بىلەتىندەر تاريحي تۇلعالاردىڭ, كوبىنە گەنيلەردىڭ گاردەروبى قاراپايىم بولعانىن راستايدى. ءتىپتى كەيبىرى ولە-ولگەنشە ۇستىنەن ءبىر كيىمدى تاستاماي كيىپ وتكەن. ستيۆ تە سونداي ادامداردىڭ ساناتىندا بولادى. ەڭ قىزىعى ادامنىڭ بۇنداي قيامپۇرىس ادەتتەرى تۋرالى بىرجاقتى ەشتەڭە ايتا المايتىنىمىزدا شىعار. سەبەبى ونىڭ ءتۇرلى فاكتورى بولۋى مۇمكىن. كوبىنە وي ەڭبەگىمەن شۇعىلداناتىن قۇبىلىستار دۇكەن ارالاپ كيىم تاڭداۋعا ۋاقىت زايا قىلعاندى قۇپتاماسا, كەيبىرى جەتىستىككە ادامنىڭ كيىم ىلگىشى كوپ اسەر ەتەدى دەپ توپشىلايتىن بولعان. سونداي-اق ادامنىڭ تالعامى دا تالاس تۋدىرمايتىن مىنەز ەكەنىن ەسكەرگەنىمىز ءجون.
ستيۆ ءستيلى ونىڭ مىنەز-قۇلقىن بىردەن اڭعارتىپ تۇرادى. ءبىز جالپى Apple ونىمدەرىن دۇنيەگە اكەلگەن, ونى ويلاپ تاپقان دجوبس دەپ ويلايمىز. نەگىزىندە ولاي ەمەس. ستيۆ ەڭ الدىمەن نارىقتى جاۋلاۋ ءۇشىن يدەيامەن جۇمىس ىستەدى. ستيۆ ءۇشىن ەڭ ماڭىزدى ەكى نارسە بولدى. ول – ديزاين جانە ماركەتينگ ەدى. ول ءونىمدى ءوندىرىپ شىعارۋدان بۇرىن, ونىڭ سىرتقى جانە ىشكى ۇلگىسىنە ءمان بەردى جانە ونى جوعارى دەڭگەيدە جارنامالاي الدى. بۇل ەكىنىڭ بىرىنە بەرىلەتىن قاسيەت ەمەس قوي.
دجوبستىڭ كيىم سورەسىندە ءبىر ۋاقىتتا قارا ءتۇستى, بىردەي ولشەمدە 200-گە تارتا دجەمپەر ءىلىنىپ تۇرعان دەسەدى. بۇل اقپاردى العاش ەستىگەنىمىزدە اڭىرىپ تۇرىپ قالعانىمىز راس. ءوزىڭىز ويلاپ قاراڭىزشى, ادام ءبىر عانا ۇلگىدەگى كيىمدى كيە بەرگەننەن جالىعىپ, جىندانىپ كەتۋى مۇمكىن ەمەس پە؟ بىراق گەنيدىڭ ويلاۋ جۇيەسىنىڭ ءبىز پايىمداعاننان مۇلدە وزگە ەكەنىن ەسكەرسەك, ءبارى دۇرىس. الەمدەگى ەڭ تانىمال, ەڭ باي, ەڭ تالانتتى ادامنىڭ اكسەسسۋارلارى قىمبات بولسا كەرەك-ءتى. الايدا بۇكىل ادامزات اۋزىنا قاراپ وتىرعان سول ستيۆ دجوبستىڭ كيىم-كەشەگى, ساعاتى مەن كوزىلدىرىگىنىڭ قۇنىن ەسەپتەگەندەر ولاردىڭ 2 مىڭ دوللارعا دا جەتپەيتىنىن ءبىلىپ تاڭ قالىسىپتى.
باسىندا ءبىز دە تاڭ قالعانىمىزدى جاسىرمايمىز. بىراق كەيىن ستيۆ الەمىنە قىزىعىپ, ونى زەردەلەي كەلە تاڭدانىسىمىزدىڭ تىم دورەكى ەكەنىن ۇقتىق, ۇيالدىق. مىنا ءبىر شاشىلىپ تۇسكەن شىمىر ويلارعا ءبىر كوز جۇگىرتىپ ءوتىڭىزشى؟ وسىنشاما تەرەڭ پايىم يەسىنىڭ تىم قىمبات كيىنۋى مۇمكىن بە؟ ستيۆ ايتادى: «جاسىمىز وسكەن سايىن بىزگە اقىل كىرە باستايدى. مەنىڭ تۇسىنگەنىم – 30 دوللار تۇراتىن ساعات تا, 300 دوللارعا الىنعان ساعات تا ءبىر ۋاقىتتى كورسەتەدى. ءبىز 30 دوللار تۇراتىن ءامياندى الساق تا, 300 دوللار تۇراتىن ءامياندى قولدانساق تا ەكەۋىنە بىردەي اقشا سيادى».
شىنىندا دا ءبىز كەيىنگى ۋاقىتتا قۇندىلىقتى ادامنىڭ سىرتىنان ىزدەپ كەتكەنىمىز جاسىرىن ەمەس. ارينە, 150 مىڭ دوللار تۇراتىن كولىكپەن جۇرسەك تە, 3 مىڭ دوللار تۇراتىن كولىككە مىنسەك تە باراتىن جول مەن قاشىقتىق وزگەرمەيدى. ءبىز قايسىسىمەن بارساق تا, جەتەتىن جەرىمىز – ءبىر. 300 دوللار تۇراتىن بوتەلكەدەگى شاراپتى ىشسەڭىز دە, 10 دوللار تۇراتىن شاراپ ىشسەڭىز دە, سەزىنەتىن راحات ءبىر دەپ كەز كەلگەنىمىز ايتۋىمىز مۇمكىن. بىراق بۇل قاراپايىم ءومىر قاعيدالارىن قازىناسىن قالاي شاشسا دا قازانى ورتايمايتىن دجوبستىڭ اۋزىنان ەستۋدىڭ ءجونى استە بولەك.
قاراپايىم كيىنۋدىڭ, ەل قاتارلى تىرشىلىك كەشۋدىڭ جالعىز ەتالونى دجوبس دەۋدەن اۋلاقپىز, ارينە. بىراق زامانى بىزگە جاقىن تۇلعانىڭ ەل كوپ بىلە بەرمەيتىن قىرلارى وسكەلەڭ جاڭا ۇرپاققا زور ونەگە بولعانى دۇرىس.
ول تاعى بىردە ء«سىز تۇراتىن ءۇيدىڭ اۋدانى 300 شارشى نەمەسە 3000 شارشى مەتر بولسا دا, ءسىز – جالعىزسىز, ءسىزدىڭ شىنايى ىشكى باقىتىڭىز دۇنيەنىڭ ماتەريالدىق قۇندىلىعىنان تۋىندامايدى» دەيدى.
ءبىز ستيۆ دجوبستىڭ وسىنشاما ەركىن, وسىنشاما بىرتوعا عۇمىر كەشكەنىنە قىزىعا دا قىزعانا قارادىق. مىسالى, دجوبس Lunor دەگەن نەمىس فيرماسىنىڭ قاراپايىم, بىراق ساپالى جاسالعان 500 دوللار عانا تۇراتىن كوزىلدىرىگىن تاعىپتى. الەمنىڭ كوز جاۋىن الاتىن Apple ونىمدەرىنىڭ قايتالانباس ديزاينى سول كوزىلدىرىكپەن-اق دۇنيەگە كەلىپ وتىرىپتى. سول كوزاينەكتىڭ ار جاعىنداعى قىراعى دا ويلى, وزىق تا تالعامپاز كوزدەردىڭ, ەركىن سانانىڭ جەمىسىن ءبارىمىز تۇتىنامىز.
دجوبستىڭ دجەمپەرى دەپ تاقىرىبىن اتاعانىمىزبەن, تولىق دجەمپەر دەۋگە كەلمەس, قارا ۆودولازكا كورسەك, اشىق كوك دجينسىنى كوزىمىز شالىپ قالسا بىردەن ويىمىزعا دجوبس ورالادى. جاپون ديزاينەرى يسسەي مياكەنىڭ قولىنان شىققان قارا ۆودولازكا اۋەلدە كومپانيانىڭ قىزمەتكەرلەرى تۇگەل كيەتىن فورما رەتىندە تىگىلىپتى. كەيىننەن دجوبس ول يدەيانى قۇپتاماي, تەك ءوزى عانا تۇتىنۋدى ءجون كورەدى. جەكە تىگىنشىسىنە بىرنەشە ءجۇز قارا كەۋدەشەنى تىكتىرتىپ كيگەن ول ءومىرىنىڭ كەيىنگى جيىرما جىلىندا سول كەۋدەشەنى ۇستىنەن تاستاماي وتەدى.
دجوبستىڭ دجينسى دا كەرەمەت قىمبات شالبار دەمەس ەدىك. Levi’s تىككەن شالبار ونىڭ جۇمىس ىستەۋىنە وتە ىڭعايلى بولسا كەرەك. اياق كيىمى جايلى دا اقپاراتتار اشىق, NewBalance برەندىنىڭ اسا تانىمال ءونىمى. باعاسىنان بايلىقتىڭ ءيىسى بۇرقىراپ تۇرعان جوق, بار-جوعى 150 دوللاردىڭ كروسسوۆكاسى.
مىنە, ادامي قۇندىلىقتىڭ, تۇلعالىق دارالىقتىڭ قىزىل-جاسىل شۇبەرەككە, اسىل-اشەكەيگە ەش تاۋەلسىز ەكەندىگىن وسىنداي تۇلعالار اركەز دالەلدەي بەرەدى. ءرۋميدىڭ «قانشاما ادام كوردىم, ۇستىندە كيىمى جوق, قانشاما كيىم كوردىم, ىشىندە ادامى جوق» دەگەنىندەي, دجوبستىڭ دجەمپەرى مەن دجينسىسى ارزان بولعانىمەن, ونىڭ قيالىنان تۋعان قىمبات ونىمدەر كەز كەلگەن ادامنىڭ قولىنا تۇسە بەرمەيدى.
ۇلى يدەيالار ارقاشان قىمبات بولۋى كەرەك.
