فوتو: disk.yandex.ru
تەرگەۋ ماتەريالدارىنا سايكەس, 2025 جىلى كۇدىكتى ينتەرنەتتەگى «www.nbcms.com» پلاتفورماسى مەن WhatsApp مەسسەندجەرى ارقىلى ازاماتتاردى تارتىپ, ءوزىن ينۆەستيتسيالىق ونلاين-جوبا رەتىندە كورسەتكەن قارجى پيراميداسىن ۇيىمداستىرعان.
اتالعان جوباعا قاتىسۋشىلار ارنايى چاتتار ارقىلى بىرىكتىرىلگەن. اتاپ ايتقاندا, «ديسكۋسسيوننايا گرۋپپا NBC Charlotte», «NBCUniversal Media LLC» جانە باسقا دا توپتاردا 200-دەن استام ادام بولعان. قاتىسۋشىلارعا قىسقا بەينەروليكتەردى – فيلم ترەيلەرلەرىن كورۋ ارقىلى تابىس تابۋعا بولادى دەگەن جەلەۋمەن ينۆەستيتسيا سالۋ ۇسىنىلعان.
جوباعا قاتىسۋ ءۇشىن ازاماتتاردان 11 000-نان 160 000 تەڭگەگە دەيىن ينۆەستيتسيالىق پاكەت ساتىپ الۋ تالاپ ەتىلگەن. ۇيىمداستىرۋشىلار قاتىسۋشىلارعا تاۋلىگىنە 5-10% دەيىن (ايىنا 150%-دان استام) تابىس ۋادە ەتكەن. الايدا بۇل تولەمدەر تەك جاڭا سالىمشىلاردىڭ قاراجاتى ەسەبىنەن جۇزەگە اسقان.
سونىمەن قاتار جۇيەدە رەفەرالدىق سحەما قولدانىلعان. ياعني, تارتىلعان ءاربىر جاڭا قاتىسۋشى ءۇشىن 10%-عا دەيىن سىياقى بەرىلىپ, ەكىنشى جانە ءۇشىنشى دەڭگەيدەگى قاتىسۋشىلارعا قوسىمشا بونۋس قاراستىرىلعان. مۇنداي مودەل پيراميدا قۇرىلىمىن ودان ءارى كەڭەيتۋگە باعىتتالعان.
اباي وبلىسىندا 6,8 ملرد تەڭگە تارتقان قارجى پيراميداسى اشكەرەلەندى
ۇيىمداستىرۋشىلار زاڭدى قىزمەت جۇرگىزىپ جاتقانداي كورىنىس قالىپتاستىرۋ ءۇشىن الەۋمەتتىك جەلىلەردە بەلسەندى جارناما جۇرگىزگەن. ولار جالعان قۇجاتتار جاريالاپ, جاساندى تابىس كورسەتكىشتەرىن كورسەتكەن, بلوگەرلەردى تارتقان جانە ءتۇرلى تاقىرىپتىق چاتتار اشقان.
قارجى اينالىمى دا ەرەكشە سحەما ارقىلى جۇزەگە اسقان. سالىمدار جەكە تۇلعالاردىڭ شوتتارىنا قابىلدانىپ, كەيىن ر2ر وپەراتسيالارى ارقىلى كريپتوۆاليۋتاعا ايىرباستالىپ, ءانونيمدى امياندارعا جىبەرىلگەن. بۇل قارجىنىڭ ءىزىن جاسىرۋعا باعىتتالعان ارەكەت بولعان.
سوت سانكتسياسىمەن كۇدىكتى اكتيۆتەرگە شەكتەۋ قويىلعان. ناقتى ايتقاندا, 1 057 599 USDT (Tether) كولەمىندەگى كريپتوۆاليۋتاعا تىيىم سالىندى, بۇل شامامەن 528,5 ملن تەڭگەگە تەڭ.
كۇدىكتىگە قاتىستى ەلدەن شىقپاۋ جانە ءتيىستى مىنەز-ق ۇلىق تۋرالى قولحات تۇرىندەگى بۇلتارتپاۋ شاراسى قولدانىلعان. قازىرگى ۋاقىتتا ءىس سوت قاراۋىنا جىبەرىلدى.
قىلمىستىق-پروتسەستىك كودەكستىڭ 201-بابىنا سايكەس, وزگە مالىمەتتەر جاريا ەتۋگە جاتپايدى.
قارجىلىق مونيتورينگ اگەنتتىگى ازاماتتاردى قارجى قۇرالدارىنا ساق بولۋعا شاقىرىپ, ينۆەستيتسيا جاساماس بۇرىن جوبانىڭ رەسمي تىركەلۋىن, زاڭدى مارتەبەسىن جانە قاجەتتى ليتسەنزيالاردىڭ بار-جوعىن مۇقيات تەكسەرۋدى ۇسىنادى. سونداي-اق ۋادە ەتىلەتىن تابىستىڭ شىنايىلىعىنا كۇمانمەن قاراۋ قاجەتتىگىن ەسكەرتەدى.
10 ملرد تەڭگەدەن استام شىعىن: قارجى پيراميداسىن باسقارعان كۇدىكتى ەلگە ەكستراديتسيالاندى
