سالاماتتى ءومىر سالتىن ۇستاناتىن جاراسىمدى جۇپتىڭ سپورتتىق باسەكەدە جەتكەن جەتىستىكتەرى دە ماقتاۋعا تۇرارلىق. ەندەشە, تاۋەلسىزدىكتىڭ 30 جىلدىعى قارساڭىندا الماتى وبلىستىق وتباسىلىق سايىستاردا اۋداننىڭ ابىرويىن ارتتىرىپ, سپورتتىق سالانىڭ جاندانۋىنا ۇلەس قوسىپ جۇرگەن, كوپبالالى اتا-انا اتانعان تالعات پەن ءمادينا جايلى اڭگىمە وربىتسەك دەپ ەدىك.
ءۇيدىڭ وتاعاسى تالعات لاۋباەۆ تا, وتاناسى ءمادينا الىبەكوۆا دا – مەكتەپ قابىرعاسىنان سپورتتى جانىنا سەرىك ەتىپ, تالاي جەتىستىككە جەتكەن جاندار. تاۋەلسىزدىكتىڭ ءتول قۇرداستارى – جەتىسۋ جەرىنىڭ تۋمالارى. تالعات تۇگەلباي ۇلى 6 سىنىپتان باستاپ بوكسپەن اينالىسقان. تالدىقورعانداعى وبلىستىق سپورت مەكتەپ-ينتەرناتىن بىتىرگەن سوڭ, الماتى قالاسىنداعى سپورت جانە تۋريزم اكادەمياسىن اياقتاعان. ال ءمادينا رازبەكقىزى 5 سىنىپ وقىپ جۇرگەندە كۇرەستىڭ ىشىنەن سامبونى تاڭداعان. نازىك جاندى سپورتشى الماتىداعى ك.احمەتوۆ اتىنداعى رەسپۋبليكالىق سپورت مەكتەبىن اياقتاپ, ءال-فارابي اتىنداعى قازاق ۇلتتىق ۋنيۆەرسيتەتىندە «دەنەشىنىقتىرۋ جانە سپورتشى» ماماندىعىن تامامداعان.
جاراسىمدى جۇپتىڭ ومىرلىك جولعا قادام باسىپ, شاڭىراق كوتەرۋىنە سەبەپشى بولعان دا وسى سپورت. ونىڭ ۇستىنە ەكەۋىن جاقسى بىلەتىن دوس-جاراندارىنىڭ دا ىقپالى بولدى دەسەك, ارتىق ايتقاندىق ەمەس. ويتكەنى سامبوشى ءمادينانىڭ بوزكىلەمدە كۇرەسىپ جۇرگەن قۇربىلارى تالعاتتىڭ سىنىپتاستارى ەكەن. وسىلايشا, سپورتقا دەگەن ەكەۋىنىڭ قىزىعۋشىلىعى مەن ورتاق دوستارى ارقىلى ەكى جاس 2013 جىلى وتباسىن قۇرعان. بۇگىندە قوس سپورتشى ەكى ۇل مەن ەكى قىزعا ۇلگىلى اتا-انا اتانىپ, 29 جاستارىندا كوپبالالى وتباسى اتاندى.
تاۋەلسىزدىك قۇرداستارىنىڭ وزدەرى قالاپ تاڭداعان سپورت تۇرلەرىنەن اۋىز تولتىرىپ ايتارلىقتاي جاقسى ناتيجە كورسەتكەنىن ايتا كەتۋ كەرەك. بوكستى ەركىن مەڭگەرگەن تالعات رەسپۋبليكالىق تۋرنيرلەردىڭ بىرنەشە مارتە چەمپيونى, تالاي جارىستاردا جۇلدەگەر اتانعان. ال ءمادينا سامبو كۇرەسى بويىنشا 7 دۇركىن ەل چەمپيونى اتانسا, بايراقتى باسەكەلەردەن دە بيىكتەن كورىنگەن. ماسەلەن, ازيا ويىندارىندا جۇلدەلى ءى ورىن السا, الەم چەمپيوناتتارىندا ەكى رەت قولدا جۇلدەگەر اتانعان. سونىمەن قاتار ەۋرازيا تۋرنيرىنە قاتىسىپ, ءىى ورىندى دا يەلەنگەن.
سپورتشى ەرلى-زايىپتىنىڭ وسىنداي جەمىستى جەتىستىكتەرى تاجىريبە رەتىندە بۇگىنگى تاڭدا وزدەرىنىڭ باپكەرلىك مىندەتتەرىنە ۇلكەن كومەگىن تيگىزۋدە. ولار قازىرگى ۋاقىتتا الماتى وبلىسىنىڭ, قاراساي اۋدانىندا ورنالاسقان «ۇشقوڭىر» سپورت مەكتەبىندە جاتتىقتىرۋشى رەتىندە قىزمەت ەتۋدە.
تالعاتتىڭ باپكەرلىك شەبەرلىگى تالاي جىلدار بويى بوكسپەن اينالىسقان, اتالعان ورتالىقتىڭ باسشىسى داۋرەن تولەگەننىڭ بىلتىر الماتى وبلىستىق چەمپيوناتتا جۇلدەلى ءى ورىن الۋىنا سەبىن تيگىزدى. بۇل دا سپورت مەكتەبىنىڭ جەمىستى جەتىستىكتەرىنىڭ ءبىرى دەسەك بولادى. وسىلايشا, ەرلى-زايىپتى باپكەرلەر سپورت مەكتەبىندە جەمىستى ەڭبەك ەتىپ, شاكىرتتەرىن شىڭداپ, ءتۇرلى جارىسقا جاس قاراسايلىقتاردى باپتاپ كەلەدى.
لاۋباەۆتاردىڭ وتباسىلىق جارىستاردان دا جاقسى ناتيجە كورسەتكەنىن ايتا كەتكەن ءجون. ولار 2020 جىلى «جاس وتباسى» سايىسىنىڭ اۋداندىق ىرىكتەۋىنەن سۇرىنبەي ءوتىپ, تالدىقورعان قالاسىندا وتكەن وبلىستىق بايقاۋدا جۇلدەلى ءى ورىنعا يە بولىپ, قاراساي اۋدانىنىڭ اتىن جەتىسۋ جەرىنە تانىتىپ, ۇلگىلى وتباسىلاردىڭ بىرىنە اينالدى.
ۇل-قىزدارى دا سپورتتان قۇرالاقان ەمەس. انالارىنىڭ ايتۋىنشا, ولار بالاباقشاداعى جانە مەكتەپتەگى جارىستاردان قالماي, جاقسى ناتيجە كورسەتىپ كەلەدى. سپورتشى اتا-انانىڭ ەندىگى ارمانى – بالالارىنا جاقسى تاربيە بەرىپ, وزدەرى جەتپەگەن جەتىستىككە جەتكىزۋ. سونىمەن قاتار ۇرپاقتارىنىڭ وليمپيادا چەمپيونى اتانسا دەگەن تىلەگى دە بار.
وتباسىلىق قۇندىلىقتى ناسيحاتتاپ, سپورتتىق سالانى جانداندىرىپ جۇرگەن لاۋباەۆتار وتباسى, مىنە, وسىنداي. تاۋەلسىزدىكتىڭ قۇرداستارى كوپبالالى اتا-انا رەتىندە دە كوپكە ۇلگى دەپ بىلەمىز. ونەگەلى ومىرلەرى جاقسى جاعىنان جالعاسىپ, ۇل-قىزدارىنىڭ جەتىستىكتەرى ەسەلەنىپ, ەلدىڭ ەڭسەسىن بيىك ەتەتىن شاكىرتتەرى كوبەيە بەرسىن.
ديدار مالىك ۇلى
الماتى وبلىسى,
قاراساي اۋدانى
