قالا قۇراۋشى ەنەرگيا كاسىپورنىنداعى جۇمىستار 1959 جىلى سالىنعان قولدانىستاعى جەو-2 قايتا جاڭارتۋدى كوزدەيدى. وسى جىلدار ىشىندە ەلەكتر ستانتسيالارىنداعى جابدىقتاردىڭ توزۋى اپاتتى 67%-عا جەتتى. توزۋ دەڭگەيىنىڭ جوعارى بولۋىنان اپاتتار مەن جەو-نىڭ جوسپاردان تىس توقتاپ قالۋ قاۋپى جوعارى.
بۇعان قوسا, تەكەلى قالاسىندا تۇرعىن ۇيلەر قۇرىلىسىنىڭ ۇلعايۋىمەن جانە جاڭا ونەركاسىپتىك كاسىپورىنداردىڭ پايدا بولۋىمەن 2-جەو-عا تۇسەتىن كۇش ايتارلىقتاي ارتتى. قاربالاس كەزدە وڭىردە ەلەكتر ەنەرگياسىنىڭ تاپشىلىعى بايقالادى.
پرەمەر-مينيستر الماتى جەو-لارىنا قاتىستى وبەكتيۆتى اقپارات بەرۋدى تاپسىردى
ماسەلەلەردى كەشەندى تۇردە شەشۋ ءۇشىن تەكەلى ەنەرگيا كەشەنىنىڭ اۋماعىندا كومىرمەن جۇمىس ىستەيتىن قولدانىستاعى 2-جەو-عا قوسىمشا بۋ-گاز قوندىرعىسىن سالۋ تۋرالى شەشىم قابىلداندى. 2-جەو مەن بگق ءبىر ۋاقىتتا جۇمىس ىستەيدى.
2025 جىلى نىساندى كەڭەيتۋدىڭ جانە قايتا جاڭارتۋدىڭ ءبىرىنشى جانە ەكىنشى كەزەڭدەرى اياسىندا جالپى قۋاتى 36 مۆت بولاتىن ءۇش گاز تۋربينالىق قوندىرعى پايدالانۋعا بەرىلدى.
ناتيجەسىندە ەنەرگيا كەشەنىنىڭ نەگىزگى جابدىقتارىنىڭ جالپى توزۋى ەكى ەسەگە - 67% -دان 34,2% -عا دەيىن تومەندەدى.
قازىر جاڭعىرتۋ جوباسىنىڭ ءۇشىنشى كەزەڭى ىسكە اسىرىلۋدا, ول قۋاتتىلىعى 17 مۆت بولاتىن ءۇش كادەگە جاراتۋ قازاندىعى مەن بۋ تۋربيناسىن مونتاجداۋ مەن پايدالانۋعا بەرۋدى قامتيدى.
تەكەلى ەنەرگيا تورابىن جاڭعىرتۋ جونىندەگى جۇمىستاردى اياقتاۋ ءوڭىر ءۇشىن وتە ماڭىزدى. بۋ-گاز قوندىرعىسىن ىسكە قوسۋ ەلەكتر قۋاتىن قازىرگى 24-تەن 77 مۆت-قا دەيىن جانە جىلۋ قۋاتىن 42-دەن 90 گكال/ساع-قا دەيىن ارتتىرۋعا مۇمكىندىك بەرەدى, بۇل قالا تۇرعىندارىن جارىقپەن جانە جىلۋمەن قامتاماسىز ەتۋگە وڭ اسەرىن تيگىزەدى.
ونىڭ ۇستىنە, جابدىقتاردى جاڭارتۋ ەنەرگەتيكالىق كەشەن نىساندارىنداعى ىركىلىس قاۋپىن ايتارلىقتاي تومەندەتەدى جانە جالپى العاندا جەتىسۋ وبلىسىنىڭ ەنەرگەتيكالىق قاۋىپسىزدىگىن ارتتىرادى.
وڭىردە ەلەكتر ەنەرگياسىنىڭ مەنشىكتى كوزىنىڭ بولۋى دا رەسۋرستاردىڭ سىرتقى جەتكىزىلىمدەرىنە تاۋەلدىلىكتى بارىنشا ازايتۋعا مۇمكىندىك بەرەدى. جالپى ەنەرگيا جۇيەسىندە اپات بولعان جاعدايدا تەكەلى قالاسى ءوزىن-ءوزى ەنەرگيامەن قامتاماسىز ەتە الادى. ەڭ باستىسى, «سولتۇستىك-وڭتۇستىك» جەلىسى بويىنشا ەلەكتر ەنەرگياسىنىڭ اعىنى ازايادى.
جوبا قازاقستان رەسپۋبليكاسى ەنەرگەتيكا مينيسترلىگىمەن ينۆەستيتسيالىق كەلىسىمدەر اياسىندا ىسكە اسىرىلۋدا. ونىڭ جالپى قۇنى 46,8321 ملرد تەڭگەنى قۇرايدى. تەكەلى ەنەرگيا كەشەنىن جاڭعىرتۋ مەن كەڭەيتۋدىڭ ءۇشىنشى كەزەڭىن 2026 جىلدىڭ شىلدەسىندە اياقتاۋ جوسپارلانعان.
