قىركۇيەك ايىندا 3,6 ميلليون وقۋشى, 400 مىڭعا جۋىق مۇعالىم, 600 مىڭعا جۋىق ستۋدەنت جانە 35 مىڭنان استام وقىتۋشى ءۇشىن جاڭا وقۋ جىلى باستالعاندىقتان, وسى كەزەڭدە ءبىلىم بەرۋ سالاسىنا قاتىستى ماسەلەلەر اسا وزەكتى بولىپ تابىلادى. جەدەل جەلى تەلەفوندارى ەل ازاماتتارىنىڭ كوميتەت پەن اۋماقتىق دەپارتامەنتتەردىڭ قىزمەتكەرلەرىنە ءتۇرلى پروبلەمالار تۋرالى حابارلاۋى ءۇشىن جۇمىس ىستەيتىن بولادى.
بۇل مۇعالىمدەردى وزىنە ءتان ەمەس فۋنكتسيالارعا تارتۋ, مەكتەپ دارەتحانالارى, بەينەباقىلاۋ كامەرالارى, دابىل باتىرمالارى, قاۋىپسىزدىك جۇيەسىنىڭ باسقا ەلەمەنتتەرى, جاتاقحانالارعا قاتىستى جانە ت.ب. ماسەلەلەر بولۋى مۇمكىن.
سونداي-اق اتا-انالار, مۇعالىمدەر جانە بۇل ماسەلەلەرگە بەي-جاي قارامايتىن ادامدار WhatsApp ءموبيلدى قوسىمشاسى ارقىلى 8-705-206-59-32 نومىرىنە قاۋىپسىزدىك جۇيەلەرىنىڭ, مەكتەپ دارەتحانالارىنىڭ, جاتاقحانالارداعى جاعدايلاردىڭ تالاپتارعا سايكەسسىزدىگى تۋرالى فوتو جانە بەينەماتەريالداردى جىبەرە الادى. مەكتەپتەرگە قاتىستى ماسەلەلەر جەرگىلىكتى اتقارۋشى ورگاندارعا بەرىلەتىن بولادى, ويتكەنى قارجىلاندىرۋ فۋنكتسيالارى, قۇرىلىس, جوندەۋ جۇمىستارى, قاجەتتى جاعدايلار جاساۋ, ونىڭ ىشىندە سانيتارلىق ماسەلەلەر اكىمدىكتەردىڭ قۇزىرىندا. سونىمەن قاتار وسى وتىنىشتەردىڭ بارلىعى پروبلەمالار تۇپكىلىكتى جويىلعانعا دەيىن كوميتەتتىڭ جانە ونىڭ اۋماقتىق دەپارتامەنتتەرىنىڭ باقىلاۋىندا بولادى.
«قازىرگى ۋاقىتتا ادامداردىڭ باسىم بولىگى فوتوسۋرەت پەن ۆيدەو تۇسىرۋگە ارنالعان فۋنكتسيالارى بار سمارتفونداردى پايدالانادى. بالالار ءۇشىن وقۋ پروتسەسىنىڭ ىڭعايلى جانە قاۋىپسىز بولۋىن قالاپ, بۇل ماسەلەگە نەمقۇرايلى قارامايتىن ازاماتتار قازىردىڭ وزىندە ءتۇرلى بۇزۋشىلىق تۋرالى حاباردار ەتىپ, فوتوسۋرەتتەر مەن بەينەماتەريالدار جاريالاپ جاتادى. ءبىز ازاماتتاردىڭ وتىنىشتەرىن باقىلاۋعا الىپ, بالالاردىڭ قاۋىپسىزدىگىن قامتاماسىز ەتۋ ماسەلەلەرىندەگى بەلسەندىلىگى ءۇشىن ولارعا العىس ايتامىز. ەگەر باسقا دا ازاماتتار وسىلاي جاساپ, بەلگىلەنگەن تالاپتارعا سايكەس كەلمەيتىن فاكتىلەر تۋرالى بىزگە حابارلاسا, ءبىز بۇل ماسەلەنى اكىمدىكتەردىڭ قاراۋىنا جىبەرىپ, ماسەلە تولىق شەشىلگەنگە دەيىن ءوز باقىلاۋىمىزدا ۇستايمىز. ويتكەنى بەينەكامەرالارمەن قامتۋ نەمەسە مەكتەپتەردەگى سانيتارلىق توراپتارعا قاتىستى ماسەلەلەردى شەشۋ اكىمدىكتەردىڭ قۇزىرىندا», دەدى ءبىلىم جانە عىلىم سالاسىندا ساپانى قامتاماسىز ەتۋ كوميتەتىنىڭ ءتورايىمى گۇلزات كوبەنوۆا.
ەستەرىڭىزگە سالا كەتەيىك, وسى وقۋ جىلىنىڭ باسىنان بەرى قر بعم ءبىلىم جانە عىلىم سالاسىندا ساپانى قامتاماسىز ەتۋ كوميتەتىنە ازاماتتاردان 70-كە جۋىق ءوتىنىش كەلىپ ءتۇستى. كوميتەتتىڭ قاراۋىنان جانە ارالاسۋىنان كەيىن بارلىق ءوتىنىش بويىنشا ءتيىستى شارالار قابىلداندى.
بۇعان دەيىن قر ءبىلىم جانە عىلىم مينيسترلىگى مەكتەپتەرگە بايلانىستى تاپسىرمالاردى ورىنداماعان تۇلعالارعا قاتىستى شارالار قابىلداۋ ءۇشىن بىرقاتار ءوڭىردىڭ اكىمدىكتەرىنە حات جولداعان بولاتىن. ماسەلە دارەتحانالارمەن, بەينەباقىلاۋ كامەرالارىمەن, دابىل باتىرمالارىمەن جانە قاۋىپسىزدىك جۇيەلەرىنىڭ باسقا ەلەمەنتتەرىمەن بايلانىستى سۇراقتاردى شەشۋ تۋرالى بولىپ وتىر. 
