سپورت • 21 قىركۇيەك، 2021

تۇڭعىش تۋرنير تەننيسشىلەردى ارقا توسىندە توقايلاستىردى

40 رەت كورسەتىلدى

كەنشىلەر استاناسىندا ۇستەل تەننيسىنەن ITTF Kazakhstan International Open-2021 حالىقارالىق تۋرنير ءوتتى. بىلتىر عانا بوي كوتەرگەن Saryarka ۇستەل تەننيسى ورتالىعىن ەكى كۇن دۇبىرگە بولەگەن دودادا اۋستريا، ساۋد ارابياسى، ءۇندىستان، بەلارۋس، رەسەي، وزبەكستان، قىرعىزستان جانە قازاقستاننىڭ ءار قيىرىنان كەلگەن 70-تەن استام سپورتشى 30 مىڭ اقش دوللارىن قۇرايتىن جۇلدە قورىن ساراپقا سالدى.

جارىستىڭ اشىلۋ سالتانا­تىنا مادەنيەت جانە سپورت ءمي­نيس­ترى اقتوتى رايىمقۇلوۆا جانە بىر­­قا­تار مارتەبەلى مەيماندار ارنايى كەلىپ قاتىستى.

ايتا كەتۋ كەرەك، اتالعان تۋر­نير حالىقارالىق ۇستەل تەن­نيسى فەدەراتسياسىنىڭ (ITTF) تمد ەلدەرى اۋماعىندا بيىل ۇيىم­داس­تىرعان جالعىز رەيتينگتىك جارىس بولدى.

«بيىل قازاقستان ۇستەل تەن­نيسى فەدەراتسياسى ITTF اياسىندا ءدۇبىرلى دە بەدەلدى دودالاردى ءداس­تۇرلى تۇردە وتكىزۋگە نيەتتى ەكە­نىن جاريالايدى. تاجىريبە كورسەتكەندەي، بۇل ايماقتارداعى ماتەريالدىق-تەحنيكالىق بازانى نىعايتۋمەن بىرگە، رەس­پۋب­ليكاداعى ەڭ اۋقىمدى وليم­پيالىق سپورت تۇرلەرىنىڭ ءبىرىن دامىتۋعا قوسىمشا ىنتالاندى­رۋ­دى قامتاماسىز ەتەدى. ءبىز Kazakhstan Open دوداسىن جىل سايىن وتكىزۋدى جوسپارلاپ وتىر­مىز»، دەدى تۋرنير الدىندا قازاقستان ۇستەل تەننيسى فەدە­را­تسياسىنىڭ پرەزيدەنتى دانيار ابىلعازين.

ءدۇبىرلى دودا قورىتىندىسى بويىنشا ەرلەر اراسىنداعى سىندا، بۇعان دەيىن حابارلان­عانىنداي، وتانداسىمىز، ەل ۇس­تەل تەننيسىنىڭ كوشباسشىسى كيريلل گەراسيمەنكو توپ جاردى. ال ايەلدەر اراسىنداعى تارتىس­تى باسەكەدە رەسەيلىك ۆالەريا كو­تسيۋردىڭ جولى بولدى. ەكىنشى جۇلدە دە رەسەيلىك ەكاتەرينا وحوت­­نيكوۆاعا بۇيىرسا، قولا مە­دالعا قازاقستاندىق ايا الىم­باەۆا قول جەتكىزدى.

ەرلەر اراسىنداعى جۇپتاسىپ ونەر كورسەتۋ سىنىندا كيريلل گەراسيمەنكو مەن قاراعاندىلىق جاس تالانت الان قۇرمانعاليەۆقا تەڭ كەلەر قارسىلاس بولمادى. رەسەيلىك جۇپ ۆالەريا كو­تسيۋر مەن ۆالەريا ششەرباتىح ايەل­دەر اراسىنداعى سايىستا مىق­تى­لىعىن مويىنداتتى. ال قارا­عاندىلىق زاۋرەش اقاشەۆا مەن سارۆينوز ميركاديروۆا بولسا، جۇلدەلى ءۇشىنشى ورىندى جەڭىپ الدى.

ارالاس جۇپتار اراسىنداعى وتكەن تارتىستا رەسەيدەن كەلگەن ۆالەريا كوتسيۋر مەن ماكسيم كا­بۋر­كين جۇبى جەڭىس تۇعىرىنىڭ ەڭ بيىك ساتىسىنا كوتەرىلدى. بۇل سىندا قازاقستاندىق تەننيسشىلەر دە جۇلدەسىز قالمادى. اتاپ ايت­قاندا، ەريك رايتەر مەن اراي اشكەەۆا جۇبى قولا جۇلدەگە يە بولدى.

ءسويتىپ، تارتىستى وتكەن تۋرنيردە قازاقستان قۇراما كومانداسى ەكى التىن جانە ءۇش قولا جەڭىپ الىپ، ءساتتى ونەر كورسەتتى.

اتالعان تۋرنيرگە كەلگەن قو­ناقتار مەن قاتىسقان سپورتشىلار ءدۇبىرلى دودانىڭ وتە جوعارى دەڭگەيدە وتكەنىن ءبىراۋىزدان اتاپ ءوتتى. جالپى، سوڭعى جىلدارى قاراعاندى وبلىسىندا ۇستەل تەننيسى قارقىندى تۇردە دامىپ كەلەدى دەپ ايتۋعا بەرىك نەگىز بار. ناقتىراق ايتقاندا، وسى سپورت ءتۇرىنىڭ وڭىرلىك فەدەراتسياسىنا جەتەكشىلىك ەتەتىن وبلىس اكىمى جەڭىس قاسىمبەكتىڭ قامقورلىعىنىڭ ارقاسىندا ۇستەل تەننيسى شەبەرلەرىنىڭ جارىستارعا الاڭسىز دا تىڭعىلىقتى دايىندالۋىنا بارلىق جاعداي جا­سالعان.

ال بىلتىر مەملەكەت باس­شىسىنىڭ ءوزى اشقان Saryarka زاماناۋي تەننيس ورتالىعى حا­لىقارالىق دەڭگەيدەگى كەز كەلگەن جارىستى وتكىزۋگە مۇمكىندىك بەرەدى. مىسالى، جالپى اۋماعى ءتورت مىڭ شارشى مەتر بولاتىن بۇل نىساندا 18 تەننيس ۇستەلى قويىلعان ويىن بولمەسى جانە حالىقارالىق ۇستەل تەن­نيسى فەدەراتسياسىنىڭ بارلىق تەح­ني­كالىق تالاپتارىنا سايكەس كە­لەتىن توعىز تەننيس ۇس­تەلى بار جاتتىعۋ زالى بار. سون­داي-اق مۇن­دا كەشەندى دايىن­دىق­قا ار­نال­عان جاتتىعۋ زالدارى، مەدي­تسينالىق كابينەت، سپورت­شى­لارعا ارنالعان دەمالىس بول­مەلەرى، تو­رەشىلەر مەن باپكەرلەر بول­مە­لەرى، كونفەرەنتس-زالدار مەن فۋدكورت قاراستىرىلعان.

قاراعاندى وبلىستىق دەنە شىنىقتىرۋ جانە سپورت باس­قارماسىنىڭ باسشىسى تەمىرحان ابىلاەۆتىڭ ايتۋىنشا، قازىرگى ۋاقىتتا وڭىردە ۇستەل تەننيسىمەن اينالىسۋشى بالالار مەن جاس­تاردىڭ قاتارى كوبەيىپ كەلەدى. «وبلىس ورتالىعىندا جاڭا تەننيس ورتالىعىنىڭ سالىنۋى سپورت­تىڭ وسى ءتۇرىنىڭ دامۋى­نا ۇلكەن سەرپىن بەردى. وسى باعىت­تاعى جۇمىستارعا بارىنشا قول­داۋ كورسەتىپ وتىرعان وبلىس باس­­­شىلىعىنا دەگەن العىسىمىز مول»، دەيدى ول.

ەلىمىزدەگى جانە وبلىستاعى كۇردەلى ەپيدەميولوگيالىق جاع­دايعا بايلانىستى، جارىستىڭ كورەرمەنسىز وتكەنىن ايتا كەتكەن ءلازىم. ەسەسىنە، بۇل ITTF Kazakhstan International Open-2021 ءتۋرنيرىن Qazsport تەلەارناسى مەن حالىقارالىق ۇستەل تەننيسى فەدەراتسياسىنىڭ رەسمي سايتى تىكەلەي ەفيردە كورسەتتى.

سوڭعى جاڭالىقتار

الماتى تۇرعىندارى سۋسىز قالدى

ايماقتار • بۇگىن، 15:57

كانەلونى اۋىر شايقاس كۇتىپ تۇر

كاسىپقوي بوكس • بۇگىن، 12:18

ۇقساس جاڭالىقتار