتىندا.
دەگەنمەن, كانتسلەر قىزمەتىنەن كەتۋگە ءماجبۇر بولعانىن جەتكىزدى. ويتكەنى پارلامەنتتەگى «جاسىلدار» پارتياسى جەمقورلىققا قاتىستى داۋدان كەيىن كۋرتستى قولدامايتىنىن مالىمدەگەن. ولار كانتسلەرگە سەنىمسىزدىك بىلدىرەمىز دەپ قورقىتقان وپپوزيتسيالىق پارتيالارمەن كەلىسسوزدەردى باستاپ كەتتى.
«جاسىلدار» پارتياسىنىڭ جەتەكشىسى جانە ۆيتسە-كانتسلەر ۆەرنەر كوگلەر كۋرتستىڭ وتستاۆكاسىن قۇپتادى. سونداي-اق شاللەنبەرگپەن جۇمىس ىستەۋگە دايىن ەكەنىن ءبىلدىرىپ, ولاردىڭ «وتە كونسترۋكتيۆتى» قارىم-قاتىناستا ەكەنىن جەتكىزدى.
