پرەزيدەنت ايتقانداي, ول ناعىز ىسكە اساتىن, ساپالى ناتيجە بەرەتىن, حالىققا تۇسىنىكتى, ناقتى, يكەمدى جوبالاردى قاراستىرۋى كەرەك. بىزدە وسى كۇنگە دەيىن كوبىنەسە مەگا جوبالار قولعا الىنىپ كەلدى, ونىڭ ىشىندە الەۋمەتتىك ماسەلەلەر دە, جول دا, قۇرىلىس تا – ءبارى بار, ادام وسىنداي جوبانىڭ ناقتى نەنى كوزدەيتىنىن ۇقپاي قالادى. ناتيجە دە ناقتى كورىنبەيدى. ال ناقتى جوبالار قولعا الىنسا ونىڭ ورىندالۋىن حالىق كوزىمەن كورىپ وتىرار ەدى.
مەملەكەتتىك قىزمەتكەرلەردىڭ 25 پايىزعا قىسقاراتىنىن ەستىپ ءجۇرمىز. بۇل ماسەلە بۇگىنگى جولداۋدا دا ايتىلدى. شىنىندا دا بىزدە ءبىر-بىرىنە كەدەرگى كەلتىرەتىن ايقىش-ۇيقىش شەنەۋنىكتەر اپپاراتى قالىپتاسقان. ونىڭ جۇمىسى جوعارىدان تومەنگى بارلىق باسقارۋ اپپاراتتارىندا كورىنىس بەرەدى. وزدەرىن قۇرعان سوڭ, ەڭبەكاقى تولەپ جاتقان سوڭ ولاردىڭ كوبى امالسىز ءبىر ارەكەتتەردى وزدەرىنە تاۋىپ الادى, وزدەرىنىڭ نۇسقاۋلىقتارىنا سۇيەنەدى, ءسويتىپ اتقارىلعالى تۇرعان دۇرىس دۇنيەلەردىڭ اياعىنا تۇساۋ بولادى. سايىپ كەلگەندە بۇل مەملەكەتتىك قىزمەت جۇمىسىنىڭ ساپاسىن تومەندەتەدى.
پرەزيدەنت توتەنشە جاعدايلار تۋعاندا وسىنداي جۇيەنىڭ كەسىرىنەن جەدەل شارالار قابىلداۋدىڭ ءوزى قيىن بولعانىن ايتتى. سوندىقتان ول ءوزىنىڭ تىكەلەي جارلىعىن شىعارۋعا ءماجبۇر بولعان. سونىمەن بىرگە شەنەۋنىكتەردەن حالىققا قىزمەت كورسەتۋ ساپاسىن دا ۇنەمى تالاپ ەتىپ وتىرعان ءجون. ايتپەسە, كەيبىر شەنەۋنىكتەر الدىنا ءىسى ءتۇسىپ كەلگەن ادامعا جوعارىدان تومەن قاراپ, ايتەۋىر قۇتىلۋ ءۇشىن جالعان ءسوز ايتۋعا داعدىلانىپ قالعان. بۇل ءۇشىن وزىنە ەشقانداي جاۋاپكەرشىلىك كەلمەيتىنىن بىلەدى, ال ادامگەرشىلىك قاتىناستى كەرەك قىلمايدى. مۇندايدىڭ ءبىرىن كۇنى كەشە عانا ءوز باسىمنان وتكەردىم. ءبىر انىقتاما الۋ ءۇشىن بەس ەسىكتى اشۋعا تۋرا كەلدى. ال مۇنداي جاعدايلار شەنەۋنىككە عانا ەمەس, جالپى مەملەكەتتىك اپپاراتقا دەگەن ادامنىڭ سەنىمىن جويادى.
قارشىعا قويانباەۆ,
زەينەتكەر
پەتروپاۆل
